Read Kuranko Bɔ-Koe-Iyipiti 8 Bible Online

Bɔ-Koe-Iyipiti 8 - Kuranko bible

Bɔ-Koe-Iyipiti 8

¹Mari ya a fɔ Musa ye ko, “Ta a fɔ mansɛ ye ko a ni nna mɔgɛnu boloka. Anu ni ta n bato tinɛ wulɛ rɔ.

²Ni a ya a ban anu boloka-koe ma, n si ala nyamanɛ bɛɛ tɔrɔ turukɔɔkɔnu na.

³Turukɔɔkɔ wonu si Nayɛli bɛ lafa. Wonu si bɔ bɛ rɔ ka ta ale mansɛla bolɔn la. Anu si taran a sa tinɛ rɔ anubɛ ala mɔgɔ-banuna bɔnnu na anubɛ ala nyamanita-mɔgɛnuna bɔnnu na anubɛ ala biredi mintan tinɛnu burɔ, hali ala biredi-gbesi-mirannu burɔ, anu si wo bɛɛsi lafa.

⁴Turukɔɔkɔ wonu si to gbangbanna ale anubɛ ala mɔgɔ-banu anubɛ ala nyamanita-mɔgɛnu kuma.”

⁵Mari ya a fɔ Musa ye ko, “A fɔ Aruna ye ko a ni ala sewuri rasagan bɛnu kuma anubɛ yi-bolɔnnu anubɛ dalɛnu ka turukɔɔkɔnu nana Iyipiti nyamanɛ kuma.”

⁶Woletɔ Aruna ya sewuri wo rasagan Iyipiti yinu kuma. Nba, turukɔɔkɔnu yɛlɛta ka Iyipiti nyamanɛ lafa pen!

⁷Mansɛla kofo-dan wonu fanan ya anu sanka Aruna ma anuta kofo-denyɛ rɔ ka turukɔɔkɔ donu nana Iyipiti nyamanɛ rɔ.

⁸Mansɛ ya Musa anubɛ Aruna kele. A ko, “Wo ni wota Mari madiya ko a ni turukɔɔkɔ kɛnu bɔ ma tɛma. N si ata mɔgɛnu boloka worɔ ko anu ni ta sarakɛnu bɔ wola Mari ye.”

⁹Musa ya a fɔ mansɛ ye ko, “N si Alla madiya wo ye sewɛ rɔ. Ile si kun wati min ma, i ye wo le fɔla n ye. N ni na Alla madiya ile anubɛ ila mɔgɔ-banu anubɛ ila nyamanita-mɔgɛnu ye alako turukɔɔkɔ kɛnu ni bɔ wo tɛma, fɔ minnu bi bɛ rɔ yɛ!”

¹⁰Mansɛ ko, “Nba, sina i ni na madiyali kɛ n ye.” Musa ko, “N si a ma iko i wara a fɔ n ye nya min alako i ni a lɔn ko Alla-dogbɛrɛ sa nyɔ min bi iko mata Mari Alla.

¹¹Turukɔɔkɔ minnu bi wo tɛma, wonu si ban wo tɛma fɔ minnu bi bɛ rɔ.”

¹²Musa anubɛ Aruna bɔra mansɛ yakɔrɔ. Mari ya turukɔɔkɔ minnu nana mansɛ kan ma, Musa ya Mari madiya ale mansɛ ye wonuna ko la.

¹³Mari ya Musala madiyalɛ yabi. Turukɔɔkɔ wonu damasi fagara, a bɔnnu na wo, a lu-kɔndɛnu wo, a sɛnɛnu tɔ wo.

¹⁴Iyipiti kɛnu ya turukɔɔkɔ suyi wonu nadɛn belenna. Wonu tuli sumɛ ratiira anu kun na pu!

¹⁵Kɔnɔ ale mansɛ ya a yen nkɛkuna, tɔrɔyɛ ara bɔ a kuma, a ya a yisi gbɛlɛya tun gbon! Mari kuman-kan bɔra-a-la iko a ya a fɔ nya min. A ma sɔn anuna kumɛ birala. (3) Muruntu-mɛrɛntɛnu Bara-Koe

¹⁶Mari ya a fɔ Musa ye ko, “A fɔ Aruna ye ko a ni ala sewuri wo bi ka dugi gbesi a la. Dugu-gbangban bɛɛ si yɛlɛma muruntu-mɛrɛntɛnu na Iyipiti nyamanɛ kan tinɛ bɛɛ rɔ.”

¹⁷Anu ya a ma wo nya le iko Mari ya a fɔ nya min. Aruna ya sewuri wo bi ka dugi gbesi a la. Dugu-gbangban wo yɛlɛmanta muruntu-mɛrɛntɛnu na Iyipiti nyamanɛ kan tinɛ bɛɛ rɔ.

¹⁸Mansɛla kofo-dannu ya anu taya ka muruntu-mɛrɛntɛnu nabɔ anuta kofo-denyɛ rɔ kɔnɔ anu ma ke wo mala. Muruntu-mɛrɛntɛ wonu tora mɔgɛnu anubɛ anuna kolo-fannu tɔrɔla.

¹⁹ Ale mansɛla kofo-dan wonu ya a fɔ ale mansɛ ye ko, “Alla nyɛrɛ bole ye kɛ rɔ.” Mansɛ ya a yisi gbɛlɛya kɛ kɔma tun a nani nyɔgɛ ko. A ma sɔn Musa anubɛ Aruna kuman-kan birala. Iko Mari ya a fɔ nya min, a kuman-kan bɔra-a-la. (4) Yɔlɛnu Bara-Koe

²⁰Mari ya a fɔ Musa ye ko, “Mansɛ tenbi tala yi dɛ la tumɛ min sinan subaga ma, i ni suri ka ta a taran kilɛ la. I ni a fɔ a ye ko nde, Mari kan le kɛ la ko a ni nta mɔgɛnu boloka alako anu ni ta n bato tinɛ.”

²¹Mari ya a fɔ tun ko, “Ni a ma sɔn nna mɔgɛnu boloka-koe ma, n si yɔlɛnu nana ale mansɛ kan ma anubɛ ala mɔgɔ-banu anubɛ ala nyamanita-mɔgɛnu. Yɔlɛ wonu si tagbaya anu ma ka anuna bɔnnu nafa. Anu si siyaya ka dugi kumafin.

²²“Wo wulɔn tele nyɛrɛ rɔ, n si dan-nafarɛ sa Iyipiti nyamanɛ anubɛ Kosɛn nyamanɛ tɛma, nna mɔgɛnu siginɛ kan min. Yɔlɛ wonu ti ke wola nyamanɛ rɔ muk! Wo si a lɔn worɔ ko nde, Mari le wɔlila nyamanɛ kɛ kun na.

²³Sina, n si dan-nafarɛ sa nna mɔgɛnu anubɛ mansɛla mɔgɛnu tɛma. Wo si ma ko-makawanɛ la wo yala.”

²⁴Wo banda kɛ, Mari ya a ma wo nya le. Yɔlɔ-yogomɛnu donta mansɛ anubɛ ala mɔgɔ-banuna bɔnnu na. Iyipiti nyamanɛ bɛɛ tinyanta yɔlɛ wonu bolo.

²⁵Mansɛ ya Musa anubɛ Aruna kele, a ko, “Wo ni sarakɛ bɔ wola Alla ye yan nyamanɛ kɛ rɔ.”

²⁶Musa ko, “Wo ti bɛn kamasɔrɔn ma si Iyipiti kɛnu tanɛ do ma sarakɛ la kɔrɛ mata Mari Alla ye. Ni ma ya Iyipiti kɛnu tanɛ do ma sarakɛ la anu yala, anu ti ma mabon kuri la, wa?

²⁷Ma si tele sawa tagama kɛ ka ta wulɛ rɔ ka sarakɛ bɔ mata Mari Alla ye iko a ya a fɔ ma ye nya min nun.”

²⁸Mansɛ ko, “N si wo boloka alako wo ni sarakɛ bɔ wota Mari Alla ye wulɛ rɔ kɔnɔ wo kana ta wula-yan la. Nba, wo ni madiyali kɛ n ye.”

²⁹Musa ko, “N ba bɔ yan tumɛ min, n si Mari madiya ko yɔlɛ kɛnu ni bɔ ile mansɛ anubɛ ila mɔgɔ-banu anubɛ ila nyamanita-mɔgɛnu fɛ sina. Kɔnɔ i kana yanfɛ sigi ma la ka mala mɔgɛnu baya tun ka a fɔ ko i ti sɔn ka mala mɔgɛnu boloka alako anu ni ta saraka-bɔ-tinɛ Mari ye.”

³⁰Musa bɔra ale mansɛ dafɛ ka ta Mari madiya tinɛ.

³¹Mari ya a ma iko Musa ya a madiya nya min. A ya yɔlɛ wonu bɔ ale mansɛ anubɛ ala mɔgɔ-banu anubɛ ala nyamanita-mɔgɛnu fɛ. Hali yɔlɛ wo kelen bɛrɛn ma to anu fɛ Iyipiti nyamanɛ wo rɔ.

³²Hali wo, mansɛ ya a yisi gbɛlɛya tun. A ma sɔn mɔgɛ wonu boloka-koe ma.