Read Kuranko Bɔ-Koe-Iyipiti 12 Bible Online

Bɔ-Koe-Iyipiti 12 - Kuranko bible

Bɔ-Koe-Iyipiti 12

¹ Mari ya a fɔ Musa anubɛ Aruna ye Iyipiti nyamanɛ rɔ ko,

²“Ka a dabira bi ma, karɛ kɛ[10] si ma wola san karɛ fɔlɛ la.

³Wo ni a fɔ Isirɛla mɔgɛ bɛɛ ye ko karɛ kɛ tele tan ma, denbaya-tigi bɛɛsi ni saga-dan, ni wo ma, baa-dan bira anu nyɛrɛ ye iko anuna kebilɛ kolo nya min. Denbaya-tigi kelen-kelan bɛɛsi ni kolo-fen kelen-kelen bi.

⁴Ni denbayɛ minnu ma siya, ado anu gbansan ti ke saga-dan wo banna, anu si anu sigi-nyɔgɛ do kofu anu ma. Anu si kolo-fan faga iko anu kelen-kelennamɛ-bɛɛ si ke min dɔnna wulɔn su kelan rɔ ka a ban.

⁵Anu ni san kelen kolo-fannu yabɔ fɛɛ sa minnu na, a saga wo, a baa wo.

⁶Karɛ kɛ tele tan-ni-nanɛ ma, Isirɛla mɔgɛ bɛɛ ni atɛ faga wurɛ la.

⁷Anu si kolo-fan wonu dɔn bɔn minnu na, anu ni kolo-fan wonu yele do bi ka a susa bonda-dɛ tɔnkɔn filɛ ma anubɛ dɛ kumɛ.

⁸Anu si soge wonu mintan ka anubɛ yanba-kun-kunanɛ donu dɔn anubɛ biredi-yɛlɛbɛlɛ suyi wo nyɛrɛ rɔ.

⁹Anu kana a kuran dɔn. Anu kana a tenɛ dɔn fɔ ka anu mintan. A kunyɛ anubɛ a kiannu anubɛ a burɔ-fan bɛɛsi ni mintan gburr!

¹⁰Yanni wo ni a dɔn, wo ni wola duruku-ba-wɛnu mayɛlɛ tagama-koe la, ka wola sanbarɛnu don wo kian rɔ. Wo ni wola sewuri bi. Wo tenbi soge dɔnna tumɛ min, wo ni wo lakaliya. Wo kana a toenu namara ha sɔgɔma. Kɔnɔ ni mintɛ toe kira, anu kana wo dɔn tun fɔ ka wonu mintan gburr! Nde, Marita Kanan-Ko-Ladiyɛ[11] le kɛ la.”

¹¹

¹²Mari ko tun, “N si tenbi Iyipiti nyamanɛ rɔ wulɔn suyi nyɛrɛ rɔ ka Iyipiti mɔgɛnuna den-kei-sarɛnu faga anubɛ anuna kolo-fen den fɔlɔtɛnu, a keimɛnu, kɔni. Nde le Mari la, min si Iyipiti bɛsɛ wara-koe halaki.

¹³Yele susanɛ bɔn minnu dɛ ma, yele wonu si ma tamasere la. Ni n ya tamasere wo yen bɔn minnu dɛ ma, n bi nta fitinɛ min nanala Iyipiti kɛnu ma, wo ti ke nyɔ.

¹⁴ Wo si to wo mirila tele kɛ ma. San-bo-san, wo si tele kɛ ma ladɛn-tele la nde, Mari ye, ka to kɛ mala habadan!”

¹⁵Mari ko tun, “San-bo-san, wo ni to biredi-yɛlɛbɛlɛ dɔnna tele wɔrɔnfila kɔrɔ. Wo ni isiti labɔ wola bɔnnu na a tele fɔlɛ ma. Ka a bɔ tele fɔlɛ wo ma ha ka ke a tele wɔrɔnfila nyɔgɛ ma, min ba biredi-yɛlɛnɛ dɔn, wo tigi si bɔ Isirɛla mɔgɛnu kurun tɔ.

¹⁶A tele fɔlɔtɛ anubɛ a tele wɔrɔnfila nyɔgɛ ma, wo ni ladɛn kɛ ka nde, Mari bato. Wo kana wɔli mumɛ kɛ tele wonu ma fɔ dɔn-fen rabɛn-ko-wɔlɛnu, wo si wo le dɔrɔn ma.

¹⁷“Wo ni Biredi-Yɛlɛbɛlɛ wo Dɔn-Ladɛn kɛ bawo n bi wo bɔnsɔnnu nabɔla Iyipiti nyamanɛ rɔ tele wo nyɛrɛ le ma. Woletɔ san-bo-san, wo kebilɛnu anubɛ wo kegeyɛnu si tele wo bira ka a ma tele-sɛnimɛ la.

¹⁸Karɛ fɔlɛ kɛ, tele tan-ni-nanɛ wurɛ la, wo si to biredi-yɛlɛbɛlɛ dɔnna ha a tele mogan-ni-kelan wurɛ la.

¹⁹Wo kana isiti-wo-isiti lamara wola bɔnnu na tele wɔrɔnfilɛ wo kɔrɔ. Ni min ya wo dɔn, wo ni wo tigi bɔ wo kurun tɔ, a mara sundan na wo, a mara duguran na wo.

²⁰Wo kana biredi dɔn wo wati rɔ isiti ye min tɔ. Ni karɛ kɛ ya wo taran kan-bo-kan, wo ni to Biredi-Yɛlɛbɛlɛ wo Dɔn-Ladɛn kɛla.”

²¹Musa ya Isirɛla mɔgɔ-ba damasi kele ka a fɔ anu ye ko, “Mari ko denbaya-tigi bɛɛ ni saga-den kelen-kelen bi ka anu faga Kanan-Ko-Ladiyɛ kuma wola denbayɛnu ye, ni wo ma, baa-dan.

²²Kɔlɔma min tɔgɛ hisɔpu, wo ni wo bolɔn donu bi. Wo ya kolo-fen-yele minnu kɛ mirannu tɔ, wo ni hisɔpu bolɔn wonu bi ka anu nayigi yele wo rɔ ka a susa bonda-dɛ tɔnkɔn filɛ ma anubɛ dɛ kumɛ. Mɔgɔ-wo-mɔgɔ kana bɔ bɔn la ha sɔgɔma.

²³ Mari si tenbi Iyipiti nyamanɛ rɔ Iyipiti kɛnuna den-kei-sarɛnu halaki koe la suyi wo rɔ. Ni a ya yele yen bɔn minnu dɛ tɔnkɔn filɛ ma anubɛ a kumɛ, Mari si tenbi bɔn wonu kun na. A ti sɔn ko niyi-bilɛ ni ke bɔn wonu na.

²⁴“Wole anubɛ wo bɔnsɔnnu ni to kɛ mala tolon. A ni ma tɔn la anu bolo.

²⁵Mari ya lanyiri kiri wo ye nyamanɛ minna ko la, wo wa ke nyɔ tumɛ min, wo ni ladɛn kɛ dabira ka a ma tɔn la wo bolo nyɔ.

²⁶Ni wola dannu ya ladɛn kɛ kɔrɛ manyinika wo la,

²⁷wo ni a fɔ anu ye wo rɔ ko, ‘Wo tumɛ ma ye Iyipiti nyamanɛ rɔ, Mari ya Iyipiti kɛnu halaki kɔnɔ a ya male lakanan nyamanɛ wo rɔ. Woletɔ ma ye Kanan-Ko-Ladiyɛ kɛ kɛla san-bo-san ka sarakɛ bɔ mata Mari Alla ye.’ ” Mɔgɛnu ya anu madu dugi ma ka madiyali kɛ.

²⁸Musa banta kɛ fɔla nya min wo, Isirɛla mɔgɛnu ya a dabira ka a ma iko Mari ya a fɔ Musa anubɛ Aruna ye nya min.

²⁹ Mari ya den-kei-sarɛ bɛɛsi faga suyi tɛma Iyipiti nyamanɛ rɔ. Sayɛ ya a dabira ale mansɛla den-kei-sarɛ ma ha ka ta a sigi yelela-mɔgɛnuna den-kei-sarɛnu ma hali ka ke kolo-fannuna den fɔlɔtɛ bɛɛ ma, a keimɛnu, kɔni.

³⁰Di-kɛ-kan bɔra Iyipiti nyamanɛ kan tinɛ bɛɛ rɔ min kɛ, mansɛ anubɛ ala mɔgɔ-banu anubɛ Iyipiti nyamanita-mɔgɛ bɛɛ ya anu kunden suyi wo rɔ. Bon-wo-bon ma to, mɔgɔ ma faga kan min.

³¹Mansɛ ya kilayɛnu nata Musa anubɛ Aruna ma suyi wo nyɛrɛ rɔ. Ale mansɛ ko, “Wo wuli ka bɔ nna mɔgɛnu tɛma, wobɛ wola mɔgɛnu, ka ta Mari bato iko wo ara a fɔ nya min.

³²Wo ni wola kolo-fannu fanan bi iko wo ara a fɔ nya min. Wo kana nyina ka duwa nde ye.”

³³Iyipiti keinu gbaranta Isirɛla mɔgɛnu na alako anu ni bɔ Iyipiti nyamanɛ rɔ tiriya bawo anu ko, “Ni kɛnu ma bɔ yan, ma bɛɛ si faga.”

³⁴Isirɛla mɔgɛnu ya anuna biredinu bi isiti sa min tɔ ka a sa anuna biredi-ramaga-mirannu tɔ. Anu ya wonu nakiri kurɛnu tɔ ka anu sigi anu kan ma.

³⁵ Isirɛla mɔgɛnu ya a ma iko Musa ya a fɔ anu ye nya min. Anu tara sɛnɛ anubɛ wodi-gbɛ anubɛ fɛrɛya-bɔɛnu matara Iyipiti kɛnu ma.

³⁶Mari ya a ma, Iyipiti mɔgɛnu ya Isirɛla mɔgɛnu gbiliya. Woletɔ Isirɛla mɔgɛnu ya fen minnu matara Iyipiti mɔgɛnu ma, anu ya wonu di anu ma. Anu ya Iyipiti kɛnu bolo-kolonya feufeu!

³⁷Isirɛla mɔgɛ minnu bɔra tagamana Ramɛsisi soe burɔ ka ta ke Sukɔti soe ma, wonu yatɛ bɛnta mɔgɔ waga kɛmɛ wɔrɔ (600,000) ma kɔnɔ anu ma musinu anubɛ dennɛnu dan.

³⁸Sibolo-gbɛrɛkɛ-mɔgɛ donu basanta anu na ta tinɛ. Anu tara anuna kolo-fannu na anu bolo.

³⁹Anu tenbi anuna kila-fandɛnu tela kan min, anu si anuna dɛgɛ wonu mintan nyɔ isiti sa min tɔ. Anu burimatoe bɔra Iyipiti nyamanɛ rɔ min kɛ, woletɔ anu ma fɛrɛ sɔrɔn ka isiti kɛ anuna dɛgɛ lamunnɛ wo rɔ hali ka dɔn-fen-gbɛrɛkɛ rabɛn anu nyɛrɛ ye.

⁴⁰ Nba, Isirɛla mɔgɛnu ya san kɛmɛ nani anubɛ san bi-sawa (430) le bɔ Iyipiti nyamanɛ rɔ.

⁴¹A san bi-sawa nyɔgɛ wo tele laban ma yɔ, anu ya Iyipiti nyamanɛ boloka wulɔn le.

⁴²Anu ya anu hɛnkili to wo suyi ko bawo Mari ya anu nabɔ Iyipiti nyamanɛ rɔ ka a fonde to ata mɔgɛ wonu ko suyi wo nyɛrɛ rɔ. Suyi wo nyɛrɛ rɔ, Mari kira anu kumafɛlɛnna ha anu damasi banta bɔla Iyipiti nyamanɛ rɔ. Woletɔ san-bo-san, Isirɛla mɔgɛnu si ki anu ya la tele wo nyɛrɛ suyi rɔ.

⁴³Mari ya a fɔ Musa anubɛ Aruna ye ko Kanan-Ko-Ladiyɛ tɔn le kɛnu na. “Sibolo-gbɛrɛkɛ-mɔgɛ minnu basannɛ wo la, wonu do-wo-do kana Kanan-Ko-Ladiyɛ dɔn-fan wonu dɔn.

⁴⁴“Wo ye yɔɔn minnu sanna, wo wa wonu nakemininya tumɛ min, wonu ni na to a dɔnna.

⁴⁵“Tenbi-sundannu anubɛ wola wɔli-kɛlɛnu, wonu fenfen kana a dɔn.

⁴⁶ “Bɛɛ ni atɛ dɔn ata bɔn la. Mɔgɔ-wo-mɔgɔ kana ata sogo-mintannɛ wo labɔ luyi ma. “Min tenbi ata soge dɔnna, a kana a kole rakeri.

⁴⁷“Isirɛla mɔgɔ-wo-mɔgɔ kana a kunyɛ bɔ Kanan-Ko-Ladiyɛ kɛ kɔrɔ.

⁴⁸“Sundan min siginɛ wo tɛma, ni a sɔgɛ ye a la ka kofu wo ma Kanan-Ko-Ladiyɛ kɛ tinɛ, fɔ wo tigi ni keinu nakemininya minnu bi ala bɔn la. Wo kɔma, wo si sundan wo bira iko wo na-kelen-nyɔgɛ. Kei min ma kemininya, wo kana a dɔn.

⁴⁹Kemininya-koe kɛ, a ye dugurannu anubɛ sundannu denu kuma. A sa mɔgɔ kelen kuma.”

⁵⁰Isirɛla mɔgɛnu ya wo bɛɛsi ma iko Mari ya a fɔ Musa anubɛ Aruna ye nya min.

⁵¹Wo tele nyɛrɛ rɔ, Mari ya Isirɛla mɔgɛnu nabɔ Iyipiti nyamanɛ rɔ iko anuna bɔnsɔnnu bi nya min.