Read Kuranko Bɔ-Koe-Iyipiti 35 Bible Online

Bɔ-Koe-Iyipiti 35 - Kuranko bible

Bɔ-Koe-Iyipiti 35

¹Musa ya Isirɛla mɔgɛ bɛɛ ladɛn ka a fɔ anu ye ko, “Mari ara min bɛɛsi fɔ wo ye, wo ni wo bɛɛsi ma. Wo ye minnu mala, wo le kɛnu na.

² Wo ni wola wɔlɛnu kɛ tele wɔrɔ kɔrɔ kɔnɔ a tele wɔrɔnfila nyɔgɛ ma, wo ni wo ma Sulen-Tele la bawo Marita tele-sɛnimɛ le Sulen-Tele wo la. Ta-sisi kana yen mɔgɔ-wo-mɔgɔ bolo Sulen-Tele ma wo sigi tinɛ bɛɛ rɔ. Min ba wɔli a tele wɔrɔnfila nyɔgɛ wo ma, wo ni a faga.”

⁴Musa ya Marita kumɛ latenbi Isirɛla mɔgɛnu ma ko,

⁵“Wo ni na wola kɔ-fannu na Mari ye. Wo wa minnu di wo yisi-sewanɛ la, wo ni wonu don nde bolo. Wo ye nala kɔ-fan minnu na, wo le kɛnu na, sɛnɛ wo, wodi-gbɛ wo, anubɛ silɛɛ.

⁶Yesekari-bilolamɛ wo, yesekara-yalafinyɛ wo, anubɛ yesekara-wulenmɛ, wo ni wonu don nde bolo anubɛ linɛn-kura-nyimɛ. Yesekeri min nadannɛ baa-siyi la wo,

⁷saga-yigi gbolo-kolonɛ wo, anubɛ gbolo-koloni-hakikɛ wo, wo ni na wo donu na wo bolo. Wo ni na kɔlɔma do la min tɔgɛ akasiya.

⁸Wo ni na tuli do la min si kɛ lɛnpu rɔ. Wo ni na kɔn-gbolo-suma-diyamɛ do la min si ma isɛnti la ka kɔn-gbole wo do basan kun-tiginuna dantɛgɛ-tuli la.

⁹Kuru-da-gbɛlɛ do minnu tɔgɛ ɔnikisi, wo ni wonu don n bolo anubɛ kuru-da-gbɛlɛ sifa donu. Kuri kɛ donu si sa saraka-masɔla-wɛla kura-kundi-fugbɛ anubɛ a kɔgɔ-dala-kurɛ ma.

¹⁰“Mari ara minnu nadan-bole yira ma la, boloma-wɔli-kɛlɛ minnu bi Isirɛla mɔgɛnu tɛma, wonu ni na ka wonu nadan.

¹¹Wo ni Marita Fani-Bɔn ladan, a tuwa-kurɛnu anubɛ a tuwa-gbolenu anubɛ a lundannu anubɛ a fɛrannu anubɛ a kɔlɔma-yannu anubɛ a bon-kɔnnu wodi-gbɛ si sa minnu kɔrɔ.

¹²Wo ni yorolan fanan nadan. Wo ni tɔn-kenkirɛ anubɛ a da-latogɔn ladan anubɛ a bi-kɔlɔmanu.

¹³Wo ni tebulu anubɛ a bi-kɔlɔmanu nadan anubɛ a fɛ-mirannu anubɛ biredi min bi sala wo kuma.

¹⁴Wo ni lɛnpu-kuri anubɛ a fɛ-mirannu nadan anubɛ a yi-lafɛnu anubɛ tuli min bi kɛla a rɔ.

¹⁵Wo ni isɛnti mintan tinɛ anubɛ a bi-kɔlɔmanu nadan anubɛ dantɛgɛ-tuli anubɛ isɛnti nyɛrɛ. Wo ni bɔn don-da-kurɛ ladan.

¹⁶Wo ni saraka-mintan-tinɛ ladan anubɛ a yalɛ min nadannɛ silɛɛ la, anubɛ a bi-kɔlɔmanu anubɛ a fɛ-mirannu. Wo ni yi-sigi-miran anubɛ a sigi-fan ladan.

¹⁷Wo ni kata-masansan-kurɛnu nadan anubɛ a kɔlɔma minnu si sɔ wodi-gbɛnu kuma. Wo ni kura-hakikɛ ladan min bi kirila tenbi-bolɔn la

¹⁸anubɛ Fani-Bɔn wo balan fannu, anubɛ kata-balan-fannu anubɛ a yilinu.

¹⁹Wo ni makiri-fen-sɛnimɛnu nadan Aruna anubɛ ala den-keinuna saraka-masɔ-wɔlɛla ko la anu si minnu dun anu kan na kan-tina-sɛnimɛ wo rɔ.”

²⁰Isirɛla mɔgɛ bɛɛ ya anu bɔ Musa dafɛ

²¹ka ta anuna kɔ-fannu bi tinɛ, Mari kɔ-sɔgɛ ya minnu bira, kɔni. Anu nara wonu na Marita Fani-Bɔn-wɔlɛla ko la anubɛ saraka-masɔlɛnuna makiri-fannu.

²²Kei anubɛ musi minnu sɔnta, wonu tara anuna bolo-kalama-dɛɛnnu na anubɛ anuna tolola-fannu anubɛ anuna dɛɛn-kɔlɔnɛnu anubɛ anuna kan-na-fan minnu nadannɛ sɛnɛ la ka wonu dantɛgɛ Mari ma. Anu nara anu mabɛn-fannu na ka wonu di Mari ma.

²³Kurɛ min tɔgɛ linɛn anubɛ yesekara-yalafinyɛ anubɛ yesekara-bilolamɛ anubɛ yesekara-wulenmɛ taranta minnu bolo, wonu tara wonu na ka anu dantɛgɛ Mari ma. Baa-siyi anubɛ saga-yigi gbolo-koloni-wulenmɛ anubɛ gbolo-koloni-hakikɛ do taranta minnu bolo, wonu fanan tara wonu dantɛgɛ Mari ma.

²⁴Wodi-gbɛ anubɛ silɛɛ ye minnu bolo, wonu nara wonu na Marila wɔlɛla ko la. Kɔlɔma min tɔgɛ akasiya, wo taranta minnu bolo, wonu nara wonu na wɔlɛ wola ko la.

²⁵Musi minnu kusan wurundi kɛla, wonu nara anuna yesekara-yalafinyɛ anubɛ yesekara-bilolamɛ anubɛ yesekara-wulenmɛ anubɛ linɛn-kura-nyimɛ la anu bolo ka wonu dantɛgɛ Mari ma.

²⁶Musi minnu kusan baa-siyi fanan wurundila, wonu ya wonu ma kasa-kurɛnu na ka wonu dantɛgɛ Mari ma.

²⁷Mɔgɔ-banu nara kuru-da-gbɛlɛnu na anu bolo minnu tɔgɛ ɔnikisi anubɛ kuru-da-gbɛlɛ sifa donu anu si min sa saraka-masɔla-wɛta kura-kundi-fugbɛ anubɛ a kɔgɔ-dala-kurɛ ma.

²⁸Anu nara tuli la min si kɛ lɛnpu rɔ. Anu nara kɔn-gbolo-suma-diyamɛ donu na anu bolo min si ma isɛnti la ka kɔn-gbole wo do basan dantɛgɛ-tuli la.

²⁹Mari ya min bɛɛsi fɔ ata wɔlɛla ko la Musa ye, Isirɛla mɔgɛnu nara wonu na. Kei wo, musi wo, anu ya anuna fen-bɔɛ kɛ anu yisi-sewanɛ la Mari ye.

³⁰Musa ya a fɔ Isirɛla mɔgɛnu ye ko, “Mari ara Yurila den-kei Bɛsalɛli yabɔ Yuda bɔnsɔn rɔ, Huri mamanɛ, kɔni.

³¹Mari ara ata sɛnbɛ di a ma alako a ni hɛnkili sɔrɔn ka wɔlɛ sifa donu kɛ-nya lɔn.

³²A ara mɔlɔni-ladan-hɛnkili di a ma alako a ni kusanya boloma-wɔlɛ kɛ sufa donu na iko sɛnɛ anubɛ wodi-gbɛ anubɛ sila-wɔlɛ.

³³A si ke kuru-da-gbɛlɛnu anubɛ kɔlɔmanu lɛsɛla ka kusanya wɔli-siyaman kɛla.

³⁴Mari ara Ahisimakila den-kei Oholiyabu yabɔ Dan bɔnsɔn rɔ ka ma Bɛsalɛli dɛnbɛnɛ la. A ara Oholiyabu anubɛ Bɛsalɛli yabɔ ka hɛnkili sɔrɔn alako anu ni mɔgɔ donu karan.

³⁵A ya hɛnkili di anu ma alako anu ni kusanya boloma-wɔlɛ kɛ sufa donu na iko yese-dan-nya ka linɛn-kura-hakikɛ ladan. Anu si yesekara-yalafinyɛ anubɛ yesekara-bilolamɛ anubɛ yesekara-wulenmɛ sɔgɔ linɛn-kura-nyimɛ wonu ma.