Read Kuranko Nihɛmaya 3 Bible Online

Nihɛmaya 3 - Kuranko bible

Nihɛmaya 3

¹Tarɛ sɔra nya min, wo le kɛ la. Saraka-Masɔla-Kun-Tigi-Wɛ Ilayasibu anubɛ a ta-nyɔgɔ saraka-masɔlɛnu, wonu ya tarɛ don-dɛ sɔ min tɔgɛ ko Sagɛ. Anu ya a dantɛgɛ Mari ma ka a don-dɛ latogon. Anu bara so-tarɛ ladan ka a bi kan-tina-layan-bɛ min tɔgɛ ko Kɛmɛ[3] ka ta ke kan-tina-layan-bɛ ma min tɔgɛ Hananɛli. Anu ya tarɛ wo sɔ-kurɛ-kɛ ka a dantɛgɛ.

²Yɛrikɔ kɛnu ya wonu tatugunnɛ sɔ. Imirila den Sakura ya Yɛrikɔ kɛ wonu tatugunnɛ sɔ.

³Haseneya kebilɛ, wonu denu ya tarɛ don-dɛ ladan min tɔgɛ Yɛgɛ. Wonu ya a kankan anubɛ a da-rasɔgɔ-fan bɛɛ ladan.

⁴Yurayala den Mɛrɛmoti, Hakɔsi mamanɛ, kɔni, wo le ya nyɔ-tatugunnɛ sɔ. Bɛrɛkayala den Mɛsulam, Mɛsɛsabɛli mamanɛ, kɔni, wo le ya nyɔ-tatugunnɛ sɔ. Beyanala den Sedoki ya nyɔ-tatugunnɛ sɔ.

⁵Tekoya kɛnu ya doi wo tatugunnɛ sɔ kɔnɔ Tekoya kun-tiginu ma anu sɛbɛ don ka wɔlɛ kɛ wɔli-tiginu kɔrɔ.

⁶Paseyala den Yoyada anubɛ Bɛsodeyala den Mɛsulam, wonu ya so-kɔrɛ tarɛ don-dɛ ladan min tɔgɛ Yɛsena. Wonu ya a kankan anubɛ a da-rasɔgɔ-fan bɛɛ ladan.

⁷Mɛlataya ka bɔ Kibiya soe burɔ anubɛ Yedon ka bɔ Mɛran soe burɔ anubɛ Kibiya so-burɔ-mɔgɛ toenu anubɛ Misipa so-burɔ-mɔgɛnu, wonu denu tara nyɔ-tatugunnɛ sɔla ha sigisɔn-mansɛ wola bɔn ma min bi Yufereti bɛ tele-yigi waralɛ kun na.

⁸Harihayala den Yusiyɛli min bi sɛnɛ-siyakiyɛ la, wo le ya nyɔ-tatugunnɛ sɔ. Hananaya min bi tulu-suma-diyamɛ ladanna, wo le ya nyɔ fanan tatugunnɛ sɔ ha kan tinɛ min tɔgɛ ko Tara-Da-Gbengbe-Wɛ.

⁹Hurila den Rɛfaya min bi kun-tigiyɛ la Yerusalɛm tɛngbɛnya do kun na, wo le ya nyɔ-tatugunnɛ sɔ.

¹⁰Harumafila den Yɛdaya, wo le ya ata bon-telentɛ tarɛ sɔ. Hasabinayala den Hatusi ya wo tatugunnɛ sɔ.

¹¹Harimla den Malakiya anubɛ Pehati-Mohabula den Hasubu, wonu denu ya nyɔ-tatugunnɛ sɔ anubɛ kan-tina-layan-bɛ min tɔgɔ Biredi Mintan Tinɛ.

¹²Halohɛsila den Salumu min bi Yerusalɛm tɛngbɛnya doi kun na, wonubɛ ala dunmusinu ya nyɔ-tatugunnɛ sɔ.

¹³Henɔn anubɛ Sanowa kɛnu ya tarɛ don-dɛ ladan min tɔgɛ ko Lɛɛ. Wonu ya a kankan anubɛ a da-rasɔgɔ-fan bɛɛ ladan. Wo kɔma, anu ya tarɛ min sɔ, ala yanyɛ nunkan-nya waga kelen. Wo le ye tala fɔɔ don-dɛ min tɔgɛ ko Nyɛ-Rawuya don-dɛ.

¹⁴Rekabula den Malakiya min bi Bɛti-Hakɛram tɛngbɛnya kun na, wo le ya Nyɛ-Rawuya don-dɛ ladan. Wo ya a kankan anubɛ a da-rasɔgɔ-fan bɛɛ ladan.

¹⁵Kalihosela den Salumu min bi Misipa tɛngbɛnya kun na, tarɛ don-dɛ min tɔgɛ ko Tenke, wo le ya nyɔ ladan. A ya don-dɛ wo kumɛ tuwa ka a kankan anubɛ a da-rasɔgɔ-fan bɛɛ ladan. Yi sigi tinɛ a rɔ min tɔgɛ Sela, ale Salumu ya nyɔ-tarɛ ladan fanan min bi mansɛla lu-kɔndɔ-kinyanɛ dafɛ. A tara a ladanna ha kilɛ min bi yigila ka bɔ Mansa Dawuda halala-soe burɔ.

¹⁶Asibukila den Nihɛmaya min bi Bɛti-Suri tɛngbɛnya do kun na, wo le ya a bi nyɔ ka ta tarɛ sɔla ha Mansa Dawudata kaburu-soe telen tɔ anubɛ nyɔ-yi-sigi tinɛ-a-rɔ anubɛ kɛlɛ-dannuta bɔn ye kan min.

¹⁷Tarɛ min tugunnɛ doi kɛ la, Lifayi minnu ya wo sɔ, wonu tɔgɛ le kɛnu na. Banila den Rihum, wo le ya nyɔ-tatugunnɛ sɔ. Hasabaya min bi Kiyaila tɛngbɛnya do kun na, wo le ya nyɔ-tatugunnɛ sɔ ala mɔgɛnu tɔgɔ rɔ.

¹⁸Hɛnadadila den Bafeyi, min bi Kiyaila tɛngbɛnya doi kun na, wo le ya nyɔ-tatugunnɛ sɔ.

¹⁹Yɛsuwala den Ɛsɛri min bi Misipa so-kun-tigiyɛ la, wo le ya nyɔ-tatugunnɛ sɔ ka a dabira kɛlɛ-mirannu namara tinɛ ma ha tarɛ wo radu tinɛ a tonke ma.

²⁰Sabeyayila den Baruki, wo le ya nyɔ-tatugunnɛ sɔ ha Saraka-Masɔla-Kun-Tigi-Wɛ Ilayasibuta bonda-dɛ telen tɔ.

²¹Yurayala den Mɛrɛmoti, Hakɔsi mamanɛ, kɔni, wo le ya nyɔ-tatugunnɛ sɔ tun ha ka tenbi saraka-masɔla-wɛta bɔn-sigi-rakɛnyɛ la.

²²Tarɛ min tugunnɛ doi kɛ la, saraka-masɔlɛ minnu ya wo sɔ, wonu tɔgɛ le kɛnu na. Saraka-masɔlɛ minnu bi Yerusalɛm soela foolɛ rɔ, wonu denu ya doi wonu tatugunnɛ sɔ.

²³Bɛnyamɛ anubɛ Hasubu, wonu denu ya nyɔ-tatugunnɛ sɔ, anuna bon-telentɛ, kɔni. Meyaseyala den Asaraya, Ananaya mamanɛ, kɔni, wo le ya ata bon-telentɛ sɔ.

²⁴Hɛnadadila den Binuwai, wo le ya nyɔ-tatugunnɛ sɔ ka a bi Asarayatɛ dan ma ha tarɛ tonke.

²⁵Yusayila den Pelali, wo le ya nyɔ-tatugunnɛ sɔ ka a bi tonke wo ma, kan-tina-layan-bɛ ye kan min mansɛla-bolon-kantɔtɛ dafɛ. Nyɔ ye kandannɛnuta lu-kole dafɛ fanan. Parɔsila den Pɛdaya,

²⁶wo le ya nyɔ-tatugunnɛ sɔ ha soe tele-bɔɛ warala-dɛ min tɔgɛ ko Yi anubɛ kan-tina-layan-bɛ, anu si Bato-Bɔn kandan min na. (Wo ye soe kan tinɛ do wara la le anu bi min kelela ko Ofɛli, Bato-Bonna-wɔli-kɛlɛnu siginɛ kan min, kɔni, ado wɔli-kɛlɛ wonu ya a dɛnbɛ.)

²⁷Tekoya kɛnu ya nyɔ-tatugunnɛ tarɛ kan tinɛ min sɔ tun, wo le ya a dabira kan-tina-layan-bɛ ma anu si Bato-Bɔn kandan min na ha ka ta ke Bato-Bonna-wɔli-kɛlɛnuna luyi dan ma min tɔgɛ ko Ofɛli.

²⁸Saraka-masɔlɛ donu ya nyɔ-tatugunnɛ sɔ ha tarɛ don-dɛ min tɔgɛ ko Soee. Bɛɛ ya ata bon-telentɛ sɔ.

²⁹Imɛrila den Sedoki, wo le ya nyɔ-tatugunnɛ sɔ, ata bon-telentɛ, kɔni. Sɛkanayala den Sɛmaya, min bi tarɛ dɛ makandanna min tɔgɛ ko Tele-Bɔɛ Don-Dɛ, wo le ya nyɔ-tatugunnɛ sɔ.

³⁰Sɛlimayala den Hananaya anubɛ Selafila den-kei wɔrɔ nyɔgɛ Henɔn, wonu ya nyɔ-tatugunnɛ sɔ tun fanan, ado anuta wɔli-kɛ-tina fila nyɔgɛ le wo la. Bɛrɛkayala den Mɛsulam, wo le ya nyɔ-tatugunnɛ sɔ, ata bon-telentɛ, kɔni.

³¹Malakiya min bi sɛnɛ-siyakiyɛ la, wo le ya nyɔ-tatugunnɛ sɔ ha Bato-Bon-nawɔlilɛnu anubɛ yilanu siginɛ kan min. Nyɔ ye tarɛ don-dɛ wara la min tɔgɛ Mifikadi. Nyɔ fanan bi konko dafɛ san ma kantɔ tonke da la.

³²Sɛnɛ-siyakinu anubɛ yilanu, wonu ya nyɔ-tatugunnɛ laban sɔ ka a dabira konko wo ma ha ka ke don-dɛ ma min tɔgɛ ko Sagɛ.