Read Kuranko Bɔ-Koe-Iyipiti 10 Bible Online

Bɔ-Koe-Iyipiti 10 - Kuranko bible

Bɔ-Koe-Iyipiti 10

¹(8) Kondɔnnu Wara-Koe Mari ya a fɔ Musa ye ko, “Ta Iyipiti mansɛ wara kamasɔrɔn n bara ale anubɛ ala mɔgɔ-banu yisi gbɛlɛya alako n si nta kabana-koe kɛnu mayira anu tɛma nya min.

²N bara ko-gbɛlɛmɛ minnu nana Iyipiti mɔgɛnu kuma ka anu kumakɔ nya min, wole si to wo fɔla wola dannu anubɛ wo mamanɛnu ye. Woletɔ wo damasi ni a lɔn ko Mari le nde la.”

³Musa anubɛ Aruna tara mansɛ wara ka a fɔ a ye ko, “Hiburunuta Mari Alla ya a fɔ ko ile si i nyɛrɛ famayigi ale ye wati mintan? I ni ata mɔgɛ kɛnu boloka alako anu ni ta a bato tinɛ.

⁴Ni i ya i ban ata mɔgɛnu boloka-koe ma, sina a si kondɔnnu nana ila nyamanɛ rɔ.

⁵Wonu si siyaya ka dugi kumafin ha mɔgɛnu ti ke ka dugu-kole yen tun. Anu si siyaya hali wo benbanu benbɛnu ma min nyɔgɛ yen bɛ kebi duninya danta wati min. Banda-kole ya ki-fan minnu to, kondɔnnu si wo dama dɔn, hali yanba-kunyɛ minnu bi ila dugi rɔ. Kondɔn wonu si ila bɔnnu anubɛ ila mɔgɔ-banuna bɔnnu nafa hali ila nyamanita-mɔgɛnuna bɔnnu.” Musa ya a bɔ ale mansɛ dafɛ ka ta a ye.

⁷Mansɛla mɔgɔ-banu ya a fɔ ale mansɛ ye ko, “Kei kɛ si a fara gbɛrɛ lasigila ma ye tumɛ mintan? A fisa, i ni mɔgɛ kɛnu boloka alako anu ni ta anuta Mari Alla bato tinɛ. Ile ma a lɔn fɔlɔn ko Iyipiti nyamanɛ ara ban tinyana?”

⁸Anu nara Musa anubɛ Aruna la mansɛ wara tun. Mansɛ ya a fɔ anu ye ko, “Awa, wo ta wola Mari Alla bato tinɛ. Kɔnɔ yonnu bi tala gben, wo fɔ n ye.”

⁹Musa ya a fɔ ko, “Isirɛla mɔgɛ bɛɛsi le tala, kina wo, denni wo, anubɛ mala kolo-fannu, ma damasi le tala mata Mari Alla bato tinɛ ka ladiyɛ kɛ ale ye.”

¹⁰Ale mansɛ ya a fɔ anu ye ko, “Ni wobɛ wola denbayɛnu kera tala, alamɛ Alla tora wo fɛ kɔnɔ wo ni a lɔn ko nde ti sɔn wola musinu anubɛ wola dannu boloka-koe ma muk! Wo ye yanfanteyɛ min sigila n ma, wo ye gbɛ le tɔ.

¹¹N ti sɔn wo ma! Ni wo ye nyinina wota Mari bato-koe le ma, keinu dɔrɔn ni ta.” Anu ya Musa anubɛ Aruna gben ale mansɛ yakɔrɔ.

¹²Mari ya a fɔ Musa ye ko, “I bole rasagan Iyipiti nyamanɛ kuma alako kondɔnnu ni na Iyipiti nyamanɛ rɔ. Anu si na nyamanɛ kɛ ki-fan bɛɛsi dɔn, banda-kole ya minnu to, kɔni.”

¹³Musa ya ala sewuri rasagan Iyipiti nyamanɛ kuma. Mari ya fɔnyɔ do lana Iyipiti kuma ka bɔ tele-bɔɛ wara la. Fɔnyɔ telenta nala gben, a kira nala kudu! Wo banda kɛ sɔgɔma, anu tɛrɛnara kondɔn siyamɛnu na anu kuma, fɔnyɔ wo nara minnu na a bolo.

¹⁴ Kondɔn wonu tugura Iyipiti kan tinɛ bɛɛ kun na. Kebi fɔlɔ wo nyɔgɔn kondɔn ma na bɛ nun, ado wo nyɔgɔn ti na tun.

¹⁵Anu ya dugi bɛɛsi kumafin siyayɛ bolo. Anu ya nyɔ ki-fan anubɛ yanba-kunyɛ bɛɛsi dɔn banda-kole ya minnu to nun. Hali yanba-kun kelan ma to Iyipiti nyamanɛ wo fenfen tɔ.

¹⁶Ale mansɛ ya Musa anubɛ Aruna kele tiriya! A ko, “N bara bila wole la hali wota Mari Alla.

¹⁷Woletɔ wo yandi, wo ni wo hakɛ to n ye tun ka wola Mari Alla madiya n ye. A ni kasarɛ kɛnu bɔ n kuma.”

¹⁸Musa ya a bɔ ale mansɛ dafɛ ka Mari madiya.

¹⁹Mari ya fɔn-belebele do labɔ tele-yigi wara la. Fɔnyɔ wo ya kondɔn wonu bi ka anu nafili Kɔgɔ-Yi-Wulan rɔ. Hali kondɔn wo kelen ma to Iyipiti nyamanɛ rɔ.

²⁰Kɔnɔ Mari ya ale mansɛ yisi gbɛlɛya. A ma sɔn Isirɛla mɔgɛnu boloka-koe ma. (9) Pinpi Wara-Koe

²¹Mari ya a fɔ Musa ye tun ko, “I bole rasagan san ma alako pinpi ni burun Iyipiti nyamanɛ rɔ bɛff, mɔgɔ ti sisi pinpi min na, kɔni.”

²² Musa ya a bole rasagan san ma. Tele sawa, pinpi-fin-bɛ burunnɛ Iyipiti nyamanɛ bɛɛsi kuma bɛff.

²³Anu ma ke anu nyɔgɔn yenna mumɛ! Tele sawa, anu fen-bo-fen ma ke bɔla da la. Kɔnɔ Isirɛla mɔgɛnu siginɛ kan min, pinpi ma dun nyɔ muk!

²⁴Ale mansɛ ya Musa kele tun. A ko, “Awa, n bara sɔn wo ni ta wola denbayɛnu na wo bolo wota Mari bato tinɛ kɔnɔ n ti sɔn wo ni ta wola sagɛnu anubɛ wola ninkinu na wo bolo.”

²⁵Musa ko, “Nba, Mansɛ, ni a ye wo nya le, ma si minnu ma saraka-mintantɛ anubɛ saraka doinu na mata Mari Alla ye, ile ni wonu don ma bolo.

²⁶Kɔnɔ a gbuyɛ, fɔ malela kolo-fannu ba ta ma fɛ. Hali maleta kolo-fen kelan, ma ti wo to ma kɔma kilɛ la kamasɔrɔn ma si donu bi wonu tɔ ka anu ma sarakɛnu na mata Mari Alla ye. Ma ma a lɔn ni ma si minnu ma sarakɛ la kɛnu tɔ ma Mari ye ha ma ni ke nyɔ tumɛ min.”

²⁷Kɔnɔ Mari ya ale mansɛ yisi gbɛlɛya. A ma sɔn anu boloka-koe ma.

²⁸Ale mansɛ ya a fɔ a ye ko, “I bɔ n yakɔrɔ. A ma i fɛrɛma i nyɛrɛla ko la. Ni ma ya-den filɛ labɛnta tumɛ min, i si faga wulɔn.”

²⁹Musa ya a yabi ko, “Ale le wo la. Male mɔgɔ filɛ ya-den filɛ la ti bɛn tun.”