Read Kuranko Bɔ-Koe-Iyipiti 9 Bible Online

Bɔ-Koe-Iyipiti 9 - Kuranko bible

Bɔ-Koe-Iyipiti 9

¹(5) Iyipiti Kolo-Fannu Faga-Koe Mari ya a fɔ Musa ye ko, “Ta a fɔ mansɛ ye ko nde, Hiburunuta Mari Alla kan le kɛ la ko a ni nta mɔgɛnu boloka alako anu ni ta n bato tinɛ.

²Ni a ya a ban anu boloka-koe ma,

³wola kolo-fan minnu bi wo bolo, nde, Mari si kiraya-fitinɛ lana wonu kan ma, hali a soee wo, a sofɛlɛ wo, anubɛ a nyomɛnu.

⁴Mari si dan-nafarɛ to Isirɛla mɔgɛnu anubɛ Iyipiti mɔgɛnuna kolo-fannu tɛma. Isirɛla mɔgɛnutɛ ti faga mumɛ!”

⁵Mari ara a latɛgɛ nun ko a si kabana-koe kɛ ma nyamanɛ kɛ rɔ sina.

⁶Banda kara tumɛ min, Mari ya wo ma iko a ya a fɔ nya min. Iyipiti kɛnuna kolo-fan bɛɛsi fagara kɔnɔ hali Isirɛla mɔgɔ-den-kelenta kolo-fan ma faga.

⁷Mansɛ ya mɔgɛ donu sɔ ka ta Isirɛla mɔgɛnuta kolo-fannu mafɛlɛn, ni min mara wonutɛ la. Kɔnɔ anu ya a yen hali wonutɛ kelen ma faga. Hali wo, ale mansɛ ya a yisi gbɛlɛya. A ma sɔn mɔgɛ wonu boloka-koe ma. (6) Sumunɛ Sigi-Koe Mɔgɛnu Ma

⁸Mari ya a fɔ Musa anubɛ Aruna ye ko, “Wo ni ta biredi mintan tinɛ ka ta-gbangban do bi wo bolo tɔ. Musa si ta-gbangban wo lafili san ma mansɛ yala.

⁹Wo ra si nyɛnsɛn Iyipiti nyamanɛ kuma ka ma sumunɛ la Iyipiti mɔgɛnu anubɛ kolo-fannu ma.”

¹⁰ Anu ya biredi mintan tinɛ ta-gbangban bi ka anu sɔ mansɛ yakɔrɔ. Musa ya ta-gbangban wo lakɛ san ma. Wo mara sumunɛ la mɔgɛnu anubɛ kolo-fannu ma.

¹¹Mansɛla kofo-dan wonu ma ke anu sɔla Musa yakɔrɔ sumunɛ wonuna ko la kamasɔrɔn sumunɛ sigira kofo-dan wonu ma anubɛ Iyipiti mɔgɛ bɛɛ.

¹²Mari ya mansɛ yisi gbɛlɛya. A ma a tole masɔ anuna kumɛ la. Iko Mari ya a fɔ Musa ye nya min nun, a kuman-kan wo bɔra-a-la. (7) Banda-Kole Wara-Koe

¹³Mari ya a fɔ Musa ye ko, “I ni suri tala a fɔla mansɛ ye ko nde, Hiburunuta Mari Alla le ya a fɔ ko a ni nna mɔgɛnu boloka alako anu ni ta n bato tinɛ.

¹⁴N si tɔrɔya-fitinɛ lana mansɛ nyɛrɛ anubɛ ala mɔgɔ-banu anubɛ ala nyamanita-mɔgɛnu kuma. Anu ni a lɔn ko nde, Alla nyɔgɔn sa duninya kɛ rɔ.

¹⁵A fɔ ale mansɛ ye ko n si ke n bole rasaganna le ale anubɛ ala mɔgɛnu kan ma ka kiraya-fitinɛ lagbɛlɛya anu kuma. Anu na ni to dogbe!

¹⁶ N bara a to a niyi la alako n ni nna sɛnbɛ mayira, woletɔ duninya-mɔgɛ bɛɛ si n tɔgɛ lɔn.

¹⁷Kɔnɔ ha bi, ale mansɛ wasinɛ, a sa sɔnna nna mɔgɛnu boloka-koe ma.

¹⁸Woletɔ kɛ nyɔgɔn tumɛ sina, n si banda-kole layigi anu kuma min nyɔgɔn ma ma bɛ Iyipiti nyamanɛ rɔ kebi Iyipiti ko dabirara.

¹⁹Woletɔ a fɔ ale mansɛ ye ko a ni kilayɛ lata ala nyamanita-mɔgɛnu ma kaka ka a fɔ anu ye ko, mɔgɔ wo, kolo-fen wo, bɛɛ ni ta kan-tina-latankanɛ do rɔ banda-kole ti ke anu ma kan min. Ni fenfen tora gbɛ ma, a ma ta kan-tina-latankanɛ do rɔ, banda-kole si yigi wonu kuma ka anu faga.”

²⁰Mansɛla mɔgɔ-ba minnu kilanta Mari la, wonu ya anuna yɔɔnnu anubɛ anuna kolo-fannu naburi banda-kole kɔrɔ ka anu nata kan-tina-latankanɛ donu tɔ.

²¹Marita kumɛ bɔrɔ ma taran Iyipiti mɔgɛ minnu ye, wonu ya anuna yɔɔnnu anubɛ anuna kolo-fannu to gbɛ ma.

²²Mari ya a fɔ Musa ye ko, “I bole rasagan san ma woletɔ banda-kole si yigi Iyipiti nyamanɛ kuma. A si mɔgɛnu anubɛ kolo-fannu faga. Hali anuna ki-fannu, a si wonu tinya Iyipiti nyamanɛ kan tinɛ bɛɛ rɔ.”

²³Musa ya ala sewuri rasagan san ma. San tora sɛrɛnna. Banda-kole anubɛ sangbalamɛ tora yigila dugi ma Iyipiti nyamanɛ kan tinɛ bɛɛ rɔ.

²⁴ Woletɔ banda-kole anubɛ sangbalamɛ tora yigila ka yogoya. Kebi Iyipiti ko dabirara, wo nyɔgɔn ma ke bɛ nyamanɛ wo rɔ.

²⁵Nima-fan min bɛɛsi tora gbɛ ma nun Iyipiti nyamanɛ rɔ, banda-kole ya wo bɛɛsi faga ka firɛrɔ-kɔlɔma dama rakerikeri.

²⁶Fɔ Kosɛn nyamanɛ dɔrɔn, Isirɛla mɔgɛnu bi kan tinɛ min, kɔni, banda-kole anubɛ san-sɛran ma ke nyɔ.

²⁷Ale mansɛ ya mɔgɛ do sɔ Musa anubɛ Aruna kele tinɛ. Ale mansɛ ya a fɔ anu ye ko, “N bara bila wota Mari la wati kɛ rɔ. Yoe ye wota Mari bolo. Malebɛ nta mɔgɛnu yiliki.

²⁸Wo ni Mari madiya kamasɔrɔn san-sɛran anubɛ banda-kole kɛ ara a lamoya ma kuma. N si wo boloka. Wo ti to yan tɔ tun.”

²⁹Musa ya a fɔ a ye ko, “N ba ta soe kɔma tumɛ min, n si n bole sigi Mari ye ka a madiya. San-sɛran si ban, banda-kole ti na tun alako ile mansɛ ni a lɔn ko duninya-tigi le maleta Mari la.

³⁰Kɔnɔ ile anubɛ ila mɔgɔ-banu, n ya a lɔn ko ha bi wo ma kilan Mari Alla la hali!”

³¹Anuna fui-fan[9] sufa fila tinyanta kamasɔrɔn kelan, wo ara ta mɔla nun. Doi wo ye a yi-bi-koe rɔ.

³²Kɔnɔ a su sawa nyɔgɛ min ma tinya, a ya a taran, wonu kolomɛ le nun.

³³Musa bɔra mansɛ dafɛ ka ta soe kɔma. A ya a bolo filɛ sigi Mari ye. San-sɛran anubɛ banda-kole ratora.

³⁴Ale mansɛ ya a yen tumɛ min ko banda-kole anubɛ san-sɛran la ara to, a ya a yisi gbɛlɛya tun. Anubɛ ala mɔgɔ-banu bilara Alla la tun ka anu ban Isirɛla mɔgɛnu boloka-koe ma. Mari kuman-kan bɔra-a-la iko a ya a fɔ nya min.