Read Kuranko Nihɛmaya 13 Bible Online

Nihɛmaya 13 - Kuranko bible

Nihɛmaya 13

¹ Anu ya Nɛbi Musata tɔnnu karan bɛɛ yala lunyɛ min, anu kera kan tinɛ wo ma min bi a fɔla ko Amonnu anubɛ Mohabu mɔgɛnu, a ma bɛn, anu ni kofu Allata mɔgɛnu ma.

² Wo sɛbɛra bawo Isirɛla mɔgɛnuna bɔɛ Iyipiti, mɔgɛ kɛnu ma sɔn dɔn-fan anubɛ yi dila anu ma. Min sanɛ wo kuma, anu ya Belam sara ko a ni Isirɛla mɔgɛnu danka kɔnɔ mata Alla ya dankɛ wo yɛlɛma duwɛ la.

³Isirɛla mɔgɛnu ya kumɛ wo lamɔɛn min kɛ, anu ya sibolo-gbɛrɛnu gben anu kurun tɔ.

⁴Saraka-Masɔla Ilayasibu min bi Bato-Bon-fen-namara-tinɛnu kun na, wonubɛ Amon kɛ Tobaya tɛma diyanayɛ ara mɛ dɔgɔma-ma-de!

⁵Bato-Bɔn wo konko-fulan-bɛ do ye nyɔ, fui-fen-sarakɛnu wo, isɛnti wo, Bato-Bon-mirannu wo, saraka-masɔlɛnu niyi wo, fui-fen-yakanu wo, minni-fen-yakanu wo, anubɛ tulu-yakanu anu bi min dila Lifayinu anubɛ Bato-Bon-fɔli-kɛlɛnu anubɛ a da-makandannɛnu ma, wonu namara tinɛ le konko wo la. Ilayasibu sɔnta Tobayata fen namara koe ma nyɔ.

⁶Kɔnɔ koe kɛ ye mala tumɛ min, nde, Nihɛmaya sa Yerusalɛm soe burɔ nun. Babilɔn Mansa Atasakasila mansayɛ san bi-sawa ani san fila nyɔgɛ ma, n tara n dantɛgɛ a ma. Wati tenbinɛ, a sɔnta

⁷n sɛgi-koe ma Yerusalɛm. A lɔn n bolo ko Tobaya ara fen namara Bato-Bon-konko do la, wo ya n tɔrɔ.

⁸N yisi bɔra furr, ha n ya Tobayala miran bɛɛ lafili luyi ma.

⁹N ya a ma, anu ya kan tinɛ wo sɛninya tun iko tɔn ya a fɔ nya min. Wo kɔma, a fui-fen wo, a Bato-Bon-miran wo, a isɛnti wo, n ya wo bɛɛ lasɛgi bɔn la tun.

¹⁰ Wo kɔma, n nara to a lɔnna fanan ko Bato-Bon-fɔli-kɛlɛnubɛ anu Lifayi donu bara Yerusalɛm boloka ka ta sɛni sa tinɛ. Anu ya wo ma bawo mɔgɛnu sa anu niyi dila anu ma.

¹¹N ya mɔgɔ-banu makuma bawo anu denu sɔnta ko Bato-Bɔn wara-koe ni sɛgi kɔma. N ya fɔli-kɛlɛnu anubɛ Lifayi wonu kele, n ko anu ni na anuna wɔlɛ dabira Bato-Bɔn la tun.

¹² Wo kɔma, mɔgɛnu donta nɛ rɔ fui-fen-yakanu anubɛ minni-fen-yakanu anubɛ tulu-yakanu na Bato-Bon-fen-namara-tinɛ burɔ.

¹³N ya minnu ma fen-namara-tina-kunyɛnu na, wonu tɔgɛ le kɛnu na. Saraka-Masɔla Sɛlimaya wo, kɛdi sɛbɛla Sedoki wo, anubɛ Pɛdaya-Lifayi. Sakarala den Henan, Matanaya mamanɛ, kɔni, anu kan-kɔrɔ-sigilɛ le wo la, ado minnu bi dɔn-fan ratalala anu ta-nyɔgɛnu na, n lara wonu na ken!

¹⁴E, nta Alla, i fonde lamiri koe wo dama ma n bara minnu ma ita Bato-Bɔn anubɛ a wɔlɛla ko ma.

¹⁵ Wo wati rɔ fanan, n ya mɔgɛnu taran nɔnbɔ-gbɔ-yi burunna Sulen-Tele ma Yuda nyamanɛ kɛ rɔ. Mɔgɛ donu fanan bi feri-fannu kirila anuna sofɛlɛnu kɔ tɛma Sulen-Tele ma, fui-fen wo, minni-fen wo, kɔn-gbɔ wo, toro-gbɔ wo, anubɛ fen-gbɛrɛkɛnu. Anu bi tala wonu na anu mayira tinɛ Yerusalɛm. N ya anu makuma bɛrɛbɛrɛkɛ ka a tɛgɛ fen-mayira-koe la Sulen-Tele ma.

¹⁶Taya kɛ minnu sigira Yerusalɛm, wonu nara yɛgɛ anubɛ fan donu na anu mayira tinɛ Isirɛla mɔgɛnu ma Yerusalɛm soe burɔ Sulen-Tele ma.

¹⁷N ya Yuda kun-tiginu makuma wola ko la ka a fɔ anu ye ko, “I yɛ lata wo ye ko-yogoma-sufa min kun na. Wo ara a ma, Sulen-Tele sɛninyani ma ma bolo tun.

¹⁸Ko sufa kɛ le ya a ma, Alla ya wo benbanu tɔrɔ ha soe kɛ kasarata. Ha bi, wole fanan bi sɔn kelan wo le kun na. Wo si a ma, Allata diminyɛ ni bui Yerusalɛm kɛ kuma bawo wo ye Sulen-Tele lafɛyala.”

¹⁹Tele min banda kɛ ye bɛnna Sulen-Tele ma, n ya a fɔ anu ye ko wo wurɛ la, anu ni Yerusalɛm so-tarɛ don-dɛ bɛɛ latogon. Anu kana anu naka fɔ Sulen-Tele[13] wurɛ la. N ya da-makandannɛnu sɔ so-tarɛ don-dɛ wonu na alako mɔgɛnu kana na fen-mayirata la soe burɔ Sulen-Tele ma.

²⁰Lunyɛ do, yila minnu si fen-su-siyamɛnu mayira, wonu kira tarɛ kɔma Nyima wurɛ la.

²¹N kumara anu ma, n ko, “Hali wo ma ki sɔni nyɔ ha sɔgɔma. Dɛ wonu na sa kala. Ni wo ya kɛ ma gbɛ, wo si n lɔn!” Ka a bi wati wo ma ha ka a sigi kaka la, yilanu ma na Sulen-Tele ma tun.

²²Wo kɔma, n ya a fɔ Lifayinu ye ko anu ni anu nyɛrɛ sɛninya ka to tarɛ don-dɛnu makandanna alako Sulen-Tele ni to gbiliyɛ rɔ. E, Alla, i fonde lamiri n ma kɛ fananna ko la. I ni n tanka ka a tɛgɛ ita keninteya-wɛla ko ma.

²³Wati kelan wo rɔ, n ya a taran, Yahudiya donu bara sibolo-gbɛrɛkɛ-musinu furu Asadadi soe burɔ anubɛ Amonnu tɔ anubɛ Mohabu mɔgɛ donu tɔ.

²⁴Yahudiyanuna dannu talɛ ye Asadadi kan fɔla, ni wo ma, kan-gbɛrɛ kɔnɔ anu ma kusan anuta Yahudiya-kan fɔla.

²⁵ N ya musi tigi wonu makuma. N ya anu danka ka anu gbesi ka anu kun-sigi mawurun. Wo kɔma, n ya a ma, anu ya anu keli Alla ye ko anu denu wo, anuna dannu wo, furu-nyɔgɔnya ti don anubɛ sibolo-gbɛrɛnu tɛma tun.

²⁶ N ya a fɔ anu ye ko, “Sibolo-gbɛrɛ furu-nyɔgɔnyɛ, wo le ya a ma, Mansa Silamɛni ya hakɛ kɛ. A mankan koloyara mansɛ bɛɛtɛ ko. A diyara Alla ye furr, ha a ya a ma Isirɛla mansɛ la. Yaga, wo ye hakɛ kɛla le.

²⁷Male si bila wota kɛ-nya wo fɛ sibolo-gbɛrɛkɛ-musu-furu-koe rɔ, wa?”

²⁸ Saraka-Masɔla-Kun-Tigi-Wɛ Ilayasibula dan le Yoyada la. Yoyada kɛla den-keminɛ ya Sanbalatila dunmusi do furu Bɛti-Hɔrɔn soe burɔ. N ya Yoyadala dan gben Yerusalɛm soe burɔ bawo Sanbalati anubɛ ala dunmusi, Yahudiya ma wonu na.

²⁹E, nta Alla, i fonde lamiri saraka-masɔlɛ kɛnu ma bawo anu bara saraka-masɔ-wɔlɛ lafɛya ka anuta lanyiri tinya Alla ya min kiri anubɛ Lifayinu tɛma ka a tɛgɛ sibolo-gbɛrɛkɛ-musu-furu-koe ma.

³⁰Ko-wo-ko tugunnɛ sibolo-gbɛrɛnu wara-koe la, n bara Yahudiyanu sɛninya wonu ma. N ya sereya sa saraka-masɔlɛnu anubɛ Lifayinu ma alako bɛɛ ni ata wɔlɛ lɔn.

³¹N ya sɔgɛ wara-koe rabɛn anu bi sarakɛnu mintanna minnu na alako sɔgɛ wo ni na a wati-bɛrɛ rɔ. Mɔgɛnu si na dɔn-fen-kun-fɔlɛnu na nya min, n ya wo bɛɛ rabɛn. E, nta Alla, i miri kɛ dama ma. I ni n barayi wonuna ko la.