Read Kuranko Yobu 19 Bible Online

Yobu 19 - Kuranko bible

Yobu 19

¹Wo si to n kɔndɔfilila wola kumɛnu na ha wati nyamintan?

³Tuma-wo-tuma, wo ye n mɔɛnna. Wo ti miliya n mɔɛn tinɛ lefan!

⁴Hali nde ara ko-yogomɛ le ma, nfenna wo si duma wo la?

⁵Wo mirinɛ ko wo tenbira nde la. Wo ara tɔrɔya-siyamɛ yen n kuma min kɛ, wo kana wo miri ko n yilikinɛ le.

⁶Wo ma a lɔn ko Alla gbɛ le kɛ la, wa? Wo le wara yili lasigi ka n bira.

⁷Hali n ya a fɔ ko mɔgɛnu bara ko-yogomɛ ma n na, mɔgɔ ti a tole masɔ n na. Hali n ba keleli-kɛ dɛnbɛnɛla ko la, n ti yo sɔrɔn.

⁸A ara kilɛ tɛgɛ n ma alako n kana tenbi. A ara pinpi burun nna kilɛ la bɛff!

⁹Alla ara nna gbiliyɛ bi n bolo ka nna sɔ tinɛ fɔrɔn n bolo.

¹⁰A ya n matugutugu n kan tinɛ bɛɛ rɔ. Yigi min bi n bolo, a ya wo wurun alako n ma ni fɔsɔ ka faga.

¹¹Alla ara diminya n ma. A ye n bira boloko-yogomɛ-kɛla.

¹²A ye ala kɛlɛ-dannu nanala n kɛlɛ tinɛ. Anu bara anu daga makɛ nna bɔnla minɛ rɔ n kɛlɛ-koe la.

¹³Alla ara a ma, n na-kelen-nyɔgɛ bɛɛ ara a kan-kɔ sɔ n na. Min ya n lɔn kɔrɔma la, nde ara ma sundan la wonu yala.

¹⁴N na-kelen-nyɔgɛnu bara anu masɛgi n na. N kenintenu bara nyina n ko salon!

¹⁵N duruta mɔgɛ minnu yiyala nun, wonu ma anu miri n ma tun. Hali nna wɔli-kɛ-musinu, wonu bi n bira boloko-yogomɛ-kɛla iko mɔgɔ-gbɛrɛ.

¹⁶N tenbi nna wɔli-kɛlɛ kelela, a ti n denkun. Hali n ya a madiya n dɛnbɛn-koe la, a ti sɔn.

¹⁷Hali n dɛ, a sumɛ ma di nna musi ye. Hali n na-kelen-nyɔgɛnu, anu ti anu gbɛrɛn n ma.

¹⁸Dennɛnu ba n yen, anu ni nyima n tɔ anu si n mayɛlɛn n kɔma kilɛ la.

¹⁹N diyana-mɔgɔ-bɛrɛbɛrɛnu bara anu dɛ bogoya n ma. Hali minnu di n ye kosɛbɛ, wonu bara anu kan-kɔ sɔ n na.

²⁰N fɛrɛ bɛɛ ara ka n kole ma. Fɔ mabɛ n darɔ-nyin min tonɛ.

²¹N diyana-mɔgɛ, a bɛnta, wo ni kinikini n ma. Alla kɔɛn ara n gbesi dugi la.

²²A sɔgɛ ye wo la, wo ni n bɛnsɛnkɔninya iko Alla ara n bɛnsɛnkɔninya nya min? Wo ara n tɔrɔ nya min kɛ la, wo ma a bɔ?

²³Alako nun, mɔgɛ do ya a miri nna kumɛ kɛnu ma ka anu sɛbɛ.

²⁴Ni wo ma nun, anu ni tɔntɛ bi nun ka kumɛ wonu sɛbɛ kuri ma. Anu ni a sɛbɛ alako a ni to duninya rɔ.

²⁵Kɔnɔ n ya a lɔn serr, ko n kunkalɛ ye nyɔ Arinyɛni tɔ. Nta wati wa ke, a si ma nna kiti-fɔlɛ la.

²⁶Hali n fɛrɛ ara ban n ma kirayɛ bolo, hali n fɛrɛ sa n na, fɔ n ba Alla yen serr!

²⁷N si Alla yen n ya-bɛrɛbɛrɛ kɛ la, ado n ba a yen, n si a lɔn de ko n diyana-mɔgɛ le. N sogesoge si to a yen-koe rɔ.

²⁸Wole ye a fɔla ko, “Ma si kei kɛ tɔrɔ kama? Ni i ya a yen ko a ye tɔrɔyala ka, a gbɛ le.”

²⁹Kɔnɔ wo ni kilan faan la wo nyɛrɛla ko la bawo Allata fondo-bɔɛ si hakɛ-tiginu tɔrɔ, yɔ! Wo si a lɔn ko ko-yogoma-kɛ laban le tɔrɔyɛ la.