Read Kuranko Yobu 20 Bible Online

Yobu 20 - Kuranko bible

Yobu 20

¹Yobu, ile le ya n nadiminya. N ti ke n muinna tun, wo le ya a ma, n bi i yabila.

³I ye kumɛ min fɔ tinɛ n ye wo la, wo ara n tɔrɔ kɔnɔ nde ya a lɔn n yisi rɔ n si i yabi nya min.

⁴Kebi Mari ya hadama-dan sigi dugu-kole kɛ kuma, ale ya a lɔn a ye nya min kebi fɔlɔ,

⁵ado wati-kundu-ni de karagbɛlɛta sewɛ la.

⁶Hali a wa yanya, a kunyɛ ni tugu san-kole la, hali a kunyɛ tugura banda-finyɛ la,

⁷a si ban iko fɔnyɔ wa gbangban bi. A lɔnbaga-kɔrɛnu kɔndɔ si fili ni a tara kan min.

⁸A si tunu yen, iko kiyo. A ti yen tun!

⁹A si tunu a sigi-tina-kɔrɛ rɔ. Minnu duruta a yenna nun, wonu ti a yen tun.

¹⁰A ara fan min bi bolo-kolɔnnu bolo nun karagbɛlɛyɛ la, ala dannu si to yili wonu sarala.

¹¹Hali a fɛrɛ-bɔnkɛ kin a ma nun, a ragbɛlɛ fanan, a ti mɛ, ale karagbɛlɛ si sɛgi gbangban rɔ.

¹²Karagbɛlɛyɛ di karagbɛlɛ ye. A si do to a dɛ rɔ alako a diyɛ kana ban a dɛ rɔ.

¹⁴Karagbɛlɛyɛ wo wa ke a burɔ tumɛ min, a si ma dawarɛ la a burɔ.

¹⁵Karagbɛlɛ ye fan min bɛɛ kankanna, a si wo lateseri. A ya min bɛɛ kankan mɔgɛ bolo, Alla si wo bɛɛ bɔ a bolo, hali min bi a burɔ.

¹⁶Karagbɛlɛ wo si min nayigi a burɔ, wo si ma a burɔ iko dawarɛ. Wo si a faga iko duguma-fan wa mɔgɔ kin.

¹⁷A ti ala nɔnfulu-ladɛnnɛ diya bɔ. Wo ti ma a bolo iko liyi anubɛ fɛnɛ.

¹⁸A ara tɔrɔya kɛ min bɛɛsi sɔrɔn la, a si foo wonu na. A ti fɛrɛ sɔrɔn ka ala fen-kolomɛ fenfen diyɛ bɔ

¹⁹bawo a ya wo bɔ bolo-kolɔnnu bolo ka anu mayɛlɛnnɛ to. A ya bɔnnu bi mɔgɛnu bolo a ma minnu sɔ.

²⁰Ala kɔrɔndiyɛ ti a wasa. A ma ke wonu fenfen namarala.

²¹A ara fan dɔn ha, fenfen sa a si min dɔn tun. Woletɔ ala sabatiyɛ ti mɛ!

²²Ala nɔnfuli wa wara tumɛ min, ala nɔnfulu-tigiyɛ si yɛlɛman mɔnɛ la ha a ni a digin dugi la.

²³Ni a si min dɔn, a ni wo dɔn fasai! Alla fonde si bɔ a kuma ka a tɔrɔ bɛrɛbɛrɛkɛ!

²⁴A tenbi a burila nɛgɛ-faan kɔrɔ, sila-kalabɛn si a bon.

²⁵Kalabɛn min bi tenbila a fɛrɛ-bɔnkɛ rɔ, yele si tinti wo sungban la. Kumakɔɛ si kɛ a ma.

²⁶A ara min bɛɛsi lamara a nyɛrɛ ye, wo dama si tinya. Hadama-dan ma tɛ min nadɛn, wo si anubɛ ala denbayɛ mintan gburr!

²⁷San-kole nyɛrɛ si ala ko-yogomɛnu nabɔ gbɛ rɔ. Dugu-kole si ma sereyɛ la a kan ma ka a yiliki.

²⁸Allata fondo-bɔɛ si tugu a kun na iko yi. A si tugu a bolo-fan bɛɛ kun na ka ta anu na Allata Kiti-Tɛgɛ-Lunyɛ.

²⁹Alla ye kɛ le mala karagbɛlɛnuna yarɔsigi la.