Read Kuranko Yobu 1 Bible Online

Yobu 1 - Kuranko bible

Yobu 1

¹Kei do ye nyɔ nun min tɔgɔ Yobu. A siginɛ Yusi nyamanɛ rɔ. Mɔgɔ-nyimɛ le ale la min bi Alla gbiliyala, ado a telennɛ a ye. A ye a mala a fɛrɛma bawo a ma di a ye a ni ko-yogo wo ko-yogo ma.

²Yobu ya den-kei wɔrɔnfila, dunmusu sawa sɔrɔn.

³Saga waga wɔrɔnfila (7,000) ye a bolo anubɛ nyomo waga sawa (3,000). Wo kɔma, sara-ninki waga kelen (1,000) taranta a bolo anubɛ sofɛlɛ kɛmɛ loli (500). Wo kɔma, wɔli-kɛ-den-siyaman bi a bolo duk! Mɔgɛ min bɛɛ ye Yorodan bɛ tele-bɔɛ wara la, ata fen-tigiyɛ kolo wonu bɛɛtɛ ko.

⁴Ala den-kei wonu kɛnɛna ladiyɛ ratantanna. Anu si anu nyɔgɔn kele ladiyɛ wo rɔ anubɛ anu tirisan-musu sawɛ wonu.

⁵Anu ba ladiyɛ kɛ, banda wa ka, Yobu si suri a lasɔla sɔgɔma ka sarakɛ bɔ ala dan kelen-kelennamɛ wo bɛɛ ye alako wonu ni sɛninya Alla yala. A ye wo mala bawo a ye a mirila ko tumado ala dan do ara Alla lafɛya, a sa min kalama.

⁶ Lunyɛ do, melikanu tara anu sɔ Alla yakɔrɔ a kɔndɔn tinɛ, mɔgɛnu fɛɛ-donnɛ fanan ye anu tɛma nun, Setanɛ, kɔni.

⁷Mari ya ale Setanɛ manyinika ko, “Ile ye nfen ma tinɛ nun?” Setanɛ ya a fɔ a ye ko, “N bɔnɛ yigi-ni-yɛlɛ kɛla ka n matagama duninya le tɔ nun.”

⁸Mari ya a fɔ a ye tun ko, “I ya nna wɔli-kɛla Yobu yen nun? Mɔgɔ-nyimɛ le ale la, ado a telennɛ. A nyɔgɔn sa duninya rɔ. A ye n batola. A ye a mala a fɛrɛma alako a kana na ko-yogomɛ ma.”

⁹ Setanɛ ya a manyinika ko, “Yobu wo si to ile batola wo nya na ni tɔnɔ-gbɛrɛkɛ sa a la, wa?

¹⁰Ale wo, ala denbayɛ wo, ala kolo-fannu wo, i ye anu natankala tuma-wo-tuma. Hali a ya a bole bila fenfen tɔ, ile si a ma, wo ni sabati a bolo. I wara kolo-fan minnu di a ma, wo si nyamanɛ wo lafa le.

¹¹Kɔnɔ nde lanɛ a la, fan min bɛɛsi ye a bolo wo la, ni i ya wonu bi, ale Yobu si i lafɛya i nyɛrɛ yala serr!”

¹²Mari ya a fɔ ale Setanɛ ye ko, “Tana ma wo la. Ko-wo-ko di i ye, i ni wo ma a bolo-fannu na kɔnɔ i kana ko-wo-ko ma ale Yobu nyɛrɛ la.” Setanɛ bɔra nyɔ.

¹³Lunyɛ do, ale Yobula dannu bi ladiyɛ rɔ ala den-kei-sarɛ warɛ,

¹⁴kilayɛ do burumatoe nara a fɔ ale Yobu ye ko, “Ma ye sara-ninkinu nawɔlila sɛnɛ rɔ, sofɛlɛnu fanan bi anu de-nyinina sɛnɛ wo fananna foolɛ rɔ,

¹⁵Sabiyanu nara bui ma ma ka ta kolo-fan wonu na. Anu ya ila wɔli-kɛlɛ dama faga tɛrr, fɔ nde min kelan kunyɛ bɔra a rɔ!”

¹⁶Yanni wo ni a kuman-kan wo laban, kilayɛ do burumatoe nara tun. Wo ya a fɔ ale Yobu ye ko, “San gbalamɛ ara ila saga-fɛ-biralɛnubɛ ila saga bɛɛsi faga tɛrr, fɔ nde min kelan kunyɛ bɔra a rɔ!”

¹⁷Yanni wo ni a kuman-kan wo laban, kilayɛ do burumatoe nara a fɔ ale Yobu ye tun ko, “Kaladiya bumali-kɛlɛ kurun sawa nara bui ma ma. Anu tara ila nyomɛ bɛɛ la ka ila wɔli-kɛlɛ dama faga tɛrr, fɔ nde min kelan kunyɛ bɔra a rɔ!”

¹⁸Yanni wo ni a kuman-kan wo laban, kilayɛ do burumatoe nara a fɔ ale Yobu ye tun ko, “Ila dannu bi ladiyɛ kun na anu kɔrɔ warɛ tumɛ min,

¹⁹tiriyɛ wo rɔ, fɔn-belebele nara ka bɔ wulɛ wara la. A ya bɔn lawuya anu kuma ka anu dama faga tɛrr, fɔ nde min kelan kunyɛ bɔra a rɔ!”

²⁰Yobu ya wonu namɔɛn tumɛ min, a ya ala duruki rafara yisi-tinya bolo. A ya a kunyɛ sii. A ya a laburun dugu ma ka Alla bato.

²¹A ko, “N bolo-kolɔn le sɔrɔnta. N bolo-kolɔn le ye fagala. Mari min ya anu di n ma, Mari kelan wo le wara anu bi. N si ale Mari tanto!”

²²Hali koe kɛ damasi ara sigi Yobu la, a ma a tɛgɛ sigi Alla ma ka hakɛ kɛ a la.