Read Kuranko Bɔ-Koe-Iyipiti 39 Bible Online

Bɔ-Koe-Iyipiti 39 - Kuranko bible

Bɔ-Koe-Iyipiti 39

¹Anu ya yesekari subolo sawɛ kɛnu bi ka saraka-masɔla-wɛ makiri-mirannu nadan wonu na, yesekara-yalafinyɛ wo, yesekara-bilolamɛ wo, anubɛ yesekara-wulan. Anu ya anu nadan Aruna ye iko Mari ya a fɔ Musa ye nya min nun. Aruna tenbi wɔlila Kan-Tina-Sɛnimɛ rɔ, a si to makiri-miran wonu bila.

²Kura-hakikɛ min tɔgɛ linɛn, anu ya wo ma saraka-masɔla-wɛta kura-kundi-fugbɛ la. Anu ya yesekara-yalafinyɛ wo, a bilolamɛ wo, anubɛ yesekara-wulan bi ka wo ma kura-kundi-fugbɛ wo sɔgɔ-fan la ka sɛnɛ do sa kurɛ wo ma.

³Anu ya sɛnɛ gbesi ka a ma fagbatara! Anu ya wo ratiitii ka a ma iko yesekari. Anu ya wo fanan sɔgɔ kura-kundi-fugbɛ wo ma iko anu ya yesekari subolo sawɛ wonu fanan sɔgɔ a ma nya min.

⁴Anu ya kura-yili fila sɔ kura-kundi-fugbɛ wo tɔnkɔn filɛ la ka wo kiri a kɛɛ kuma.

⁵Butɛ-kiri-fan min nadannɛ iko kura-kundi-fugbɛ wo, anu ya wo tugun kura-kundi-fugbɛ wo la. Anu ya linɛn-kurɛ ladan butɛ-kiri-fan wo la. Anu ya yesekara-yalafinyɛ anubɛ yesekara-bilolamɛ anubɛ yesekara-wulan anubɛ sɛnɛ-yesekari sɔgɔ wo ma iko Mari ya a fɔ Musa ye nya min nun.

⁶Anu ya kuru-da-gbɛlɛ fila bi minnu tɔgɛ ɔnikisi. Anu ya Isirɛla bɔnsɔn-mɔgɔ tan-ni-filɛ tɔgɛ sɛbɛ wonu ma. Anu ya kuri wonu sigi tinɛ ladan sɛnɛ-mɔlɔnɛ wo rɔ.

⁷Anu ya kuru filɛ wonu sa saraka-masɔla-wɛta kura-kundi-fugbɛ kɛɛ filɛ kuma alako kuri wonu ni ma tamasere la Isirɛla mɔgɛnu ye iko Mari ya a fɔ Musa ye nya min nun.

⁸Boloma-wɔli-kɛlɛ min kusan, wo ya linɛn-kurɛ bi ka a ma kɔgɔ-dala-kurɛ la. Anu ya a ladan iko saraka-masɔlɛta kura-kundi-fugbɛ ladannɛ nya min. Anu ya a sɔgɔ yesekara-yalafinyɛ anubɛ yesekara-bilolamɛ anubɛ yesekara-wulan anubɛ sɛnɛ-yesekari la.

⁹Anu ya a rakunbɛn ka a tɔnkɔn nanɛ bɛɛ rakɛnya. Anu ya a kɔnɛ ma bira kelen. Anu ya ala yanyɛ ma bira kelen.

¹⁰Anu ya kuru-da-gbɛlɛ gbaranda nani kankan a ma. Gbarandɛ fɔlɔtɛ wo kurinu tɔgɛ le kɛnu na, rubi wo, topasi wo, anubɛ ɛmarɔdi.

¹¹A gbarandɛ fila nyɔgɛ wo kurinu tɔgɛ le kɛnu na, tukɔsi wo, safaira wo, anubɛ daimon.

¹²A gbarandɛ sawa nyɔgɛ wo kurinu tɔgɛ le kɛnu na, opɛli wo, agati wo, anubɛ amɛtisi.

¹³A gbarandɛ nani nyɔgɛ wo kurinu tɔgɛ le kɛnu na, bɔrɔ wo, ɔnikisi wo, anubɛ yasipa. Anu ya sɛnɛ-mɔlɔnɛ do ladan kuru-da-gbɛlɛ kɛnu si sa min tɔ ka anu kankan kɔgɔ-dala-kurɛ kɛ ma.

¹⁴Anu ya kuri wonu sigi iko Isirɛla bɔnsɔn tan-ni-filɛ tɔgɛ ye nya min ka bɔnsɔn tan-ni-fila kelen-kelennamɛ-bɛɛsi tɔgɛ sɛbɛ kuri wonu ma.

¹⁵Anu ya sɛnɛ-yɔlɔkɔ-dɛbɛnɛ wonu sɔ kɔgɔ-dala-kurɛ wo la.

¹⁶Anu ya sɛnɛ-mɔlɔnɛ ladan ka sɛnɛ-dɛɛn-kɔlɔni fila ladan ka wonu sɔ kɔgɔ-dala-kurɛ tɔnkɔn filɛ la.

¹⁷Wo kɔma, anu ya sɛnɛ-yɔlɔkɔ-dɛbɛni filɛ wonu sɔ dɛɛn-kɔlɔni filɛ wonu na.

¹⁸Anu ya sɛnɛ-yɔlɔkɔ-dɛbɛnɛ wo kun filɛ fanan sɔ saraka-masɔlɛta kura-kundi-fugbɛ wo kanban-kunyɛ la.

¹⁹Anu ya sɛnɛ-dɛɛn-kɔlɔni fila sɔ kɔgɔ-dala-kurɛ rakunbɛn tinɛ tɔnkɔn filɛ la dugu la.

²⁰Anu ya sɛnɛ-dɛɛn-kɔlɔni fila dogbɛrɛ sɔ saraka-masɔlɛta kura-kundi-fugbɛ la a kɔrɔ butɛ-kiri-fan kan tɔ.

²¹Anu ya kɔgɔ-dala-kurɛ sɛnɛ-dɛɛn-kɔlɔni filɛ doi fanan kiri saraka-masɔlɛta kura-kundi-fugbɛ la. Anu ya a kiri anu nyɔgɔn na yili-kolo-bilolamɛ la wo nya alako kɔgɔ-dala-kurɛ ni to a butɛ-kiri-fan kan tɔ. Wo le si a ma, kɔgɔ-dala-kurɛ ti bɔ saraka-masɔla-wɛta kura-kundi-fugbɛ wo la. Anu ya wo bɛɛ ma iko Mari ya a fɔ Musa ye nya min nun.

²²Anu ya kura-bilolamɛ do bi ka a ma saraka-masɔlɛta duruku-ba-wɛ la.

²³Anu ya duruki wo kan tɛgɛ ka saraba sa duruki wo kan ma woletɔ nyɔ ti fara yona.

²⁴Kɔlɔma-gbɔɛ min tɔgɛ pamakarani, anu ya wola muninyɛnu nadan duruki wo da-gbole la. Anu ya wonu nadan yesekara-yalafinyɛ anubɛ yesekara-bilolamɛ anubɛ yesekara-wulan la ka wonu ma duruki wo da-gbole bunsan la.

²⁵Anu ya sɛnɛ-tɛlen-dɔgɔmanɛnu kiri tala pamakaranila muninyɛ wonu tɛma duruki wo da-gbole la iko Mari ya a fɔ Musa ye nya min nun.

²⁷Anu ya linɛn-kurɛnu bi ka anu ma saraka-masɔlɛnuna durukinu na Aruna anubɛ ala den-keinu ye.

²⁸Anu ya linɛn-kura-hakikɛ ma saraka-masɔlɛnuna fulɛnu na anubɛ anuta kurusi-kundinu.

²⁹Kura-sɔgɔlɛ ya saraka-masɔlɛnuta butɛ-kiri-fannu nadan ka a sɔgɔ a kin na yesekara-yalafinyɛ anubɛ yesekara-bilolamɛ anubɛ yesekara-wulan la iko Mari ya a fɔ Musa ye nya min nun.

³⁰Anu ya sɛnɛ ladan ka a ma fagbatara! Anu ya a sɛbɛ sɛnɛ wo ma ko, “Dantɛgɛnɛ Mari Ma.”

³¹Anu ya yesekara-bilolamɛ sɔ a la alako a ni kiri saraka-masɔlɛta fulɛ la iko Mari ya a fɔ Musa ye nya min nun.

³²Isirɛla mɔgɛnu ya Marita Fani-Bon-wɔlɛ laban iko Mari ya a fɔ Musa ye nya min.

³³Anu nara wo bɛɛsi la Musa wara, a tuwa-kurɛnu anubɛ a lundannu anubɛ a fɛrannu anubɛ a kɔlɔma-yannu anubɛ a bon-kɔnnu anubɛ wodi-gbɛ kɛ minnu si sa fɛrannu anubɛ bon-kɔnnu kɔrɔ.

³⁴Anu nara bɔn wo tuwa-fannu na, saga-yigi gbolo-kolonɛ anubɛ kɔnkɔbara gbole anubɛ yorolan fanan na.

³⁵Anu nara tɔn-kenkirɛ anubɛ a da-latogɔn anubɛ a bi-kɔlɔmanu na.

³⁶Anu nara tebulu anubɛ a fɛ-mirannu na anubɛ biredi min bi sala tebulu wo kuma.

³⁷Anu nara lɛnpu-kuri anubɛ a fɛ-mirannu na anubɛ a yi-lafɛnu anubɛ tuli min bi kɛla a rɔ.

³⁸Anu nara isɛnti-mintan tinɛ la anubɛ dantɛgɛ-tuli anubɛ isɛnti nyɛrɛ anubɛ bɔn don-da-kurɛ la anu bolo.

³⁹Anu nara saraka-mintan-tinɛ anubɛ a sila-yalɛ la anubɛ a bi-kɔlɔmanu anubɛ a fɛ-mirannu anu bolo. Anu nara yi-sigi-miran anubɛ a sigi-fan la.

⁴⁰Anu nara kata-masansan-kurɛnu na anubɛ a kɔlɔmanu anubɛ a wodi-gbɛnu, kɔlɔmanu si sɔ minnu kuma. Anu nara linɛn-kura-hakikɛ la min bi kirila tenbi-bolɔn la anubɛ kata-balan-fannu, anubɛ kata yilinu.

⁴¹Anu nara makiri-fen-sɛnimɛnu na Aruna anubɛ ala den-keinuna saraka-masɔ-wɔlɛla ko la wonu si minnu don anu kan na Kan-Tina-Sɛnimɛ rɔ.

⁴²Isirɛla mɔgɛnu ya wɔlɛ bɛɛsi kɛ iko Mari ya a fɔ Musa ye nya min.

⁴³Musa ya a yen min kɛ anu bara wo damasi ma iko Mari ya a fɔ a ye nya min, a duwara anu ye.