Read Kuranko Bɔ-Koe-Iyipiti 2 Bible Online

Bɔ-Koe-Iyipiti 2 - Kuranko bible

Bɔ-Koe-Iyipiti 2

¹Lifayi bɔnsɔn do ye nyɔ min ya Lifayi dunmusi do furu.

² Musi wo ya buyi bi ka den-kei sɔrɔn. A ya a yen min kɛ ko a kin, a ya dan wo dogon ha karɛ sawa.

³Karɛ sawa tenbira tumɛ min, a na ma ke a dogonna tun. A ya digi ladan ka kolota don a ma. A ya dennɛ wo bi ka a sa digi wo rɔ ka a sigi sɔnfɔn-kurinu tɛma Nayɛli bɛ rɔ.

⁴Dan wo kɔrɔ-musi ya a sɔ wula-yan la ka a yɛ bɛn a ma ka a lɔn ni min bi mala a dɔgɛ wo la.

⁵Mansɛla dunmusi tara ba-worɔn wo la a ku tinɛ. Sunkurɔn minnu bi a fɛ, wonu tora anu matagamana bɛ dala. Mansɛla dunmusi ya digi wo yen sɔnfɔn-kurinu tɔ tumɛ min, a ya ala yɔɔn-musi sɔ ka ta a bi.

⁶A ya digi laka ka dan wo yen dila. A kinikinita a ma. A ko, “Isirɛla mɔgɛnuna dan[2] do le kɛ la.”

⁷Dan wo kɔrɔ-musi ya a fɔ mansɛla dunmusi wo ye ko, “I si sɔn n ni ta Hiburu musi do nyini min si dan kɛ susun i ye?”

⁸Mansɛla dunmusi ya a fɔ a ye ko, “Awa, ta.” Dennɛ wo kɔrɔ tara ka dan wo na kele.

⁹A na nara tumɛ min, mansɛla dunmusi ya a fɔ musi wo ye ko, “I ni dan kɛ bi ka a susun n ye. N si i sara.” Musi wo ya dan wo bi ka a susun.

¹⁰ Dan wo koloyara tumɛ min, a na tara a to mansɛla dunmusi wo ma. A mara wola den-kei la. Musi wo ya a fɔ ko, “N ya dan kɛ labɔ yi le tɔ,” woletɔ a ya a tɔgɔ sa Musa.[3]

¹¹ Musa koloyara tumɛ min, a tara a na-kelen-nyɔgɛ Hiburunu taran wɔli-kɛ-tinɛ. A ya a yen anu bi wɔli-gbɛlɛmɛ kɛla nya min. A ya Iyipiti kɛ do yen a na-kelen-nyɔgɛ Hiburu do gbesila.

¹²Musa ya a yɛ lakalan. A ma mɔgɔ-wo-mɔgɔ yen min kɛ, a ya Iyipiti kei wo faga ka a dogon kɛnkɛn rɔ.

¹³Wo banda kɛ, a ya a taran fanan, Hiburu kemini mɔgɔ fila ye kɛlɛla. Min yo sa kumɛ rɔ, a ya a fɔ wo ye ko, “I ye i na-kelen-nyɔgɛ Hiburu kɛ gbesila nfenna?”

¹⁴Wo ya a yabi ko, “Yon ya i ma kun-tigi anubɛ kiti-tɛgɛlɛ la ma tɛma? A ye i kɔntɔ ka nde faga, wa, iko i ya Iyipiti kɛ wo faga nya min kunu?” Wo kɔma, Musa kilanta. A ya a miri a nyɛrɛ ma ko, “Tumado mɔgɛnu bara nna mɔgɔ-faga-koe kɛ lɔn.”

¹⁵ Mansɛ ya wo lamɔɛn tumɛ min, Musa faga-sɔgɛ ya a bira. Kɔnɔ Musa ya a buri mansɛ kɔrɔ ka ta a sigi Midiyan nyamanɛ rɔ kɔlɔn do dafɛ.

¹⁶Kei min taranta saraka-masɔ-wɔli kɛla Midiyan nyamanɛ rɔ nyɔ, wo tɔgɛ le Yɛtiro. Wola dunmusu mɔgɔ wɔrɔnfila nara yi-bi-tinɛ kɔlɔn wo rɔ. Anu ya yi do kɛ miran rɔ alako anu fala sagɛnu ni anu min.

¹⁷Saga-kandannɛ donu nara ka Yɛtirola dunmusinu yakɔrɔ-mamɔ yi koe la ka anu gben kɔnɔ Musa ya a lawuli ka anuna kɛlɛ kɛ ka yi layɛlɛ anuna sagɛnu ye.

¹⁸Dunmusi wonu sɛgira anu fa wara tumɛ min, wo ya anu manyinika ko, “Nfenna wo nara yona bi?”

¹⁹Anu ko, “Iyipiti kɛ do le ya ma dɛnbɛ ka saga-kandannɛ donu gben ma ye minnu ya ma tɔrɔ. A ya yi layɛlɛ ma ye ka wo di mala sagɛnu ma.”

²⁰A ya ala dunmusinu manyinika ko, “Iyipiti kɛ wo ye mintɔ? Wo ya a to nyɔ nfenna? Wo ta a kele. A ni na fen dɔn tinɛ ma fɛ bi.” Anu tara a kele.

²¹Musa sɔnta sigi-koe ma kei wo warɛ. Yɛtiro ya ala dunmusi Sipora di Musa ma ko a ni ma ala musi la.

²²Sipora ya den-kei sɔrɔn Musa ma. Musa ya a miri ko, “N bi sundanyɛ la nyamanɛ kɛ rɔ,” woletɔ a ya ala dan wo tɔgɔ sa Kɛrisɔn.[4]

²³San siyaman tenbinɛ wo kɔma, Iyipiti mansɛ wo fagara. Isirɛla mɔgɛnu gbunyara yɔɔnyɛ kɔrɔ ka anu kan nabɔ Alla ma.

²⁴ Alla ya anu di-kɛ-kan lamɔɛn. A ya lanyiri min kiri Iburayima anubɛ Isiyaka anubɛ Yakoba ye, a ya a fonde to wo ko

²⁵ka to a mirila Isirɛla mɔgɛnuna tɔrɔyɛ wara-koe ma.