Read Kuranko Bɔ-Koe-Iyipiti 40 Bible Online

Bɔ-Koe-Iyipiti 40 - Kuranko bible

Bɔ-Koe-Iyipiti 40

¹Mari ya a fɔ Musa ye ko,

²“I ni nta Fani-Bɔn sɔ san karɛ fɔlɛ a tele fɔlɛ ma.

³I ni tɔn-kenkirɛ ladon Fani-Bɔn wo burɔ ka yorolan dun kenkirɛ wo ya ma.

⁴Biredi si sa tebulu min kuma, i ni wo ladon ka a fɛ-mirannu tabɛn. I ni lɛnpu ladon ka a lamalan.

⁵I ni isɛnti mintan tinɛ ladon ka a sigi Kan-Tina-Sɛnimɛ rɔ yorolan wo dafɛ. I ni Bɔn don-da-kurɛ dun Fani-Bɔn wo don-dɛ la.

⁶“I ni saraka-mintan-tinɛ sigi Fani-Bɔn telen tɔ luyi ma.

⁷I ni yi-sigi-miran sigi Fani-Bɔn anubɛ saraka-mintan-tinɛ tɛma ka yi kɛ a rɔ.

⁸I ni kata mini Fani-Bɔn ma ka kurɛ dun tenbi-bolɔn la.

⁹“I ni dantɛgɛ-tuli do bi ka do kɛ Fani-Bɔn anubɛ a fɛ-miran bɛɛsi ma woletɔ anu si sɛninya nde, Mari yala.

¹⁰I ni tuli do kɛ saraka-mintan-tinɛ anubɛ a fɛ-mirannu ma, wo le si a ma, wonu fanan si sɛninya.

¹¹I ni tuli do kɛ yi-sigi-miran anubɛ a sigi-fan ma ka wonu sɛninya.

¹² “I ni ta Aruna anubɛ ala den-keinu na Fani-Bɔn tenbi-bolɔn la ka anu ku yi la nyɔ.

¹³I ni saraka-masɔla-wɛta makiri-mirannu bila Aruna kan na. I ni dantɛgɛ-tuli wo do bi ka a kɛ a kunyɛ rɔ ka a dantɛgɛ nde, Mari ma woletɔ a si nta saraka-masɔ-wɔlɛ kɛ.

¹⁴I ni saraka-masɔ-durukinu bila Arunala den-keinu fanan kan na

¹⁵ka tuli kɛ anu fanan kunyɛ rɔ iko i ya a ma anu fa la nya min. Anu fanan si nta saraka-masɔ-wɔlɛ kɛ. I wara tuli min kɛ anu kunyɛ rɔ kɛ la, wo si a ma, anu si to saraka-masɔ-wɔlɛnu kɛla n ye ha tumɛ min di nde, Alla ye.”

¹⁶Musa ya wo bɛɛ ma iko Mari ya a fɔ a ye nya min.

¹⁷Anuna bɔɛ Iyipiti wo san filɛ karɛ fɔlɛ tele fɔlɛ ma, anu ya Marita Fani-Bɔn mumɛ bɛɛsi sɔ.

¹⁸Musa ya Marita Bon-gbungbɔn layɛlɛ. A ya fɛrannu sɔ wodi-gbɛnu kuma ka kɔlɔma-yannu nadon bolo-kalama-dɛɛnnu woe rɔ ka sɛnbɛrɛn-kɔnnu sɔ.

¹⁹A ya bon-gbungbɔn tuwa kurɛ wonu na ka kurɛ wonu yamatogon gbole wonu na iko Mari ya a fɔ a ye nya min nun.

²⁰A ya tɔn-walan filɛ wonu sa tɔn-kenkirɛ wo rɔ. A ya a bi-kɔlɔmanu don bolo-kalama-dɛɛnnu woe rɔ ka a da latogon.

²¹A ya tɔn-kenkirɛ ladon Bɔn la. A ya yorolan dun sɛnbɛrɛn-kɔnnu na iko Mari ya a fɔ a ye nya min nun.

²²A ya tebulu ladon Bɔn la Kan-Tina-Sɛnimɛ rɔ ka a sɔ Fani-Bɔn bolo-maran wara la. Yorolan ye anubɛ tɔn-kenkirɛ tɛma.

²³A ya biredinu sa tebulu wo kuma iko Mari ya a fɔ a ye nya min.

²⁴A ya lɛnpu ladon Bɔn la ka a sigi Kan-Tina-Sɛnimɛ rɔ bolo-nyimɛ rɔ.

²⁵A ya lɛnpu wonu namalan iko Mari ya a fɔ a ye nya min.

²⁶A ya isɛnti mintan tinɛ ladon Bɔn la yorolan da kɔrɔ.

²⁷A ya tɛ tugu isɛnti la iko Mari ya a fɔ a ye nya min.

²⁸A ya saraka-mintan-tinɛ sigi Fani-Bɔn don-dɛ telen tɔ luyi ma. A ya saraka-mintantɛ anubɛ bu-munke mintan nyɔ kuma iko Mari ya a fɔ a ye nya min.

³⁰A ya yi-sigi-miran sigi Fani-Bɔn anubɛ saraka-mintan-tinɛ tɛma ka yi kɛ a rɔ.

³¹Musa anubɛ Aruna anubɛ Arunata den-keinu ba don Marita kata wo burɔ tumɛ min, yanni anu ni Allata wɔlɛ kɛ nyɔ, anu si anu bole anubɛ anu kian maku yi wo la iko Mari ya a fɔ Musa ye nya min.

³³A ya kata mini Fani-Bɔn ma ka kurɛ dun tenbi-bolɔn la. Musa ban wɔlɛ kɛ damasi mala,

³⁴ Marita banda-fin-gbɛ wo ya Fani-Bɔn wo yamatogon. Marita wan-takanɛ donta Fani-Bɔn wo la.

³⁵Wo le ya a ma, Musa ma sisi donna Fani-Bɔn la wo wati rɔ.

³⁶Banda-fin-gbɛ wa a mayɛlɛ san ma tumɛ min, Isirɛla mɔgɛnu si tagama dabira.

³⁷Kɔnɔ fananta banda-fin-gbɛ wo burunnɛ bɔn wo kuma, anu ti anu maga muk!

³⁸Tele rɔ, a manɛ iko banda-fin-gbɛ, suyi rɔ, a manɛ iko tɛ. Anu tora a yenna wo nya na le tuma-wo-tuma.