Read Kuranko Bɔ-Koe-Iyipiti 36 Bible Online

Bɔ-Koe-Iyipiti 36 - Kuranko bible

Bɔ-Koe-Iyipiti 36

¹“Mari ya boloma-wɔlɛ-kɛ-hɛnkili di min bɛɛ ma, Bɛsalɛli anubɛ Oholiyabu anubɛ mɔgɛ donu fanan, wonu ni Marita Fani-Bon-sɛnimɛ ladan iko Mari ya a fɔ Musa ye nya min.”

²Musa ya boloma-wɔli-kɛlɛ wonu kele minnu sewanɛ Marita wɔlɛ wo kɛ koe la ka a fɔ anu ye ko anu ni wɔlɛ wo dabira.

³Isirɛla mɔgɛnu nara Fani-Bon-miran minnu na, Musa ya wonu don boloma-wɔli-kɛlɛ wonu bolo. Hali wo, Isirɛla mɔgɛnu tora tala anuna kɔ-fannu na Musa wara sɔgɔma-wo-sɔgɔma.

⁴Mɔgɔ-hɛnkilimɛ minnu bi Fani-Bɔn wo wɔli kɛla, wonu bɔra anuna wɔli-kɛ-tinɛ ka ta Musa wara.

⁵Anu ya a fɔ Musa ye ko, “Mari ya minnuna ko fɔ ala wɔlɛla ko la, anu bara na a siyaman na ka tenbi wo la.”

⁶Musa ya a fɔ mɔgɛnu ye ko anu kana na kɔ-fan fenfen na tun Fani-Bɔn-wɔlɛla ko la. Anu ya kɔ-fan fɔlɔtɛ min sɔrɔn, wo ara a bɔ. Wo le ya a ma, mɔgɛnu ma na fenfen na tun.

⁸Kura-hakikɛ min tɔgɛ linɛn, anu ya wo ma Marita Fani-Bɔn la. Anu ya kurɛ wo walan tan bi ka anu ma Marita Fani-Bon-miran do la. Mɔgɛ minnu kusan boloma-wɔlɛ kɛla, wonu ya melikala muninyɛ[30] sɔgɔ kura-walan tan wo kelen-kelennamɛ ma yesekari subolo sawɛ kɛnu na, yesekara-yalafinyɛ wo, yesekara-bilolamɛ wo, anubɛ yesekara-wulan.

⁹Anu ya kurɛ wo bɛɛsi yanyɛ ma nunkan-nya mogan-ni-segin na. Anu ya anu kɔnɛ ma nunkan-nya nani na. Anu ya kurɛ wonu kɔnɛ anubɛ anuna yanyɛ rakɛnya bɛrɛtɛ!

¹⁰Anu ya kura-walan lolɛ tugun anu nyɔgɔn na. Wo kɔma, anu ya kura lolɛ doi fanan tugun anu nyɔgɔn na.

¹¹Kura-walan lolɛ minnu tugunnɛ anu nyɔgɔn na, anu ya kura-bilolamɛ bi ka a ma kurɛ wonu yili la ka anu tonte to. Kura lolɛ doi minnu fanan tugunnɛ anu nyɔgɔn na, anu ya wo fanan tonte ladan kura-bilolamɛ la.

¹²Anu ya kura loli kɛ tonte ma bi-loli la. Anu ya lolɛ doi fanan ma tonto bi-loli la. Anu ya tonte wonu nabɛn anu nyɔgɔn ma.

¹³Anu ya sɛnɛ-lundan bi-loli ladan ka kurɛ wonu tugun anu nyɔgɔn na lundan wonu na. Anu ya wo ma fani-belebele-wa kelen na wo rɔ min si Marita bɔn yamatogon.

¹⁴Anu ya baa-siyi ma kasa-kurɛ la ka wo ma Marita Fani-Bon-tuwa-miran do la. Anu ya wo ma kura-walan tan-ni-kelen na.

¹⁵Anu ya kura-walan tan-ni-kelen wonu takɛnya. Anu ya anuna yanyɛ ma nunkan-nya bi-sawa la, anu ya anu kɔnɛ ma nunkan-nya nani na.

¹⁶Anu ya kura-walan loli tugun anu nyɔgɔn na ka kura-walan wɔrɛ doi fanan tugun anu nyɔgɔn na.

¹⁷Kura-walan lolɛ minnu tugunnɛ anu nyɔgɔn na, anu ya wonu tonte bi-loli ladan a tɔnkɔn kelen tɔ. Anu ya kura-walan wɔrɛ doi fanan ma wo nya.

¹⁸Anu ya sila-lundan bi-loli ladan ka anu bila a tonte wonu tɔ alako a si ma kasa-kura biribara wa kelen na nya min worɔ.

¹⁹Anu ya saga-yigi gbolo-koloni-wulenmɛ donu bi ka Marita Fani-Bɔn yamatogon wo la. Anu ya gbolo-koloni-hakikɛ donu ma a tuwa-fan la fanan ka saga-yigi gbolo-koloni-wulenmɛ wo yamatogon wo la Marita bɔn kuma.

²⁰Anu ya akasiya kɔlɔmanu nadan fɛrannu na bon-gbungbɔnla ko la.

²¹Anu ya fɛran wonuna yanyɛ ma nunkan-nya tan na. Anu ya anu kɔnɛ ma nunkan-nya kelen ani a tala.

²²Anu ya fɛrɛn mogan to bolo-nyimɛ rɔ ka fɛrɛn mogan to bolo-maran rɔ. Anu ya wodi-gbɛ bi-nani sa fɛrɛn mogan kɔrɔ bolo-nyimɛ wara la ka wodi-gbɛ bi-nani sa fɛrɛn mogan kɔrɔ bolo-maran wara la. Anu ya fɛrɛn kelen-kelen bɛɛsi sɔ wodi-gbɛ fila-fila kuma. Anu ya fɛran wonuna tugun tinɛ ladan anu si sɔ wodi-gbɛ wonu kuma kan min. Anu ya Fani-Bon-fɛran bɛɛ rabɛn wo nya.

²⁷Anu ya fɛrɛn wɔrɔ sɔ Fani-Bɔn wo tele-yigi wara la,

²⁸ka fila sɔ a tonko filɛ rɔ.

²⁹Fɛrɛn filɛ min bi a tonke rɔ, anu ya wonu nabɛn a kilɛ fɛ. Bolo-kalama-dɛɛn minnu bi a maran wara la, anubɛ minnu bi bolo-nyimɛ wara la, anu ya wonu woenu bɛn anu nyɔgɔn ma gben!

³⁰Fɛran minnu bi tele-yigi waralɛ rɔ, wonu yatɛ bɛnta fɛrɛn segin ma. Anu ya wonu sɔ wodi-gbɛ tan-ni-wɔrɔ kuma. Anu ya fɛrɛn kelen-kelan wo bɛɛsi sɔ wodi-gbɛ fila-fila kuma.

³¹Anu ya sɛnɛ bolo-kalama-dɛɛn donu sɔ fɛran wonu ma bolo-maran wara la ka anu woe telen anu nyɔgɔn na min si ma kɔlɔma-yannu don tinɛ la. Anu ya a ma bolo-nyimɛ anubɛ tele-yigi wara la bɔn kɔma kilɛ la wo nya na le fanan. Anu ya sɛnɛ sa fɛran wo bɛɛ ma ka akasiya kɔlɔma yan tan-ni-loli ladan alako Marita Fani-Bɔn fɛrannu ta si kiri nya min sɔdɔ, ka sɛnɛ sa wonu ma. Anu ya kɔlɔma lolɛ kɛnu nadon bolo-kalama-dɛɛn kɛnu tɔ bolo-maran wara la ka kɔlɔma yan lolɛ doi ladon bolo-kalama-dɛɛn doinu tɔ bolo-nyimɛ wara la wo nya le. Anu ya a toe kɔlɔma lolɛ ladon bolo-kalama-dɛɛn wonu tɔ a kɔma kilɛ la tele-yigi wara la. Anu ya kɔlɔma yan min rakankan fɛrannu tɛma, wonu bɔra a dan doi ma ha ka ke a dan doi ma.

³⁵Anu bi kura-hakikɛ min kelela linɛn, anu ya wo ma yorolan la Bato-Bɔn burɔ. Mɔgɛ minnu kusan boloma-wɔlɛ kɛla, wonu ya melikala muninyɛ[31] sɔgɔ kurɛ wo ma yesekari subolo sawɛ kɛnu na, yesekara-yalafinyɛ wo, yesekara-bilolamɛ wo, anubɛ yesekara-wulan.

³⁶Anu ya akasiya bon-kɔn nanɛ ladan ka sɛnɛ sa wonu ma ka wonu sɔ wodi-gbɛ nani kuma.

³⁷Kura-hakikɛ min tɔgɛ linɛn, anu ya wo ma bɔn don-da-kurɛ la. Mɔgɛ minnu kusan, wonu ya mɔlɔnɛ donu sɔgɔ kurɛ wo ma yesekari subolo sawɛ kɛnu na, yesekara-yalafinyɛ wo, yesekara-bilolamɛ wo, anubɛ yesekara-wulan.

³⁸Anu ya akasiya bon-kɔn loli ladan ka sɛnɛ sa wonu ma. Anu ya silɛɛ lalee ka bon-kɔn wonu sɔ wonu kuma.