Read Kuranko Bɔ-Koe-Iyipiti 38 Bible Online

Bɔ-Koe-Iyipiti 38 - Kuranko bible

Bɔ-Koe-Iyipiti 38

¹A ya saraka-mintan-tinɛ ladan akasiya kɔlɔma la. A ya a sɔɛ ma nunkan-nya sawa la. A ya a yanyɛ ma nunkan-nya loli la ka a kɔnɛ ma nunkan-nya loli la. A ya a tɔnkɔn nanɛ bɛɛsi rakɛnya bɛrɛtɛ!

²A ya saraka-mintan-tinɛ anubɛ a bolon nanɛ wo ladan nya-kun-kelen. A ya silɛɛ sa saraka-mintan-tinɛ wo kan tinɛ bɛɛ ma.

³A ya saraka-mintan-tinɛ wo fɛ-miran bɛɛsi ladan silɛɛ la, bugura-makɔ-fannu wo, sɔbulunu wo, yele-purupuru-mirannu wo, sogo-sɔgɔ-lunyɛnu wo, anubɛ ta-kɔ-mirannu.

⁴A ya silɛɛ ladan yalɛ la ka silɛɛ wo bolo-kalama-dɛɛn nani ladan ka wonu sɔ yalɛ wo tɔnkɔn nanɛ la. A ya yalɛ wo dun saraka-mintan-tinɛ burɔ. Wo tora saraka-mintan-tinɛ wo tɛma.

⁶A ya saraka-mintan-tinɛ wo bi-kɔlɔmanu nadan akasiya kɔlɔma la ka silɛɛ sa wonu ma.

⁷A ya a bi-kɔlɔmanu don bolo-kalama-dɛɛn wonu woe rɔ saraka-mintan-tinɛ tɔnkɔn filɛ rɔ. A ya a burɛ rakolonya fɔ a ya sila-yalɛ min dɔrɔn dun a burɔ.

⁸Musi minnu bi wɔlila Marita Fani-Bɔn dafɛ dagɛ kɔma kilɛ la, wonu nara anuna sila-nyɛrɛ-mafɛlannu na ka anu ma kɔ-fan la Mari ye. Bɛsalɛli ya wonu ma yi-sigi-miran anubɛ a sigi-fan la.

⁹Musa ya Marita Fani-Bɔn kata rabɛn. A ya linɛn-kura-nyimɛ nunkan-nya kɛmɛ bi ka kata bolo-nyimɛ waralɛ masansan wo la.

¹⁰A ya kɔlɔma mogan ladan. A ya silɛɛ ladan ka wonu sa kɔlɔma wonu kɔrɔ. A ya wodi-gbɛ ma lundannu anubɛ gbɛsɛ-gbɛsannu na ka wonu ma linɛn-kurɛ wonu dun-fan la.

¹¹A ya a bolo-maran waralɛ fanan ma wo nya. A ya kata-kurɛla yanyɛ ma nunkan-nya kɛmɛ la. A ya kɔlɔma mogan ladan ka silɛɛ sa wonu kɔrɔ. A ya wodi-gbɛnu ma lundannu anubɛ gbɛsɛ-gbɛsannu na ka wonu ma linɛn-kurɛ dun-fan la.

¹²A ya kata wo tele-yigi waralɛ kɔnɛ ma nunkan-nya bi-loli la. A ya a kata-kɔlɔmanu ma kɔlɔma tan la. A ya sila tan ladan ka wonu sa kɔlɔma tan wonu kɔrɔ. A ya wodi-gbɛnu ma lundannu anubɛ gbɛsɛ-gbɛsannu na ka wonu ma linɛn-kurɛ dun-fan la.

¹³Kata kɔnɛ min telennɛ tele-bɔɛ la, a ya wo ma nunkan-nya bi-loli la.

¹⁴A ya kata-kɔlɔma sawa ladan minnu si sɔ tele-bɔɛ bolo-nyimɛ rɔ, sila sawa si na sa minnu kɔrɔ. A ya linɛn-kurɛ nunkan-nya tan-ni-loli ladan, anu si na min kiri nyɔ.

¹⁵A ya kata-kɔlɔma sawa ladan minnu si sɔ tele-bɔɛ bolo-maran rɔ, sila sawa si na sa minnu kɔrɔ. A ya linɛn-kurɛ nunkan-nya tan-ni-loli ladan anu si na min kiri nyɔ.

¹⁶Kura-hakikɛ min tɔgɛ linɛn, a ya wonu ma kata-masansan-kurɛ la.

¹⁷A ya wodi-gbɛ sa kata-kɔlɔma wo bɛɛsi kuma. A ya wodi-gbɛ-lundannu anubɛ gbɛsɛ-gbɛsannu nadan. A ya silɛɛ sa kɔlɔma kelen-kelan wo bɛɛsi kɔrɔ. A ya kɔlɔma wo bɛɛsi tugun anu nyɔgɔn na wodi-gbɛ-gbɛsɛ-gbɛsannu na.

¹⁸Boloma-wɔli-kɛlɛ minnu kusan kura sɔgɔla, wonu ya yesekara-yalafinyɛ anubɛ yesekara-bilolamɛ anubɛ yesekara-wulan bi ka mɔlɔnɛ do sɔgɔ linɛn-kurɛ wo ma. A ya kɔlɔma nani ladan minnu si na sɔ sila nani kuma tenbi-bolɔn wo la. A ya wodi-gbɛ sa tenbi-bolɔn kɔlɔma bɛɛsi kuma. A ya silɛɛ sa kɔlɔma kelen-kelan wo bɛɛsi kɔrɔ. Anu si na kurɛ min kiri tenbi-bolɔn wo la, a ya wola yanyɛ ma nunkan-nya mogan na. A ya a kɔnɛ ma nunkan-nya loli la iko kata-masansan-kurɛ kɔnɛ ye nya min. A ya wodi-gbɛ-lundannu anubɛ gbɛsɛ-gbɛsannu ladan.

²⁰A ya kata-balan-fannu anubɛ Marita Fani-Bɔn balan-fannu ma silɛɛ la.

²¹Fan minnu mara Marita Fani-Bɔn sɔ-fannu na, wonu yatɛ le wonu na. Musa ya a fɔ Lifayi bɔnsɔn-mɔgɛnu ye ko wonu ni fan kɛnu yatɛ sɛbɛ. Arunala den-kei Itamarayi, wo mara sɛbɛli-kɛlɛnu kunyɛ la.

²²Yurila den-kei Bɛsalɛli, Huri mamanɛ ka bɔ Yuda bɔnsɔn rɔ, wo mara boloma-wɔli-kɛlɛ damasi kun-tigi la ka fan wo bɛɛ ladan iko Mari ya a fɔ Musa ye nya min.

²³Ahisimakila den-kei Oholiyabu min bɔra Dan bɔnsɔn rɔ, wo mara Bɛsalɛli dɛnbɛnɛ la Fani-Bɔn mirannu nadan-koe rɔ. Oholiyabu mara boloma-wɔli-kɛlɛnu kun-tigi la ka kɔlɔma lɛsɛ anubɛ ka yese dan anubɛ ka sɛnɛ-mɔlɔnɛ ladan.

²⁴Mɔgɛnu nara sɛnɛ minnu na ka a don Marita Fani-Bɔn wara-koe rɔ, wo damasila gbiliyɛ manɛ iko keminɛ mɔgɔ tan-ni-lolila gbiliyɛ manɛ nya min. Anu ya wo suman a kilɛ fɛ iko a di Mari ye nya min.

²⁵ Mɔgɛnu nara wodi-gbɛ minnu na ka a don Marita Fani-Bɔn wara-koe rɔ, wo damasila gbiliyɛ manɛ iko keminɛ mɔgɔ bi-loli anubɛ yi kalɔn nanila gbiliyɛ manɛ nya min. Anu ya a suman a kilɛ fɛ iko a di Mari ye nya min.

²⁶ Kei minnu siyi ara tenbi san tan-ni-kɔnɔntɔ la, wo kelen-kelennamɛ-bɛɛsi nara wodi-gbɛ minnu na, wo kelen-kelen gbiliyɛ manɛ iko wodi-mɛlɛn kelanna gbiliyɛ ye nya min. Anu ya wo mɔlɔn tɛgɛ a kilɛ fɛ iko a di Mari ye nya min. Kei min bɛɛsi nara wodi-gbɛ kɛnu na, anu ya anu tɔgɛ sɛbɛ. Kei wonu bɛɛsi lakofunɛ yatɛ bɛnta mɔgɔ waga kɛmɛ wɔrɔ, mɔgɔ waga sawa, mɔgɔ kɛmɛ loli ani bi-loli (603,550) ma.

²⁷Anu ya wodi-gbɛ min nalee ka a sa Marita Fani-Bon-sɔ-mirannu anubɛ yorolan-dun-kɔnnu kɔrɔ, wola gbiliyɛ manɛ iko yi durɔmu tan-ni-filɛla gbiliyɛ ye nya min. Anu ya wodi-gbɛ minnu sa fɛran wonu kɔrɔ, wonu fila filɛla gbiliyɛ manɛ le iko yi kalɔn wɔrɛla gbiliyɛ ye nya min.

²⁸Wodi-gbɛ-toe min tora, Bɛsalɛli ya wo donu sa kata-kɔlɔmanu kuma tala ka donu ma lundannu anubɛ a gbɛsɛ-gbɛsannu na.

²⁹Anu ya silɛɛ minnu dantɛgɛ Mari ma, wo bɛɛsi lakofunɛla gbiliyɛ manɛ iko kemini mɔgɔ bi-sawa ani mɔgɔ lolɛla gbiliyɛ manɛ nya min.

³⁰Anu ya silɛɛ wo do sa Fani-Bɔn wo bon-kɔnnu kɔrɔ minnu bi don-dɛ la. Anu ya silɛɛ wo do ladan saraka-mintan-tinɛ anubɛ a fɛ-mirannu na.

³¹Anu ya silɛɛ wo donu bi ka a sa kata-kɔlɔmanu kɔrɔ. A ya donu bi ka wonu sa kɔlɔma wonu kɔrɔ minnu bi tenbi-bolɔn la. Anu ya donu ma Fani-Bon-balan-fannu na anubɛ kata wo balan-fannu.