Read Kuranko Nihɛmaya 2 Bible Online

Nihɛmaya 2 - Kuranko bible

Nihɛmaya 2

¹Karɛ nani tenbinɛ kɛ kɔma, karɛ min tɔgɛ Nisan,[2] lunyɛ do, Mansa Atasakasi ye fen dɔn kun na, n nara ala baan la a ma. Kɔnɔ bawo a ma n yisi-magboyanɛ yen bɛ lun-kelen-bɛrɛni,

²a ya n manyinika, a ko, “Nihɛmaya, nfenna i yisi magboyanɛ? N ya a lɔn i kɛndɛ le, yɔ, tumado koe do le ye i tɔrɔla, woletɔ i yisi magboyanɛ?” N kilanta kuma sufa wo la mansɛ bolo.

³ N duwara a ye, n ko, “N tigi, alamɛ i mɛra ila mansayɛ kɛ rɔ. N tigi, ma benbanu togon tinɛ wo ara tii. A tarɛ don-dɛ ara mintan gburr! Wo le ara a ma, n yisi ara tinya pɔ!”

⁴Mansɛ ya n manyinika, a ko, “I ye nyinina nfen ma wo rɔ n bolo?” N ya Arinyɛni-Tigi-Alla matara.

⁵N ban wo la, n ya a fɔ mansɛ ye ko, “Ni n bara-koe ara i hɛnɛ, ado ni i si sɔn, i kɔɛn bɔ n tɔ, n ni ta n benba togon tinɛ Yuda nyamanɛ rɔ alako n ni nyɔ sɔ a kurɛ la tun.”

⁶Mansɛ ye a kɔɛn bɔla n tɔ wati min, wo ya a taran, anubɛ ala musi siginɛ kan-tina-kelen. A ya n ta-wati anubɛ n na-wati manyinika. N ya wonu fɔ a ye. N ban wo fɔla a ye, a sɔnta n ta-koe ma.

⁷Wo kɔma, n ya ale mansɛ manyinika tun kɛdila ko la n si ta min don Yufereti bɛ tele-yigi warala kun-tigi wonu bolo alako n si kilɛ sɔrɔn nya min ka ta Yuda nyamanɛ rɔ.

⁸Min sanɛ wo kuma, n ya a manyinika ko a ni kɛdi sɛbɛ Esafi ma min bi ale mansɛla firɛ makandanna alako wo ni a ma, n ni fɛrannu sɔrɔn nyɔ rɔ. N ko n bi fɛran wonu denu bila ka a Bato-Bon-tarɛ don-dɛnu nadan anubɛ soe tarɛnu anubɛ n si sigi bɔn min na. N ya mansɛ manyinika koe min bɛɛsi ma, a ya wo bɛɛ nyinya n ye bawo Alla ye n fɛ.

⁹Mansɛ ya kɛlɛ-den-kun-tigi donu anubɛ kɛlɛ-den-so-laburilɛnu bila n fɛ tɔnkɔnyɔ! Mabɛ wonu tara ha Yufereti bɛ tele-yigi. N ke, n ya mansɛla kɛdinu don nyɔ-kun-tiginu bolo.

¹⁰Sanbalati ye Bɛti-Hɔrɔn soe burɔ anubɛ Tobaya siginɛ Amon nyamanɛ mɔgɔ-bayɛ la wo wati rɔ. Mɔgɔ filɛ wonu ya a lamɔɛn min kɛ ko mɔgɛ do ara na Isirɛla mɔgɛnu dɛnbɛn-koe la, wo ma anu yisi sa mumɛ!

¹¹Wo kɔma, n tara fɔɔ Yerusalɛm soe burɔ. Tele sawa dɛgɛdɛgɛ,

¹²Alla ya min sa n sɔndɔmɛ rɔ nyɔla ko la, n ma wo fɔ mɔgɔ-wo-mɔgɔ ye. Suyi tɛma, n ya n ta-nyɔgɔ mɔgɔ-dande bi ka ta soe kɔmɛ lakɔrɔsi. Ma tara sofɛlɛ kelen pe le la ma bolo, nde siginɛ min na, kɔni.

¹³Nna bɔɛ soe wo rɔ, n bɔra tarɛ don-dɛ do la min tɔgɛ ko Lɛɛ. Wo ye tele-yigi wara la le. N ya n tintan ka ta n bolo-maran wara la. N tara tenbi Ninkinankɛ Tenke la ka ta ke don-dɛ wo wara la min tɔgɛ Nyɛ-Rawuya-Dɛ. N bi tala Yerusalɛm tara kerinɛ wo lakɔrɔsila n bolo fɛ. Don-dɛ minnu bara mintan, n bi wonu fanan mafɛlɛnna tala.

¹⁴Soe tele-bɔɛ wara la, n tara fɔɔ tarɛ don-dɛ min tɔgɛ ko Tenke anubɛ yi min siginɛ a rɔ nyɔ anu bi min kelela ko Mansɛta Yi-Madɛnnɛ. N siginɛ sofɛlɛ min na, wo ma ke kila-wo-kila sɔrɔnna tara-kerinɛ wo rɔ.

¹⁵N ma ke kila sɔrɔnna nyɔ min kɛ, n yigira fole la ka ta tarɛ lakɔrɔsila. N ya soe lafoo wo nya na le pit! N donta don-dɛ la tun min tɔgɛ Lɛɛ n gbɛ rɔ.

¹⁶So-burɔ-mɔgɔ-ba fenfen ma n ta-tina lɔn, ado anu ma a lɔn fanan n bi min kun na. Ha bi, n ma n dantɛgɛ wɛ n ta-nyɔgɛ Yahudiyanu ye, a saraka-masɔla wo, a kun-tigi wo, a mɔgɔ-ba wo, anubɛ ka a fɔ mɔgɔ-gbɛrɛkɛ ye minnu si do kɛ wɔlɛ wo rɔ.

¹⁷Wo banda kɛ, n ya a fɔ anu ye ko, “Wo ara a yen, ma ye kɔndɔfili-su min tɔ bawo Yerusalɛm soe anubɛ a tarɛ-don-dɛnu mintannɛ. Ma ni mala soe tarɛ sɔ-kura-kɛ tun alako wo miliyɛ ni bɔ ma kuma.”

¹⁸Wo kɔma, Alla ye n fɛ nya min wo, a ya n dɛnbɛ nya min wo, mansɛ ya min bɛɛ fɔ n ye wo, n ya wo dantɛgɛlɛ sa anu ye. Anu dama ko, “Awa, ma ni wɔlɛ dabira wona.” Anu ya anu mabɛn ka wɔlɛ dabira min si na Alla hɛnɛ.

¹⁹Kɔnɔ Sanbalati anubɛ Tobaya anubɛ Arabu min tɔgɛ Kesɛm, wonu ya a lamɔɛn min kɛ ko ma ye soe anubɛ a tarɛ mabɛnna, anu ya ma mayɛlɛn ka ma bɔrɔbɔ. Anu ko, “Wo ye nfen kun na kɛ la? A sɔgɛ ye wo la, wo ni murutiya mansɛ ma, wa?”

²⁰N ya a fɔ wonu ye ko, “Arinyɛni-Tigi-Alla si a ma, ma ni kɛ laban. Ata wɔli-kɛlɛ le male la. Ma ye nala wɔlɛ le dabirala kɛ le gbɛ! Wo halala-fen sa yan, ado woleta fenfen sa Yerusalɛm wara-koe rɔ mumɛ!”