Read Kuranko Ɛsita 6 Bible Online

Ɛsita 6 - Kuranko bible

Ɛsita 6

¹Suyi wo nyɛrɛ rɔ, mansɛ ma a sa a yɛ ma. Woletɔ a ya nyamanɛ ko-kɔrɔta-karan-buku makele alako anu ni wo karan a ye.

² A ya a taran buku wo rɔ ko Bigitan anubɛ Tirɛsa ya gbundu kiri ale mansɛ faga-koe ma, Mɔdekɛyai ya wo labɔ gbɛ rɔ. Mansɛla bonda-da-makandannɛ le wonu mɔgɔ filɛ la nun.

³Mansɛ ya kɛdi wo karannɛ manyinika ko, “Mɔdekɛyai kɛ ara tɔnɛ nyamintan sɔrɔn ala wɔli-nyimɛ kɛla ko la?” Ala wɔli-kɛlɛnu ya a fɔ a ye ko, “Ko-wo-ko ma kɛ wɛ Mɔdekɛyai ye.”

⁴Mansɛ ya anu manyinika ko, “Nna mɔgɔ-ba do ye bolɔn la yan kaka, wa?” Wo ya a taran, Heman don sansan bolɔn la. A ara na Mɔdekɛyai dun-koe fɔ tinɛ mansɛ ye.

⁵Mansɛla wɔli-kɛlɛnu ya a fɔ a ye ko, “Ɔn, i yen-sɔgɛ ye Heman na.” Mansɛ ko, “Wo ni a fɔ a ye ko a ni don.”

⁶Heman donnɛ, mansɛ ya a manyinika ko, “Mɔgɛ do ye n yala a bɛnta, n ni min gbiliya-belebele-wɛ kɛ. N si nfen ma wo tigi ye?” Heman ya a miri ko a ma bɛn, mɔgɔ-gbɛrɛkɛ ni gbiliya sufa wo sɔrɔn ni ale ma.

⁷A ya a fɔ mansɛ ye ko, “I ye min mala gbɛ, i ni i nyɛrɛta mansaya-duruki don wo tigi kan na. A fɔ anu ye ko anu ni ila mansaya-miran do sa ila mansaya-soee kunyɛ ma.

⁹Wo kɔma, i ni ila mɔgɔ-ba do sɔ soee wo yarɔ, kei kɛ ye sigila min na ila mansaya-duruki ye a kan na. Mɔgɔ-ba wo ni ta a la soe tɛma ka ala ko fɔ mɔgɛnu ye. A ni to a fɔla ko, ‘Ni a bɛnta, mansɛ ni min gbiliya-belebele-wɛ kɛ, a si a ma a ye ka le.’ ”

¹⁰Mansɛ ya a fɔ ale Heman ye ko, “I buri tala nna duruku-ba anubɛ nna soee bila. I ni a ma Mɔdekɛyai Yahudiya ye iko i wara a fɔ nya min kɛ la. I si a taran sigini bolon-don-dɛ la.”

¹¹Nba, Heman tara mansɛla duruku-ba anubɛ soee bi. A ya duruku-ba don Mɔdekɛyai kan na. A ya Mɔdekɛyai sigi soee la. Ale Heman sɔra a yarɔ ka ta a la soe tɛma. A ye tala a fɔla ko, “Ni a bɛnta, mansɛ ni min gbiliya-belebele-wɛ kɛ, a si a ma a ye ka le.”

¹²Heman ban kɛ mala, Mɔdekɛyai sɛgira a gbɛ rɔ bolon-don-dɛ la. Kɔnɔ Heman kun-nayiginɛ burimatoe sɛgira a warɛ bɔn la yisi-magboyɛ anubɛ miliyɛ la a bolo.

¹³A tara a dantɛgɛ ala musi anubɛ a diyana-mɔgɛnu ye. Ala musi anubɛ a diyana-mɔgɛnu ya a fɔ a ye ko, “I wara fɔlɔla foola Mɔdekɛyai kɛ la le kɛ la, ado Yahudiya le ale la. I don ti a nɔ mumɛ!”

¹⁴Anu bi kumɛ wo kun na tumɛ min, mansa-makandannɛnu kera ka ta Heman na Ɛsita warɛ fen dɔn tinɛ tiriya!