Read Kuranko Bɔ-Koe-Iyipiti 32 Bible Online

Bɔ-Koe-Iyipiti 32 - Kuranko bible

Bɔ-Koe-Iyipiti 32

¹ Mɔgɛnu ya a yen tumɛ min ko Musa ara mɛ Sinayi kɔnkɛ kuma, anu ya anu kundɛn Aruna dafɛ. Anu ya a fɔ a ye ko, “Musa min nara ma la ka bɔ Iyipiti nyamanɛ rɔ, ma ma a lɔn min bara ma a la. I lasɔ ma fɛ ka bɛsɛ do ladan ma ye min si sɔ ma yarɔ.”

²Aruna ya a fɔ anu ye ko, “Sɛnɛ minnu bi wola musinu anubɛ wola dannu tole la, wo ta wonu bi. Wo ni na anu na n bara.”

³Anu nara sɛnɛ-tolola-fan wonu na ka anu don Aruna bolo.

⁴ A ya wonu bira anu bolo ka anu lee ka a ma ninki-danla muninyɛ la. Isirɛla mɔgɛnu ya a fɔ ko, “E, mata bɛsɛ le kɛ la min nara ma la ka bɔ Iyipiti nyamanɛ rɔ.”

⁵Aruna ya wo yen tumɛ min, a ya saraka-mintan-tinɛ sɔ ninki-danla muninyɛ wo yarɔ. A ya a fɔ anu ye ko, “Nba, sinan tele si ma ladiya-tele la Mari ye.”

⁶ Bandɛ kanɛ, anu suruta nala saraka-mintantɛnu anubɛ yisi-kima-sarakɛnu na. Anu ya anu de-nyini ka anu min. Wo kɔma, musi wo, kei wo, anu ya bolola-tolɔn dabira.

⁷Anu bi wo kun na, Mari ya a fɔ Musa ye kɔnkɛ kuma ko, “I buri yigila kamasɔrɔn i wara na mɔgɛ minnu na ka bɔ Iyipiti nyamanɛ rɔ, wonu bara yɛlɛma ka yogoya.

⁸N bara kilɛ min yira anu na, anu bara bɔ wo fɛ tiriya! Anu bara ninki-danla muninyɛ ladan ka a kɔ ka sarakɛnu bɔ a ye. Anu bi a fɔla ko anuta bɛsɛ le wo la min nara anu na ka bɔ Iyipiti nyamanɛ rɔ.”

⁹Mari ya a fɔ Musa ye tun ko, “N bara mɔgɛ kɛnu yen. Anu tole gbɛlɛ dɔgɔma-ma-de!

¹⁰Woletɔ i kana n nakala. Nta diminyɛ si wara anu kuma ka anu ban sa! N si ile ma bɔnsɔn kurɛ dabirɛ la.”

¹¹ Musa ya ata Mari Alla madiya. A ko, “Mari, i wara ila mɔgɛ minnu nabɔ Iyipiti nyamanɛ rɔ ita sɛnbɛ-wɛ la, ila diminyɛ si wara wonu kuma nfen na?

¹²Ni i ya wo ma, Iyipiti kɛnu si a fɔ ko i ya mɔgɛ kɛnu nabɔ nyɔ alako i ni anu ban dugu-kole kuma. I yandi, i fonde yɛlɛma ka kinikini anu ma. I ye nala ko-yogomɛ min mala anu na, i yandi, i kana wo ma anu na.

¹³ I miri ila wɔli-kɛlɛnu ma, Iburayima wo, Isiyaka wo, anubɛ Yakoba. I ma lanyiri kiri anu ye nun ko i si anu bɔnsɔn siyaya iko sanma-lolenu? I ma lanyiri kiri anu ye nun ko i si lanyiri-nyamanɛ wo di anu ma ka nyamanɛ wo ma anu halalɛ la?”

¹⁴Wo le ya a ma, Mari ya a fonde yɛlɛma. A ma ala mɔgɛ wonu kasara tun.

¹⁵Wo kɔma, Musa ya kuru-walan filɛ wonu bi Marita tɔn sɛbɛnɛ min tɔnkɔn filɛ ma. Alla nyɛrɛ le ya kuru-walan wonu nadan ka ala tɔnnu sɛbɛ wonu ma. Musa ye kɔnkɛ wo yigila tumɛ min ka ta mɔgɛ wonu taran,

¹⁷Yasowa ya mɔgɛnu sɔnkɔ-sɔnkɔ-kan lamɔɛn. A ya a fɔ Musa ye ko, “A manɛ iko mɔgɛnu bi kɛlɛla dagɛ rɔ.”

¹⁸Musa ko, “Ka na a fɔ anu bara mɔgɛnu nɔ kɛlɛ rɔ, wo sɔnkɔ-kan ma kɛ la, ka na a fɔ kɛlɛ ara mɔgɛnu bira, wo sɔnkɔ-kan ma kɛ la. Kɛ mani de iko sigi-sa-kan.”

¹⁹Musa gbɛrɛnta dagɛ ma tumɛ min, a ya ninki-danla muninyɛ yen anubɛ dɔn-kɛlɛnu. A diminyara ha ka a dan-natenbi. A ya kuru-walan filɛ wonu fɛrɛn dugi la. Wonu tatiira nyɔ kɔnkɛ wo kɔrɔ.

²⁰Musa ya ninki-danla muninyɛ wo bi ka a lakɛ tɛ rɔ. Wo mintanta tumɛ min, a ya a bunden ka a munke kɛ yi rɔ. A ya yi wo di Isirɛla mɔgɛnu ma ko fɔ anu ni wo min.

²¹Musa ya a fɔ Aruna ye ko, “Mɔgɛ kɛnu ya nfen ma i la ha i wara anu nadon hakɛ sufa kɛ rɔ?”

²²Aruna ko, “I yandi, hali i ma diminya n ma. I ya a lɔn ko mɔgɔ kɛnu sɔn ma kin.

²³Anu ya a fɔ n ye ko ile Musa min nara anu na ka bɔ Iyipiti nyamanɛ rɔ, anu ma a lɔn min bara ma ile la. Woletɔ anu nara n bolo labira ko n ni bɛsɛ ladan anu ye min si sɔ anu yarɔ.

²⁴Woletɔ n ya a fɔ anu ye ko anu ni na anuna sɛnɛnu na. Anu ya anuna sɛnɛnu don n bolo. N ya anu sa tɛ rɔ tumɛ min, ninki-danla muninyɛ kɛ bɔra a nyɛrɛ ma.”

²⁵Musa ya a yen Aruna ma ala kun-tigiyɛ lawɔli a kin na, woletɔ Isirɛla mɔgɛnu bara murutiya ha anu bara ma yɛlɛnma-fan la anu yogenu yala.

²⁶Musa ya a sɔ dagɛ don-dɛ la, a ko, “Ni minnu bi Marila kilɛ fɛ, wonu ni na n bara.” Lifayi bɔnsɔn bɛɛsi tara a wara.

²⁷Musa ya a fɔ anu ye ko, “Isirɛla mɔgɛnuta Mari Alla ko wo kelen-kelennamɛ-bɛɛ ni ala faan bi ka ta dagɛ kan tinɛ bɛɛ rɔ. Wo ni ta wo na-kelen-nyɔgɛnu anubɛ wo diyana-mɔgɛnu faga tinɛ.”

²⁸Lifayi bɔnsɔn ya a ma iko Musa ya a fɔ anu ye nya min. Mɔgɔ waga sawa nyɔgɔn sufa fagara wo wulɔn tele rɔ.

²⁹Musa ko, “Wo ara wo nyɛrɛ di Mari ma bi. A si duwa wo ye kamasɔrɔn wo ara wo na-kelen-nyɔgɛnu faga.”

³⁰Wo banda kɛ, Musa ya a fɔ Isirɛla mɔgɛnu ye ko, “Wo ara bila Alla la kɔnɔ hali wo, n si ta Mari wara kɔnkɛ kuma kaka ka madiyali kɛ wole ye min tora. N si n taya. Tumado Mari si wo makoto.”

³¹Musa yɛlɛta Mari wara kɔnkɛ kuma. A ko, “E, Mari, mɔgɛ kɛnu bara hakɛ-belebele-wɛ kɛ ka sɛnɛ ladan ninki-danla muninyɛ la

³² kɔnɔ ni i sɔnta ka anu hakɛ makoto, wo kin. Ni i ti sɔn, i yandi, i ni nde fanan tɔgɛ firan ila buku ma.”

³³Mari ya a fɔ Musa ye ko, “Ni mɔgɔ-wo-mɔgɔ ya hakɛ kɛ ka bila nde la, n si wo tɔgɛ firan nta buku rɔ.

³⁴Woletɔ n bara kan tinɛ minna ko fɔ i ye nun, i ni ta nyɔ kaka. I ni sɔ mɔgɛnu yarɔ ka ta nyɔ. Nta melika dɔrɔn si sɔ i yarɔ. Hali wo, wo wati si na, n si anu tɔrɔ anu hakɛla ko la.”

³⁵Mari ya kiraya-fitinɛ lana mɔgɛnu kuma ka a tɛgɛ ninki-dan wola muninyɛ ladan-koe ma Aruna ya min nadan anu ye.