Read Kuranko Bɔ-Koe-Iyipiti 31 Bible Online

Bɔ-Koe-Iyipiti 31 - Kuranko bible

Bɔ-Koe-Iyipiti 31

¹Mari ya a fɔ Musa ye ko,

²“N bara Yurila den-kei Bɛsalɛli yabɔ Yuda bɔnsɔn rɔ, Huri mamanɛ, kɔni.

³N bara nta sɛnbɛ di a ma alako a ni hɛnkili sɔrɔn ka wɔli sifa kɛnu dama nya-lɔn.

⁴N bara mɔlɔni-ladan-hɛnkili di a ma alako a ni kusanya boloma-wɔlɛ kɛ sufa donu na iko sɛnɛ anubɛ wodi-gbɛ anubɛ sila-wɔlɛ.

⁵A si ke kuru-da-gbɛlɛnu anubɛ kɔlɔmanu lɛsɛla ka kusanya wɔli-siyaman kɛla.

⁶N bara Ahisimaki wola den-kei Oholiyabu yabɔ Dan bɔnsɔn rɔ ka ma Bɛsalɛli dɛnbɛnɛ la. N bara hɛnkili di mɔgɔ-siyaman ma alako anu ni kusanya nna bon-mirannu nadanna iko n bara a fɔ ile Musa ye nya min.

⁷Wonu ni nna Fani-Bɔn ladan ka tɔn-kenkirɛ anubɛ a da-latogɔn ladan anubɛ nna Fani-Bɔn miran bɛɛsi.

⁸Anu ni tebulu anubɛ a fɛ-mirannu nadan. Anu ni lɛnpu anubɛ a fɛ-mirannu nadan. Anu ni isɛnti mintan tinɛ ladan.

⁹Anu ni saraka-mintan-tinɛ anubɛ a fɛ-mirannu nadan. Anu ni yi-sigi-miran anubɛ a sigi-fan ladan.

¹⁰Anu ni Aruna anubɛ ala den-keinuna saraka-masɔ-kura-sɛnimɛnu nadan.

¹¹Anu ni tulu-sɛnimɛ anubɛ isɛnti ladan Kan-Tina-Sɛnimɛla ko la. Anu ni wo bɛɛsi ladan iko n bara a fɔ ile Musa ye nya min.”

¹²Mari ya a fɔ Musa ye tun ko,

¹³“I ni a fɔ Isirɛla mɔgɛnu ye ko anu ni to nta Sulen-Tele birala ka a gbiliya bɛrɛkɛ! Wo ni wo ma kamasɔrɔn tamasere le wo tele la ko nde le wota Mari la min bara wo yabɔ ka wo sɛninya. Ka a fɔlɔ wole ma ha ka a sigi wo kegeyɛnu na,

¹⁴wo ni Sulen-Tele wo gbiliya bawo tele-sɛnimɛ le min sɛninyanɛ wo ye. Ni min ya a tui ka tɔn wo tinya ka wɔlɛ kɛ tele wo ma, wo ni wo tigi gben wo kurun tɔ. Wo tigi ni faga yati!

¹⁵ Wo ni wola wɔlɛ kɛ tele wɔrɔ kɔrɔ. A tele wɔrɔnfila nyɔgɔn ma, wo ni wo sulen wo ma bawo tele le wo la min dantɛgɛnɛ nde, Mari ma. Ni min ya wo tele tinya, wo tigi ni faga yati!

¹⁶Woletɔ wole Isirɛla mɔgɛnu ni Sulen-Tele bira ka a gbiliya. A ni ma habadan-tɔn la wobɛ wo kegeyɛnu ye.

¹⁷ Habadan-tamasere le kɛ la min bi mabɛ wole Isirɛla mɔgɛnu tɛma. Nde, Mari ya san-kole anubɛ dugu-kole dan tele wɔrɔ kɔrɔ. A tele wɔrɔnfila nyɔgɔn ma, n ya n sulen.”

¹⁸Mari ban kɛ fɔla Musa ye Sinayi kɔnkɛ kuma, Mari ya kuru-walan fila don a bolo ale nyɛrɛ ya ala tɔnnu sɛbɛ minnu ma a kɔɛn la.