Read Kuranko Bɔ-Koe-Iyipiti 16 Bible Online

Bɔ-Koe-Iyipiti 16 - Kuranko bible

Bɔ-Koe-Iyipiti 16

¹Isirɛla mɔgɛ bɛɛsi bɔra Tamaro Kɔrɔ ka ta Sin wulɛ rɔ min bi Tamaro Kɔrɔ anubɛ Sinayi kɔnkɛ tɛma. Anu bɔɛ Iyipiti nyamanɛ rɔ, anu ya karɛ kelen, tele tan-ni-loli le bɔ kilɛ la yanni anu ni ke Sin wulɛ rɔ.

²Isirɛla mɔgɛ bɛɛ ya gbunya-kumɛ fɔ Musa anubɛ Aruna ma wulɛ wo rɔ

³ka a fɔ anu ma ko, “Yanni ma ni kɛ nyɔgɔn sufa tɔrɔyɛ sɔrɔn yan, a fisa nun Mari ni ma faga Iyipiti nyamanɛ rɔ. Ma ye Iyipiti nyamanɛ rɔ tumɛ min, ma ye mɛya-fannu anubɛ dɔn-fannu dɔnna nun ka wasa. Kɔnɔ wo ara na ma la wulɛ kɛ rɔ alako wo ni a ma, nyama kɛ bɛɛsi ni faga kɔnkɛ bolo.”

⁴ Mari ya a fɔ Musa ye ko, “N si dɔn-fan do layigi wo ma ka bɔ san-kole rɔ. Mɔgɛnu si dɔn-fan min ban tele kelan kɔrɔ, anu ni wo le dɔrɔn bi tele-wo-tele. N si anu kɔrɔbɔ kɛ rɔ ni anu si n kuman-kan latɔnbagaya, ka, ni anu ti a latɔnbagaya.

⁵Lɔgɔkun-wo-lɔgɔkun a tele wɔrɛ ma, anu ni tele fila dɔn-fan makɔ.”

⁶Musa anubɛ Aruna ya a fɔ Isirɛla mɔgɛnu ye ko, “Wo si a lɔn wurɛ la ko Mari le ya wo labɔ Iyipiti nyamanɛ rɔ

⁷bawo Mari ara wo gbunya-kan lamɔɛn. Bandɛ wa ka sina, wo si ata gbiliyɛ yen wo nyɛrɛ yɛ la. Nfenna wo ye kɔrɔtɔla male ma Allata kumɛ latenbi koe la wo ma?”

⁸Musa ya a fɔ ko, “Wo si a lɔn ko Mari le ale la min si mɛya-fan di wo ma wura-wo-wura ka dɔn-fan di wo ma sɔgɔma-wo-sɔgɔma wo si minnu dɔn ka wasa. A ye wo mala bawo a ye wo gbunya-kan lamɔɛnna. Wo ye gbunya-kumɛ min fɔla male ma, wo sa a fɔla male ma, fɔ Mari.”

⁹Musa ya a fɔ Aruna ye ko, “A fɔ Isirɛla mɔgɛ bɛɛ ye ko anu ni anu kundɛn kan-tina-kelen Mari yakɔrɔ kamasɔrɔn a ara anuta gbunya-kumɛ lamɔɛn.”

¹⁰Aruna ya kumɛ dabira anu ye tumɛ min, anu ya anu yɛ lata wula-yan la. Tiriyante wo rɔ, anu ya Marita wan-belebele yen banda-finyɛ rɔ.

¹¹Mari ya a fɔ Musa ye ko,

¹²“N bara Isirɛla mɔgɛnuna gbunya-kumɛ lamɔɛn. A fɔ anu ye ko anu si mɛya-fan dɔn bi wurɛ la. Sɔgɔma, anu si fa dɔn-fan la. Anu si a lɔn yati, ko nde le anuta Mari Alla la.”

¹³Wurɛ la, wonderenu yigira ka Isirɛla mɔgɛnuna sigi tinɛ lafa. Sɔgɔma, duri yigira dagɛla minɛ rɔ.

¹⁴Duri wo kara tumɛ min, dɔn-fen-lamurunnɛ tora sani dugi ma iko yanba-kun-gbalɛ.

¹⁵ Isirɛla mɔgɛnu ya a yen tumɛ min, anu ya a fɔ anu nyɔgɔn ye ko, “Nfen bi kɛ la?”[14] kamasɔrɔn anu ma a lɔn ni min bi. Musa ya a fɔ anu ye ko, “Nba, Mari ya dɔn-fan min di wo ma, wo le kɛ la.

¹⁶Mari ya min fɔ dɔn-fan kɛla ko la, wo le kɛ la. A ko denbaya-tigi bɛɛ ni pani-kunbɛ nya kelen-kelen makɔ iko ala mɔgɛnu yatɛ ye nya min bɔn la. Ni mɔgɛ min nyɔgɔn ye a bolo bɔn la, a ni ta wo nyɔgɔn dɔn-fan pani-kunbɛ bi.”

¹⁷Isirɛla mɔgɛnu ya a ma iko Mari ya a fɔ nya min. Donu ya a siyaman bi, donu ma a siyaman bi.

¹⁸ Anu banta a makɔla tumɛ min, minnu ya a siyamɛ bi, wonutɛ to ma to. Minnu ma a siyamɛ bi, wonutɛ ma dasa. Mɔgɛ bɛɛ ya a bi ka a bɛn ala bonna-mɔgɛnu yatɛ ma gben!

¹⁹Musa ko, “Mɔgɔ-wo-mɔgɔ kana dɔn-fen kɛ fenfen namara ha sɔgɔma.”

²⁰Hali wo, donu ma Musata kumɛ bira. Anu ya anutɛ lamara ha sɔgɔma. Tunbinu kera wonutɛ rɔ. A tulu-sumɛ bɔra. Musa diminyara anu ma.

²¹Anu tora a makɔla sɔgɔma-wo-sɔgɔma iko anuna bonna-mɔgɛnu yatɛ ye nya min. Tele wa kunaya, dɔn-fan wo si lee bandin!

²²Kɔnɔ a tele wɔrɔ nyɔgɛ ma, denbaya-tigi bɛɛ ya tele fila dɔn-fan makɔ anuna denbayɛnu ye, pani-kunbɛ-nya fila, mɔgɔ kelen. Anu banta a makɔla tumɛ min, kebila-kunyɛ bɛɛ tara ka a fɔ Musa ye ko, “Ma ara dɔn-fen-siyamɛ kɛ makɔ. Ma si a ma kama?”

²³ Musa ya a fɔ anu ye ko, “Ni a ma-sɔgɛ ye wo la nya-wo-nya, wo si a ma wo nya, ni ka a mintan de, ni wo ma, ka a te le, wo si a ma wo nya. Kɔnɔ ni mintɛ toe tora, wo si ma sina dɔn-fan la. Wo ni wo lamara ha sɔgɔma bawo sina tele si ma tele-sɛnimɛ la Mari ye.”

²⁴Bɛɛ ya atɛ lamara ha sɔgɔma iko Musa ya a fɔ nya min. A tunu-suma ma bɔ. Tunbinu ma ke anu tɔ.

²⁵Musa ko, “Wo ya minnu namara, wo ni wonu dɔn bi kamasɔrɔn Sulen-Tele le kɛ la min sɛninyanɛ Mari ye. Wo ti dɔn-fan kɛ fenfen taran dugi ma Sulen-Tele ma. Wo si to a makɔla tele wɔrɔ kɔrɔ. A tele wɔrɔnfila nyɔgɛ ma, wo ti dɔn-fen wo dɔn-fen taran nyɔ.”

²⁷Hali wo, mɔgɛ donu ya anu tui ka ta dɔn-fan wo makɔ tinɛ a tele wɔrɔnfila nyɔgɛ wo ma kɔnɔ anu ma fenfen taran nyɔ.

²⁸Mari ya a fɔ Musa ye ko, “Wo si n kan to a gbɛ rɔ wati nyamintan gbɛ?

²⁹Wo ni wo hɛnkili to kɛ ko, ko nde, Mari le ya Sulen-Tele kɛ di wo ma serr! Woletɔ n bi tele fila dɔn-fan dila wo ma a tele wɔrɔ nyɔgɛ ma. Mɔgɔ-wo-mɔgɔ kana a maga a tele wɔrɔnfila nyɔgɛ ma. Bɛɛ ni to a warɛ.”

³⁰Woletɔ mɔgɛnu tora anu sulenna a tele wɔrɔnfila nyɔgɛ ma.

³¹ Isirɛla mɔgɛnu ya dɔn-fan wo tɔgɔ sa “Allata biredi.” A gbɛnɛ iko kende-kole. A di iko bagadalɛ.

³²Musa ya Mari kuman-kan latenbi Isirɛla mɔgɛnu ma ko, “Mari ko ma ni dɔn-fan kɛ pani-kunbɛ-nya kelen namara mala dannu anubɛ ma kegeyɛnu yarɔ. Mari ko a ya ma labɔ Iyipiti nyamanɛ rɔ tumɛ min, a ya ma de-nyini dɔn-fan min na wulɛ rɔ, anu ni wo yen anu yɛ la.”

³³ Musa ya a fɔ Aruna ye ko, “I ni dɔn-fan kɛ pani-kunbɛ-nya kelen namara kan-tina-sɛnimɛ rɔ Marita Fani-Bɔn la alako ma kegeyɛnu si a yen nya min.”

³⁴Aruna ya a ma iko Mari ya a fɔ Musa ye nya min. A ya a sigi tɔn-kenkirɛ yarɔ.

³⁵ Isirɛla mɔgɛnu tora Allata biredi wo dɔnna ha san bi-nanɛ da fara ha anu tara Kenan nyamanɛ-dan ma, anu bi nala sigila nyamanɛ min tɔ, kɔni.

³⁶(Anuna fen-suma-fan wo nya kelan le bɛnnɛ pani-kunbɛ-nya tan ma.)