Read Kuranko Bɔ-Koe-Iyipiti 22 Bible Online

Bɔ-Koe-Iyipiti 22 - Kuranko bible

Bɔ-Koe-Iyipiti 22

¹Mari ya a fɔ Musa ye tun ko, “Ni mɔgɛ do ya ninki kankan, ni wo ma, sagɛ, ni a ya a faga le, ni a ya a mayira le, a ni ninki loli lasɛgi ninki kelan wo gbɛ rɔ. Ni sagɛ le, a si saga nani nasɛgi sagɛ wo gbɛ rɔ.

²Kankan wo si wo nyɔgɔ labɔ. Ni fenfen sa ale kankan bolo, anu si ale mayira ka a ma kolo-fan wo sɔnkɛ la. Ni a ya min kankan, a ma ko ma wɛ wo la, ni a mara ninki le la, a si wo nyɔgɔn fila lasɛgi. Ni a mara sagɛ le la, a si wo nyɔgɔn fila lasɛgi. Ni a mara sofɛlɛ le la, a si wo nyɔgɔn fila lasɛgi. “Ni mɔgɛ do ya kankan do yen, a ye bɔn kerila suyi rɔ, ni a ya a gbesi a ni faga, anu ti mɔgɛ wo tɔrɔ kankan wo faga-koela ko la. Ni a ya a yen tele le tɔ, ni mɔgɛ wo ya a gbesi, a ni faga, a gbesilɛ wo si yilikiyi sɔrɔn mɔgɔ-faga-koe la.

⁵“Ni mɔgɛ do ya ala kolo-fan boloka binyɛ ma, wo ni ta a kun fɛ ha a ni ta mɔgɛ dola sɛnita-fan do dɔn, ni wo ya fenfen dɔn sɛnɛ wo rɔ, kolo-fen-tigi wo si wo nyɔgɔ sara ka bɔ ala sɛnita-fan rɔ.

⁶“Ni mɔgɛ do ya tɛ tugu ala wɔli-kɛ-tinɛ la, tɛ wo ni ta binyɛ mintanna ha a ni ta a labɔ mɔgɛ dola sɛnɛ ma, a ni wola sɛnita-fannu mintan, a tɛgɛnɛ wo, a tɛgɛtɛ wo, ta-tugulɛ wo si wo nyɔgɔ labɔ.

⁷“Ni mɔgɛ ya wodi, ni wo ma, a bolo-fan do kerifa a sigi-nyɔgɛ do la, ni anu ya a kankan wo bolo, ni anu ya kankan wo bira, kankan wo si wo nyɔgɔn fila lasɛgi.

⁸Kɔnɔ ni anu ma kankan wo yen, wo si ta fen-namaralɛ wo la nde, Mari Bato-Bɔn la fan wola ko la. A si a nyɛrɛ lasɛ nde, Mari yala.

⁹“Ni mɔgɛ donu sɔsɔra fan do kuma, a mara kolo-fen na wo, a mara kura la wo, a mara fenfen na, anu ni ta nde, Mari Bato-Bɔn la. Ni nde, Alla ya min yiliki, anu sɔsɔra min kuma, wo si wo nyɔgɔn fila lasɛgi a ta-nyɔgɛ ma.

¹⁰“Ni mɔgɛ ya ata kolo-fan do kerifa a sigi-nyɔgɛ do la, ni a mara sofɛlɛ la wo, ni a mara ninki la wo, ni a mara saga la wo, ni a mara a sufa-wo-sufa la, ni kolo-fan wo fagara le, ni wo ma, ni a tanbanta le, ni mɔgɛ do buira a ma ka a bɔ a bolo ka ta a la fɔrɔsɛ la, ado mɔgɔ ma a yen a bɔla a bolo,

¹¹fen-namaralɛ wo si ta a nyɛrɛ lasɛ nde, Mari yala ko a gba ma. A ti a nyɔgɔ labɔ worɔ. Fan wo tigi wo si dinya wo ma, hali a ma a nyɔgɔ lasɛgi worɔ tun.

¹²Kɔnɔ ni mɔgɛ do ya a kankan a ma le, ale fen-namaralɛ si wo nyɔgɔ labɔ ka a don fen-tigi wo bolo.

¹³Ni a taranta sogo-feremɛ do ya kolo-fan wo bira ka a faga, a ya a kerifa mɔgɛ min na, wo si na a sogo-toe wo la ka a ma sereyɛ la. Hali a ma wo nyɔgɔ labɔ worɔ.

¹⁴“Ni mɔgɛ do ya a sigi-nyɔgɔ dola kolo-fan sinka a ma, wo ni tanban, ni wo ma, a ni faga a bolo, a ma kɛ fen-tigi yala, a si wo nyɔgɔ labɔ.

¹⁵Kɔnɔ ni a tanbanta le, ni wo ma, ni a fagara le a tigi yala, hali a ma a nyɔgɔ labɔ worɔ. Ni mɔgɛ ya wodi bɔ kolo-fen sinka tinɛ, ka, ni kolo-fan wo fagara, a tigi ni a wasa don a sinka-wodi wo rɔ.

¹⁶ “Ni keminɛ do ya sunkurun-nasɔlɔnɛ do bole labira ka a sa a fɛ, ado a mabirani ma mɔgɔ-gbɛrɛkɛ bolo, fɔ a wa a furu le.

¹⁷Ni dunmusi wo fa ya a ban a dila kei wo ma, kei wo ni furu-nɔnfuli labɔ, ado dunmusi wo ti to a bolo.

¹⁸“Wo kana sɔn, suwagɛ ni to a niyi la.

¹⁹ “Ni min ya a sa kolo-fan, ni wo ma, soge do fɛ, wo ni wo tigi faga yati!

²⁰ “Min ba bɛsɛ kɔ nde, Mari Alla kɔma, wo ni wo tigi faga feu!

²¹ “Wo kana ko-yogoma ma sundannu na hali ka anu yakɔrɔ-mamɔ bawo wole fanan bi sundanyɛ le la nun Iyipiti nyamanɛ rɔ.

²²“Wo kana kɛɛ-musinu anubɛ kelennɛnu tɔrɔ.

²³Ni wo ya anu tɔrɔ, anu di-kɛ-kan ni ke n ma,

²⁴n yisi si bɔ wo kuma. Ni min ya wo ma, n si wo tigi faga. Ale fanan musi si ma kɛɛ-musi la. Ala dannu si to kelenniyɛ rɔ.

²⁵ “Ni min ya nta mɔgɔ bolo-kolɔn do dɔndɔ wodi la, a kana tɔnɛ sa wodi wo kuma ka a nyɛrɛ ma mɔgɔ-bɔnɔnɛ la.

²⁶ Ni mɔgɛ do ya ala burun-kura kelen pe sigi tulumɛ la a ta-nyɔgɛ ma, wura-wo-wura, wo ni to a lasɛgila a ma,

²⁷bawo wo kelan pe le ye a bolo. Ni wo sa nyɔ, a si nfen burun a ma? Ni burun-kura-tigi wo dira n dala tumɛ min, n si a di-kɛ-kan lamɔɛn kamasɔrɔn n si kinikini mɔgɔ-sufa wo ma.

²⁸ “Wo kana nde, Alla rasɛ anubɛ ka wola kun-tiginu danka.

²⁹“Wo ye wola fui-fan anubɛ wola ki-fan minnu dila n ma, wo kana wonu dɔn. Wo ni anu di nde ma. “Wo ni wola den-kei-sarɛnu di nde, Mari ma.

³⁰Wo ni wola kolo-fannu fanan ma wo nya. Wola kolo-fannuna den fɔlɔtɛnu ni to a na fɛ tele wɔrɔnfila kɔrɔ. A tele segin nyɔgɛ ma, wo ni anu di nde ma.

³¹ “Sogo-feremɛnu bi soge minnu fagala, wo kana wonu dɔn. Wo ni anu nafili wulinu kɔrɔ bawo nta mɔgɔ-sɛnimɛ le wole la.”