Read Kuranko Yobu 10 Bible Online

Yobu 10 - Kuranko bible

Yobu 10

¹N niyi-sɔgɛ la ara bɔ n na. Wo ni wo tole masɔ nta yasere-masa-yogomɛ la.

²E, Alla, i yandi, i kana n kunyɛ don gbaran rɔ. Ni n bi kiti-sufa min tɔ, wo yira n na.

³I wara ko-yogomɛ min ma n na, woletɔ i sewanɛ, nyɛ? Ile nyɛrɛ-nyɛrɛ ya nde min dan, nde ni gboya i ye tun, wa? I wara i kan-kɔ sɔ n na ka nyagalen karagbɛlɛnu na.

⁴I si ko nya-yen iko hadama-dan? I si fan ragbɛ nya min, wo tenbira hadama-dantɛ la pirr!

⁵I siyi-fɛ wuru iko male hadama-dantɛ, wa?

⁶Ni wo ma, nfenna i ye hakɛ bɛɛ fɛɛ nyinina n kan ma? Nfenna i ye a fɛ ka fɛɛ nyini n na?

⁷I ya a lɔn serr, ko fɛɛ-wo-fɛɛ sa n na. I ya a lɔn ko mɔgɔ-wo-mɔgɔ ti ke n bɔla ila sɛnbɛ kɔrɔ.

⁸I kɔɛn nyɛrɛ-nyɛrɛ ya nde dan. I kɔɛn kelan, wo le ye n halakila fanan.

⁹I miri de! I ya bɔnkɛ le bi ka nde dan. I ye nala n nunkula le tun iko gbangban?

¹⁰Ile le ya n kɛ n na burɔ iko nonɛ. Ile le ya a ma fanan, n tagbɛlɛyara nyɔ rɔ iko fɛnɛ.

¹¹I ya n fɛrɛ dan kole anubɛ fasɛ le la. I ya n kole yamatogon soge anubɛ gbole le la.

¹²I wara niyi anubɛ keninteya-bɛrɛ di n ma. I wara n makandan min kɛ, wo le ara a ma, n bara to n niyi la.

¹³Kɔnɔ kaka gbɛ, n bara a lɔn ko kɛ bɛɛ rɔ, i kɔnkɔnnɛ n ma ko-yogomɛ kɛ-koe la.

¹⁴I ye n nakɔrɔsila ka a lɔn ni n si hakɛ kɛ le alako i ni i ban n makoto-koe ma.

¹⁵Ni n ya hakɛ kɛ, n bara nanparan sɔrɔn i wara la kɔnɔ ni n ya ko-telennɛ kɛ, wo tɔnɔ mumɛ sa n ma. N bara miliya dɔgɔma-ma-de! N bara tunu nna dumɛ kɔrɔ iko mɔgɔ wa a mamin baan la.

¹⁶Ni n ya ko-nyima wo ko-nyima kɛ, i si kɛ n ma iko yarɛ ka n tɔrɔ ita sɛnbɛ-makawanɛ la.

¹⁷Wati-wo-wati, sereya-kurɛ ye i bolo n kan ma. I fonde ye tola bɔla dɛɛ! I ye tola n kɛlɛla dɛɛ!

¹⁸E, Alla, nfenna i sɔnta n ni sɔrɔn? Alako nun, n fagara yanni mɔgɛ ni n yen.

¹⁹Alako nun, n fagara yanni n ni ma mɔgɔni-gbuyi la. Alako nun, n bɔra n na burɔ nya min, n sara kanbɛ le tɔ.

²⁰Wati-kundu-nɛ min bi n bolo, ha bi, wo ma ban bɛ, wa? I fara n na alako wati-kundu-nɛ min bi n bolo, n ni taran n diya wo rɔ.

²¹A ti mɛ tun, n si ta bɛɛ ta tinɛ, ado n ti sɛgi tun. N bi tala pinpi-makilanni-bɛ le tɔ.

²²N bi tala kan min, fenfen sa nyɔ fɔ pinpi anubɛ nini-pinpi-nɛ anubɛ yakɔrɔ-mamɔɛ. Hali wan-takanɛ min bi nyɔ, wo mani de iko pinpi.