Read Kuranko Yobu 13 Bible Online

Yobu 13 - Kuranko bible

Yobu 13

¹Kuma-kura ma kɛnu na n ye. N bara kɛ damasi lamɔɛn nun.

²N ya ko lɔn iko wole. Wo ma tenbi n na kan-bo-kan.

³Kuma sa malebɛ wole tɛma. A ye mabɛ Alla Sɛnbɛ-Bɛɛ-Tigi le tɛma, ado n bi nna kiti lawulila mabɛ Alla tɛma.

⁴Wo ye tɔgɛ sala n na. Wo damasi mani de iko bɛsi-bɔlɛ min ti ke mɔgɔ lakɛndɛyala.

⁵Alako nun, wo ma kuma, mɔgɛ si wo lɔn hɛnkilimɛ la wo rɔ.

⁶Wo ni wo tole masɔ. Nde fanan ni ntɛ rakaran wo ye.

⁷Nfenna wole ye foninyɛ fɔla? Wo lara a la ko wola foninyɛ wonu si tɔnɛ di Alla ma, wa?

⁸Alla fɛka-sɔgɛ le wo la, wa? Wo si ma Alla dɛnbɛnɛ la kiti rɔ, wa?

⁹Ni Alla ya wo lakɔrɔsi a nya-bɛrɛbɛrɛ ma, wo kɛ-nya si kinya a yala, wa? Wo lara a la ko wo si ke Alla mayuwayala iko wo ye hadama-dan mayuwayala nya min, wa?

¹⁰Ni wo ya lafisayalɛ kɛ dogɔn rɔ, Alla si wo makuma.

¹¹Ata sɛnbɛ si a ma, wo ni kilan. A miran si wo kumakɔ.

¹²Wo ye tili minnu tɛgɛla, wonu mani de iko ta-gbangban. Wola fɛka-kumɛnu ta si bunden iko kɔrɔdagɛ.

¹³Wo ni fɛrɛ di n ma, n ni kuma. Ni ko-wo-ko bɔra kumɛ rɔ, nba, ale le wo la.

¹⁴N bara n niyi sa kalalunbi[3] rɔ.

¹⁵Hali ni Alla ya n faga, a bɔrɔ sa n ye tun. N si to nta kumɛ sala a kɔrɔ.

¹⁶Ni n ya n kerinteya kɛ fɔla, tumado wo si a ma, n ni kisi bawo karagbɛlɛ-wo-karagbɛlɛ ti sisi sɔla Alla yakɔrɔ.

¹⁷Wo ni wo tole masɔ nna kumɛ la. N bi min fɔla, wo ni wo lamɔɛn.

¹⁸N lanɛ a la ko n bara ban nta kumɛ rabɛnna, ado fɔ n ba yo sɔrɔn serr!

¹⁹Yon si n sɔsɔ kɛ ma? Ni n yo sa a rɔ, n si n fara n fɛɛ kɛ la ka faga.

²⁰E, Alla, i yandi, n bi ko fila pe le manyinikala i bolo. Ni i sɔnta wonu ma, n ti n dogon ile ma.

²¹A fɔlɔtɛ, i fara n tɔrɛ la. A fila nyɔgɛ, i fara n takilanna.

²²E, Alla, ni i fɔlɔn kumara, n si i yabi. Ni wo ma, nde fɔlɔn ni kuma, i ni n yabi.

²³Ni n bara hakɛ min nyɔgɔn ma, wo fɔ n ye. Ni n bara i lanyinɛ min kɛ, wo fɔ n ye.

²⁴Nfenna i wara i kan-kɔ sɔ n na ka n lɔn i yoge la?

²⁵A sɔgɛ ye i la ko i ni n takilan, ba? Yanba-kun-gbalɛ le nde la dɔrɔn! I ye bin-gbalɛ le dɔrɔn kɛlɛ-koe rɔ.

²⁶I wara ko-kunayanɛnu sɛbɛ n kan ma. Hali n dennɛ ya koe minnu ma, i ye n tɔrɔla wonuna ko la.

²⁷ I wara n kian sa banban la. I ye n kin-gbɛ lakɔrɔsila.

²⁸Ka a tɛgɛ wo ma, n na ara murun iko kɔn-tulunɛ. N na ara murun iko kura-kore.