Read Kuranko Yobu 16 Bible Online

Yobu 16 - Kuranko bible

Yobu 16

¹N bara ko-sufa kɛ-siyaman namɔɛn nun. Wola kɔntɔ-diya-kumɛ bɛɛ manɛ yisi-tinya le la nde ma.

³Wola kuma-pɔrɔtɔ-parata-dan sa, wa? Nyagbɛ mintan bi wo ma min bi a mala, wola kumɛ la ti ban?

⁴Ni n bi le iko wole ye nya min, n si ke kumala iko wole. N si n kunyɛ firifiri ka kuma-gbondanɛnu fɔ wole fanan ma.

⁵Kɔnɔ nde ti wo ma. N si wo kɔntɔ-diya-kumɛ fɔ. N ba min fɔ, wo si a diya don wole rɔ.

⁶Ni n kumara wo, nna dumɛ ti bɔ n ma. Ni n ma kuma wo, wo ti nna dumɛ bɔ n ma.

⁷E, Alla, i wara a ma, n fɛrɛ bɛɛ ra ara maga n ma. I wara nna denbayɛ bɛɛ ban n bolo.

⁸I wara kɛ n ma iko i yoge. N bara to gbole anubɛ kolenu denu gbansan ma gbɛ, wo le wara a ma, mɔgɛ bɛɛ ye n yilikila.

⁹Allala fondo-labɔɛ ya n gbegbe. N bi nna gboyanayɛ yenna a kolonkɛ ma.

¹⁰Mɔgɛnu bi anu dɛ murundula-a-la n ma. Anu bi n dɛ le tatiila. Anu bi kɛla n ma nya-kun-kelen.

¹¹Alla ara n don ko-yogoma-kɛlɛnu bolo. A ara n don karagbɛlɛnu bolo.

¹²N bi lafɛrɛ rɔ nun kɔnɔ Alla ya n bira n kan la ka n fisifisin. Alla ara n ma ala kalabɛn mafɛlɛn tinɛ la.

¹³Ala kalabɛnnu bi bɔla kan tinɛ bɛɛ rɔ. Anu bi donna n tɔ ka n yele rawuya dugi ma. Hali wo, a sa kinikinina n ma.

¹⁴A ye tola n matanban-tanbanna. A ye buila n ma iko kɛlɛ-kurugbɛ.

¹⁵A manɛ iko kasa-kurɛ ara kara n fɛrɛ ma. N yisi-tinyanɛ siginɛ gbangban rɔ.

¹⁶N bara di ha n yɛ bɛɛ ara wulen pui! N yɛ ara yiri ka gban a kolɔn rɔ.

¹⁷Hali wo, nde ma karagbɛlɛya-ko-wo-ko ma. N bi Alla madiyala n yisi bɛɛ la.

¹⁸Ile kanbɛ, anu ya ko-yogomɛ min sigi n na, i kana mabɛ wonu nakunu. N yele tenbi telenbagayɛ kelela ka bɔ dugi rɔ, i kana kilɛ tɛgɛ a ma.

¹⁹ Sereyɛ do ye n bolo Arinyɛni tɔ. A si sɔ nta kumɛ la nyɔ.

²⁰N diyana-mɔgɛnu bi n mayɛlɛnna. N ya-yi ye yigila Alla yala biribiri!

²¹Alamɛ mɔgɔ do ni Alla madiya n ye iko mɔgɛ si madiyali kɛ a diyana-mɔgɛ ye nya min.

²²San-dande ara to nna tagama nasɛgibɛlɛla ko la.