Read Kuranko Nihɛmaya 12 Bible Online

Nihɛmaya 12 - Kuranko bible

Nihɛmaya 12

¹Saraka-masɔlɛ anubɛ Lifayi minnu sɛgira Siyalitiyɛlila den Sarababulu anubɛ Saraka-Masɔla-Kun-Tigi-Wɛ Yasowa fɛ ka bɔ biralɛ rɔ, wonu tɔgɛ le kɛnu na. Sɛraya wo, Yɛrɛmaya wo, Ɛsira wo,

²Amaraya wo, Maluku wo, Hatusi wo,

³Sɛkanaya wo, Rihum wo, Mɛrɛmoti wo,

⁴Ido wo, Kenɛtɔn wo, Abaya wo,

⁵Mayamin wo, Mayadaya wo, Beligeyayi wo,

⁶Sɛmaya wo, Yoyaribu wo, Yɛdaya wo,

⁷Salu wo, Emɔki wo, Helikaya wo, anubɛ Yɛdaya. Saraka-masɔla kun-tigi le kɛnu na Saraka-Masɔla-Kun-Tigi-Wɛ Yasowata wati rɔ.

⁸Lifayi minnu bi baraka-bira-bɛti bɔ koe kun na, wonu tɔgɛ le kɛnu na, Yɛsuwa wo, Binuwai wo, Kadamiyɛli wo, Sɛrɛbaya wo, Yuda anubɛ Matanaya.

⁹Bakibukiya wo, Yuno wo, anubɛ anu na-kelen-nyɔgɛnu, kɛnu denu taranta sigi-labirɛ la.

¹⁰Yasowa ya Yoyakim sɔrɔn. Yoyakim ya Ilayasibu sɔrɔn. Ilayasibu ya Yoyada sɔrɔn.

¹¹Yoyada ya Yonatan sɔrɔn. Yonatan ya Yaduwa sɔrɔn.

¹²Yoyakim ye saraka-masɔ-kun-tigi-wɛ la tumɛ min, saraka-masɔlɛ kɛnu denu bi kun-tigiyɛ la iko anu kebilɛ ye nya min. Mɛraya bɔra Sɛraya kebilɛ rɔ. Hananaya bɔra Yɛrɛmaya kebilɛ rɔ.

¹³Mɛsulam bɔra Ɛsira kebilɛ rɔ. Yɛhohanan bɔra Amaraya kebilɛ rɔ.

¹⁴Yonatan bɔra Maluku kebilɛ rɔ. Yusufu bɔra Sɛbanaya kebilɛ rɔ.

¹⁵Adina bɔra Harim kebilɛ rɔ. Hɛlikeyi bɔra Mɛrayoti kebilɛ rɔ.

¹⁶Sakaraya bɔra Ido kebilɛ rɔ. Mɛsulam bɔra Kenɛtɔn kebilɛ rɔ.

¹⁷Sikiri bɔra Abaya kebilɛ rɔ. Mɔgɛ do[11] bɔra Menayamin kebilɛ rɔ. Peliteyayi bɔra Moyadaya kebilɛ rɔ.

¹⁸Samowa bɔra Biliga kebilɛ rɔ. Yɛhɔnatan bɔra Sɛmaya kebilɛ rɔ.

¹⁹Matinayi bɔra Yoyaribu kebilɛ rɔ. Yusayi bɔra Yɛdaya kebilɛ rɔ.

²⁰Kaleyayi bɔra Saleyayi kebilɛ rɔ. Iburu bɔra Emɔki kebilɛ rɔ.

²¹Hasabaya bɔra Helikaya kebilɛ rɔ. Natanɛli bɔra Yɛdaya kebilɛ rɔ.

²²Saraka-masɔla-kun-tigi-wɛ kɛnuta wati rɔ, Ilayasibu anubɛ Yoyada anubɛ Yonatan anubɛ Yaduwa, kɔni, anu ya saraka-masɔlɛnu anubɛ Lifayinuna kebila-kunyɛnu tɔgɛ sɛbɛ. Anu banta tɔgɛ kɛnu sɛbɛla Pasiya Mansa Dariyasita wati rɔ.

²³Kɔnɔ anu tora Lifayi kebila-kunyɛnu tɔgɛ sɛbɛ Ilayasibu mamanɛ Yonatanta wati rɔ.

²⁴Hasabaya wo, Sɛrɛbaya wo, Yɛsuwa wo, Binuwai anubɛ Kadamiyɛli, mɔgɔ-dande kɛnu denu ya Lifayinu tatala kurunyɛnu ma. Kurɔn donu tenbi Alla-tanto-bɛti bɔla, kurɔn doi fanan bi a labirala. Anu bi baraka-bira-bɛtinu bɔla a ye iko Allata mɔgɛ Mansa Dawuda, ya anu nabilanɛ to nya min.

²⁵Matanaya wo, Bakibukiya wo, Hɔbadaya wo, Mɛsulam wo, Talamɔn anubɛ Akubu, Bato-Bon-fen-namara-tinɛ da-makandannɛ le kɛnu na.

²⁶Mɔgɛ kɛnu denu bi nyɔ Yasowala den Yoyakimta wati rɔ, Yɛhosadaki mamanɛ, kɔni. Wo wati ya a taran, anuna kun-tigi Nihɛmaya ye a kɛndɛ la anubɛ Saraka-Masɔla Ɛsira min ya tɔn wara-koe lɔn bɛrɛkɛ!

²⁷Anu wuli tarɛ dantɛgɛla Mari ma Yerusalɛm soe burɔ, anu ya kilayɛ lata Lifayi bɛɛ ma Yuda nyamanɛ rɔ alako anu ni na kofu anu ma ladɛn wo rɔ. Anu ya wo ma le alako wonu ni na anu dɛnbɛ baraka-bira-bɛti-bɔɛ anubɛ wasanba-fɔɛ anubɛ sɔrɔn-fɔɛnu na.

²⁸Sigi-salɛ minnu bi Lifayi kebilɛnu tɔ, wonu ya anu kundɛn. Donu nara ka bɔ Yerusalɛmna foolɛ soenu tɔ. Donu nara ka bɔ Nɛtofa soe burɔ.

²⁹Donu nara ka bɔ Bɛti-Kiligali soe burɔ. Donu nara ka bɔ Kiba soe burɔ. Donu nara ka bɔ Asamafɛti soe burɔ.

³⁰Saraka-masɔlɛnu anubɛ Lifayinu ya anu nyɛrɛ sɛninya anubɛ mɔgɛnu anubɛ so-tarɛ anubɛ a don-dɛnu iko tɔn ya a fɔ nya min.

³¹Kun-tigi minnu bi Yuda nyamanɛ rɔ, nde, Nihɛmaya ya wonu kundɛn tarɛ kuma.[12] N ya anu sigi sigi-salɛnu kuma ka sigi-salɛ wonu tala kurun-belebele fila la minnu bi soe lafoola baraka-bira-ko-tolɔn la. Kurun fɔlɔtɛ tara sigi sala anu bolo-nyimɛ wara la tarɛ kuma ha don-dɛ min tɔgɛ Nyɛ-Rawuya-Dɛ.

³²Hosaya bilanɛ fɔli-kɛlɛ wonu kɔma. Kun-tigi tɔnkɔn kelan bilanɛ anu fɛ.

³³Wo kɔma, Asaraya wo, Ɛsira wo, Mɛsulam wo,

³⁴Yuda wo, Bɛnyamɛ wo, Sɛraya anubɛ Yɛrɛmaya,

³⁵wonu denu bi buri fɛla anu kɔma. Wo kɔma, Yonatanna den Sakaraya bilara anu fɛ, Sɛmaya mamanɛ, kɔni. Sɛmaya fa tɔgɛ le Matanaya. Matanaya fa tɔgɛ le Mɛkaya. Mɛkaya fa tɔgɛ le Sakara. Wo bɛɛ bɔra Esafi kebilɛ rɔ.

³⁶Sakaraya na-kelen-nyɔgɛ minnu bilara a fɛ, wonu tɔgɛ le kɛnu na. Sɛmaya wo, Asarɛli wo, Melalayi wo, Kelalayi wo, Meyeyi wo, Natanɛli wo, Yuda anubɛ Hanani. Wonu bi tala fɔli-fen-su bɛɛ fɔla anu bolo Mansa Dawuda ya tolɔn kɛ min sufa la. Saraka-Masɔla Ɛsira min bi kɛdi-sɛbɛlayɛ la, wo sɔnɛ anu yarɔ.

³⁷Anu ke don-dɛ ma min tɔgɛ Tenke, anu yigira tarɛ ma. Anu yɛlɛta kin-pogorɔn la nyɔ rɔ ka ta Mansa Dawuda halala-luyi telen tɔ. Anu yɛlɛta tarɛ kuma tun ka ta tenbi Mansa Dawudala bolɔn la ka sɛgi tarɛ kuma don-dɛ wara la min tɔgɛ Yi, soe tele-bɔɛ wara la, kɔni.

³⁸Kurɔn doi minnu bi sigi-sɛ la, wonu fanan tara tarɛ kuma bolo-maran wara la. Nde, Nihɛmaya bilara sigi-salɛ wonu fɛ. Mɔgɔ-toe tɔnkɔn kelan bilara nde fɛ. Ma birita-biritɛ tenbira kan-tina-layan-bɛ la min tɔgɛ Biredi Mintan Tinɛ kuma ha ka ta ke tarɛ kan tinɛ min tɔgɛ Da-Gbengbe-Wɛ.

³⁹Ma bɔra nyɔ ka ke don-dɛ ma min tɔgɛ Ifɛrɛm. Ma tenbira nyɔ la, ma tara ke don-dɛ ma min tɔgɛ Yɛsena. Ma bɔra nyɔ, ma tara ke don-dɛ ma min tɔgɛ Yɛgɛ. Ma tenbira nyɔ fanan na, ma tara ke kan-tina-layan-bɛ ma min tɔgɛ Hananɛli. Ma tenbira nyɔ la, ma tara ke kan-tina-layan-bɛ do fanan ma min tɔgɛ Kɛmɛ. Ma bɔra nyɔ, ma tara ke don-dɛ doi ma min tɔgɛ Sagɛ. Ma tara a laban fɔɔ tarɛ don-dɛ min tɔgɛ Kandannɛnuta Don-Dɛ.

⁴⁰Kurɔn minnu bi baraka-bira-sigi-sɛ la Alla ye, mabɛ wonu dama tara Bato-Bɔn yarɔ kata burɔ. Kun-tiginu bɔnɛ a la,

⁴¹saraka-masɔlɛ minnu bi buri fɛla n fɛ, wonu tɔgɛ le kɛnu na, Ilayakim wo, Meyaseya wo, Menayamin wo, Mɛkaya wo, Ɛleyowenayi wo, Sakaraya anubɛ Hananaya.

⁴²Saraka-masɔlɛ minnu fanan bilara kɛnu fɛ, wonu tɔgɛ le kɛnu na, Meyaseya wo, Sɛmaya wo, Ɛliyasa wo, Ɔsa wo, Yɛhohanan wo, Malakiya wo, Ilam anubɛ Ɛsɛri. Yɛsirahaya sɔra sigi-salɛnu ya rɔ. Anu dama ya anu kuli mayɛlɛ sigi sa tinɛ anu sɛbɛ-kuna-wɛ la.

⁴³Mɔgɛnu ya saraka-siyaman nabɔ wulɔn tele rɔ, ado anu sewara dɔgɔma-ma-de bawo Alla le ya anu nasewa. Musinu anubɛ dennɛnu kofura anu ma. Mɔgɔ tenbi wula-yan la, a ye anu wɔyɔ-kan lamɔɛnna sewɛ bolo.

⁴⁴Anu bi yakanu namarala Bato-Bon-konko minnu na, a fui-fen wo, a ki-fen wo, anu ya mɔgɛ donu sigi wonu kun na. Wonuta wɔlɛ ma fenfen na fɔ ka yakanu makele mɔgɛnu bolo saraka-masɔlɛnu anubɛ Lifayinu ye sɛnɛnu tɔ soenu dafɛ iko tɔn ya a fɔ nya min. Yuda nyamanita-mɔgɛnu sewara saraka-masɔlɛnu anubɛ Lifayinu na

⁴⁵ bawo anu ya anu masɛninya wɔli anubɛ ladɛnnu kɛ a kilɛ fɛ iko Alla ya a fɔ anu ye nya min. Bato-Bon-fɔli-kɛlɛnu wo, a makandannɛnu wo, wonu wɔlita iko Mansa Dawuda anubɛ ala den Mansa Silamɛni ya a fɔni to anu ye nya min.

⁴⁶Ka a bi Mansa Dawuda anubɛ fɔli-kɛla Esafita wati ma, ha kaka, fɔli-kɛlɛnu bi baraka-bira-bɛtinu bɔla ka fɔli-fannu kɛ-a-rɔ Alla ye.

⁴⁷Ka a bi Sarababuluta wati ma ka a sigi Nihɛmayata wati la, tele-wo-tele, Isirɛla mɔgɛnu si anu bolo labui Bato-Bon-fɔli-kɛlɛnu anubɛ a makandannɛnu ye. Wo kɔma, anu si kɔ-fen-sɛnimɛnu sa a dan na Lifayinu ye. Wo kɔma, Lifayinu ya saraka-masɔlɛnutɛ bɔ kɔ-fan wonu tɔ.