Read Kuranko Bɔ-Koe-Iyipiti 13 Bible Online

Bɔ-Koe-Iyipiti 13 - Kuranko bible

Bɔ-Koe-Iyipiti 13

¹Mari ya a fɔ Musa ye ko,

² “A fɔ Isirɛla mɔgɛnu ye ko anu ni anuna den-kei-sarɛ bɛɛ dantɛgɛ nde, Mari ma. Ni musu-wo-musu ya den-kei-sarɛ sɔrɔn, ntɛ le dan wo la, hali a mara anuna kolo-fannuta den fɔlɔtɛ la, a keimɛ, kɔni.”

³Musa ya a fɔ mɔgɛnu ye ko, “Wo bɔra yɔɔnyɛ rɔ Iyipiti nyamanɛ rɔ tele min ma, wo ni wo hɛnkili to tele wo nyɛrɛ ko. Wo ni wo ma kamasɔrɔn Mari ya wo labɔ Iyipiti nyamanɛ rɔ a kɔɛn-sɛnbɛmɛ la wo wulɔn tele rɔ. Wo kana biredi-yɛlɛnɛ fenfen dɔn tele wo ma.

⁴Ma ara bɔ Iyipiti nyamanɛ rɔ Abibu[12] karɛ kɛ le la.

⁵Mari ya lanyiri kiri wo benbanu ye ko mɔgɛ kɛnu siginɛ kan min, Hɛtinu wo, Amoranu wo, Hefanu wo, anubɛ Yebusinu, a ko a si Kenan nyamanɛ bɛɛ di wo ma. Nyamani-hakikɛ le anuna nyamanɛ wo la. Mari wa wo ladon nyɔ tumɛ min, wo si to ladɛn kɛ sufa kɛla Abibu karɛ kɛ la.

⁶Wo ni biredi-yɛlɛbɛlɛ dɔn tele wɔrɔ kɔrɔ. A tele wɔrɔnfila nyɔgɛ ma, wo ni ladɛn kɛ Mari ye. Biredi-yɛlɛnɛ kana taran wo bolo. Isiti fanan kana taran wo bolo wola nyamanɛ wo rɔ wo wati-kundu-nɛ rɔ.

⁸Wo ni a rakaran wola den-keinu ye wulɔn ko, ‘Ma ye Kanan-Ko-Ladiyɛ kɛ kɛla ka a tɛgɛ Mari ya min kɛ ma ye, wo tumɛ ma ye bɔla Iyipiti nyamanɛ rɔ.’

⁹Iko hɛnkili-bila-fan min kirinɛ mɔgɛ bole anubɛ a telɛ la, ladɛn kɛnu si ma wo hɛnkili-bila-fan la wo nya na le ko Mari ya wole labɔ yɔɔnyɛ rɔ Iyipiti nyamanɛ rɔ ata sɛnbɛ la. Woletɔ Marila tɔnnu ni to wo yisi rɔ. Wo nagankuri ni nama a fɔ tinɛ wo sɛbɛ la tuma-wo-tuma.

¹⁰Woletɔ san-bo-san, wo ni to tɔn kɛ birala a tumɛ rɔ.”

¹¹“Mari ya Kenan kɛnuna nyamanɛ min di wo ma iko a ya lanyiri kiri wobɛ wo benbanu ye nya min, wo wa ke nyɔ tumɛ min,

¹² ni musu-wo-musu ya den-kei-sarɛ sɔrɔn, Maritɛ le dan wo la, hali kolo-fannuta den fɔlɔtɛ, a keimɛnu, kɔni.

¹³Kɔnɔ ni sofɛlɛ le, wo ni anuna den fɔlɔtɛnu kunka saga-dannu na. Ni wo ma sofɛli-dan wonu kunka, wo ni anu kan keri. Kɔnɔ ni hadama-dan le, a fɛrɛ sa fɔ wo ni anuna den-kei-sarɛ bɛɛ kunka.

¹⁴“Tumado ni wola den-keinu ya ladɛn kɛ kɔrɛ manyinika wo la tumɛ min, wo si a fɔ anu ye ko, ‘Mari ya ma labɔ yɔɔnyɛ rɔ Iyipiti nyamanɛ rɔ ata sɛnbɛ la wati kɛ le tɔ.

¹⁵Mansɛ ma sɔn ma bolokala min kɛ, woletɔ Mari ya Iyipiti mɔgɛnuna den-kei-sarɛnu faga, hali anuna kolo-fannu, a keimɛnu, kɔni. Woletɔ ma ye kolo-fannu den fɔlɔtɛnu mala sarakɛnu na Mari ye, a keimɛnu, kɔni. Kɔnɔ ma si mala den-kei-sarɛ bɛɛsi kunka mata Mari ma.’ ”

¹⁶Musa ya a fɔ anu ye tun ko, “Kunkɛ kɛ ni ma wo hɛnkili-bila-fan la. A ni ma iko hɛnkili-bila-fan min bi mɔgɛ bole anubɛ a telɛ ma. Mari si na wo labɔ Iyipiti nyamanɛ rɔ ata sɛnbɛ la tele min tɔ, wo si wo dɛnbɛ ka wo hɛnkili bila wo tele ko.”

¹⁷Nba, ale mansɛ ya Isirɛla mɔgɛnu boloka tumɛ min, Alla ma sɔn anu ni bɔ Filisitinuna kilɛ fɛ. Hali Filisitinuna kilɛ fɛ-wuru, Alla ma sɔn anu ni bɔ nyɔ kilɛ la alako ni kɛlɛ wulita tumɛ min, anu kana na anu nasɛgi Iyipiti nyamanɛ rɔ.

¹⁸Kɔnɔ Alla ya anu nabɔ anuna kɛlɛ-kɛ-mirannu na anu bolo Iyipiti nyamanɛ rɔ kilɛ laminimininɛ fɛ Kɔgɔ-Yi-Wulan wara la wulɛ rɔ.

¹⁹ Musa tara Yusufu kolenu na a bolo bawo yanni Yusufu ni faga tumɛ min, a ya a na-kelen-nyɔgɛnu nasɛ nun ko anuta Alla wa na anu kisi tinɛ tumɛ min, anu ni ta a kolenu na anu bolo.

²⁰Anu bɔra kan tinɛ do rɔ min tɔgɛ Sukɔti ka ta anu daga makɛ wulɛ da kɔrɔ.

²¹Tele rɔ, Mari ye anu yarɔ banda-fin-gbɛ rɔ ka kilɛ yira anu na. Suyi rɔ, Mari ye anu yarɔ iko ta-mɛlan alako anu ni anu kin kɔrɛ yen.

²²Tele-wo-tele, banda-fin-gbɛ kɛ ye mɔgɛnu fɛ. Su-wo-su, ta-mɛlan ye anu fɛ.