Read Kuranko Nihɛmaya 5 Bible Online

Nihɛmaya 5 - Kuranko bible

Nihɛmaya 5

¹Wati tenbinɛ, keinu wo, musinu wo, anubɛ mɔgɔ-siyaman donta masigima-kan-fɔɛ rɔ ka a bɛn anu ta-nyɔgɛ Yahudiyanu ma.

²Donu bi a fɔla ko, “Mala denbayɛnu siya, ado dɔn-fen-koe ma a bɔ ma bolo.”

³Donu fanan bi a fɔla ko, “Fɔ ma ya mala wɔli-kɛ-tinɛnu anubɛ mala bɔnnu sigi tulumɛ le la alako ma ni dɔn-fan donu sɔrɔn min si a ma, ma ti faga kɔnkɔ-fitinɛ bolo.”

⁴Donu bi a fɔla ko, “Fɔ ma ara wodinu denu dɔndɔ ma ta-nyɔgɛnu ma ka wo ma mansɛla duti-sarɛ la mala wɔli-kɛ-tinɛnuna ko la.

⁵Yanni ma ni duti wonu yili-sarɛ sɔrɔn, fɔ ma wa mala dannu denu mayira ka wonu ma yɔɔnnu na, ado male donu bara ban mala dunmusinu mayirala. Ma ti ke ko-wo-ko nɔla tun yigi-tɛgɛ bolo bawo mala wɔli-kɛ-tinɛnu bi gbaran rɔ. Yele kelen de male Yahudiyanu na wona. Anuna dannu kin matɛnu ko, wa?”

⁶N ya masigima-kan wo lamɔɛn anu bolo min kɛ, n yisi bɔra dɔgɔma-ma-de!

⁷ N ya n miri a kɔrɛ ma tumɛ min, n ya kun-tiginu anubɛ mɔgɔ-banu makuma. N ko, “Wo ara a lagbɛlɛya wo na-kelen-nyɔgɛnu kuma.” Wo le ya a ma, n ya nyama kundɛn kan-tina-kelen ka ko-rabɛn-kɛ.

⁸N ya a fɔ anu ye ko, “Ma ara ma raya nun ka ma na-kelen-nyɔgɛnu kunka sibolo-gbɛrɛnu bolo. Kɔnɔ kaka, wo ye wo na-kelen-nyɔgɛ Yahudiyanu fɔrɔsɛla ka anu nyɔgɔn mayira wo ma.” Kun-tiginu ya a sigi-a-la don! Anu ma ke fenfen fɔla.

⁹Wo kɔma, n ya a fɔ anu ye ko, “Wo ye min kun na, wo ma telen. Wo ni Alla sako kɛ ka ko-telennɛ ma. Wo si a ma, sibolo-gbɛrɛnu ti ma mayɛlɛn-kunya sɔrɔn.

¹⁰Hali mabɛ ma ta-nyɔgɛ anubɛ anuna wɔli-kɛlɛnu, male fanan bara yili don nun. Kɔnɔ koe min bɛɛ ara tenbi, ma nyina wo dama ko wona.

¹¹A wodi-yili wo, a dɔn-fen-yili wo, a minni-fen-yili wo, a tulu-yili wo, ma ni nyina wo dama ko ka tɔn sigi wo la. Ma ni tulumɛ bɛɛ lasɛgi a tigi ma. A mara a wɔli kɛ tina la wo, a mara a ki-fen na wo, a mara a bon na wo, wo bɛɛ ni sɛgi a tigi ma bi.”

¹²Kun-tiginu ya a fɔ ko, “Ma si a ma iko i wara a fɔ nya min. Ma si bɛɛ bolo-fan lasɛgi a ma, ado ma ti wodi makele anu bolo tun!” N ya saraka-masɔlɛnu kele alako kun-tiginu ni anu nyɛrɛ lasɛ anu kuman-kan wola ko la.

¹³N ya n butɛ-kiri-fan ragbɔngbɔn. N ya a fɔ anu ye ko, “Ni min ma kumɛ kɛ latɔnbagaya, Alla ye wo tigi fanan tagbɔn-gbɔnna ka le. Alla si wo tigila bɔn anubɛ a bolo-fan mumɛ bɛɛ toronde a la ka a to sigini gboka!” Min bɛɛ taranta nyɔ rɔ wonu ko, “Amina!” Wo kɔma, wonu ya Alla tanto. Anu damasi ya anu kan wo latɔnbagaya.

¹⁴Ka a bi Atasakasila mansayɛ san mogan ma ha ka a sigi a san bi-sawa ani san fila nyɔgɛ la, nde, Nihɛmaya ye kun-tigiyɛ la Yuda nyamanɛ rɔ. San tan-ni-filɛ kɛ kɔrɔ, mabɛ n na-kelen-nyɔgɛnu ma dɔn-fen wo dɔn-fen dɔn bɛ, a bɛnta, kun-tigi ni min dɔn.

¹⁵Kun-tigi minnu bi yan nun kɔrɔma la, wonu taranta a lagbɛlɛyala mɔgɛnu kuma. Tele-wo-tele, mɔgɛnu bi wodi-gbɛ-gbu bi-nani bɔla ka wo sa kun-tigila dɔn-fen anubɛ minni-fen kuma. Hali anuna wɔli-kɛlɛnu, wonu bi mɔgɛnu tɔrɔla. Kɔnɔ bawo nde ye Alla gbiliyala, n ma a ma iko kun-tigi wonu.

¹⁶N ya n fanka ban tara-sɔ-ko-wɔlɛ la. N ma n sɛbɛ don n halala-ko ma. Hali nna bonna-wɔli-kɛlɛnu, wonu kofura n ma tara sɔ tinɛ.

¹⁷Tele-wo-tele, n bi Yahudiya mɔgɔ kɛmɛ ani mɔgɔ bi-loli anubɛ anuna kun-tiginu de-nyinina n barɛ. Kumanato, minnu bi nala n bara ka bɔ nyamani-gbɛrɛkɛnu tɔ mala foolɛ rɔ.

¹⁸Tele-wo-tele, n si tura kelen, saga-hakika wɔrɔ ani sisi-siyaman faga mɔgɛnu ye. Tele-tan wo tele-tan, n si na minni-fen-kurɛ la anu ye. A bɛnta, kun-tigi ni min nyɔgɔn sɔrɔn, n ma wo makele mɔgɛnu na bawo dunɛ kolo anu kuma.

¹⁹E, Alla, i yandi, n bara koe min bɛɛsi kɛ mɔgɛ kɛnu ye, a ma, n ni wo barayi sɔrɔn yarɔ.