Read Kuranko Yobu 21 Bible Online

Yobu 21 - Kuranko bible

Yobu 21

¹Wo ni wo tole masɔ nna kumɛ kɛ la. Ni wo ya wo le dɔrɔn ma, wo si n yisi-kimɛ doni!

³Wo ni fɛrɛ di n ma, n ni kuma. N ba ban kumala, ni a di wo ye, wo ni to n mayɛlɛnna wo rɔ gbɛ!

⁴Nna kɛlɛ-nyɔgɔya sa mabɛ hadama-dannu tɛma. Ni wo ya a yen, n munyuni ma, n ya wo kɔrɛ lɔn.

⁵Wo ni n mafɛlɛn dɔrɔn, wo si a ma, wo ni kawa n ma ka wo bole sa wo dɛ la.

⁶Koe minnu bara kɛ nde la, n tenbi n mirila wonu ma tumɛ min, n si yɛrɛyɛrɛn kilan bolo.

⁷Nfenna Alla ye a mala, karagbɛlɛnu bi tola anu niyi la? A ye a mala, anu bi tɔnɛ anubɛ si-yan sɔrɔnna.

⁸Anuta dannu si sabati anu yala ka anuta soe datɛgɛ anu da kɔrɔ. Anu si to anu kɛndɛ la ha anu mamanɛnu ni koloya anu yala.

⁹Alla ti kasarɛ lana anuna bɔnnu na. Allata bosa sa anu kuma.

¹⁰Anuna kolo-fannu bi yirila, ado anuna kolo-fan wonu fenfen ti foo anuna dannu na.

¹¹Karagbɛlɛ wonuna dannu bi yigi-ni-yɛlɛ kɛla tolon la. Anu bi gberenya bɔla iko saga-dannu.

¹²Anu bi siginu sala sɔrɔn la. Anu bi sewala fulu-kan la.

¹³Karagbɛlɛnu bi anu siyi labɔla yisi-kimɛ rɔ. Anu ti tɔrɔ faga tinɛ.

¹⁴Karagbɛlɛnu bi a fɔla Alla ma ko, “Fara ma la. Ma sa nyinina i wara-koe lɔnna.

¹⁵Yon bi Alla Sɛnbɛ-Bɛɛ-Tigi kɛ la, ma ni min sako kɛ? Alla-madiya-koe si nfen nyinya ma ma?”

¹⁶Anu denu miri ko anu bi tala yarɔ anu nyɛrɛ sɛnbɛ le la. Kɔnɔ nde ma sɔn anuta miriya wo ma.

¹⁷Ha bi, mɔgɔ ti karagbɛlɛnuna lɛnpu yen dufenna. Ha bi, mɔgɔ ti tɔrɔyɛ yen nala karagbɛlɛnu ma. Ha bi, mɔgɔ ti Alla yen karagbɛlɛnu tɔrɔla a fondo-bɔnɛ la.

¹⁸Mɔgɔ ti Alla yen anu fɛla iko bin-gbalɛ ni wo ma, iko fɔnyɔ ye tala gbangban min na.

¹⁹Wole ko Alla si dan tɔrɔ ka a tɛgɛ a fala ko-yogomɛ ma. Ade! Fɔ Alla wa ko-yogoma-kɛlɛ nyɛrɛ le tɔrɔ ala ko-yogoma-kɛla ko la.

²⁰A bɛnta, hakɛ-tiginu ni tɔrɔ anu hakɛ kɛnuna ko la. Fɔ anu nyɛrɛ ni Alla Sɛnbɛ-Bɛɛ-Tigita fondo-bɔɛ rayen.

²¹A siyi wa ban tumɛ min, ala ko si taran ala dannu bara-koe rɔ, wa? Ni anu bi anu diya, ka, ni anu sa anu diya, ata sa wo rɔ!

²²Alla min bi melikanu kiti tɛgɛla, mɔgɛ si ke wo labilala?

²³Mɔgɛ donu kɛndɛyanɛ si to ha anu faga-wati. Anu fɛrɛ-lafanɛ si to anu ma bɛff! Anu si faga sewɛ anubɛ yisi-kimɛ rɔ.

²⁵Kɔnɔ mɔgɛ donu bi nyɔ, sewa ti taran anu yisi rɔ ha anu si faga tumɛ min. Ha anu si faga, anu yisi magboyanɛ anu bolo.

²⁶Kɔnɔ mɔgɛ bɛɛ si faga, ado mɔgɛ bɛɛ si togon fanani. Tunbinu si ban anu furinu dɔnna.

²⁷Kɔnɔ n ya a lɔn miriya-yoge min bi wo la nde kan ma. Wo ye nala n tɔrɔ-kan le ma.

²⁸Wole ye a fɔla ko, “Kun-tigi kɛla bɔn ye mintɔ gbɛ? Karagbɛlɛ kɛ warɛ ye mi? Anutɛ ma ban tinyana?”

²⁹Wo ara tagamanɛnu manyinika nun, ba? Anu bi nala dantɛgɛlɛ minnu kɛla, wo ma la wo la?

³⁰Anu si a fɔ ko Alla wa tɔrɔyɛ sigi mɔgɛnu ma tumɛ min, a si kinikini karagbɛlɛnu denu ma.

³¹Mɔgɔ-wo-mɔgɔ ti karagbɛlɛta karagbɛlɛyɛ sɔ a rɔ. Mɔgɔ-wo-mɔgɔ ti karagbɛlɛnuna karagbɛlɛyɛ yili sara anu na.

³²Karagbɛlɛ wa faga, anu ba ta a la kaburu-soe la, mɔgɛnu si a kanbɛ kandan.

³³Mɔgɔ waga yirika si ta a kanba-dɛ la. A ti kaburu-bɔnkɛla gbiliyɛ lɔn bawo a togonta a kin na!

³⁴Kɔnɔ kaka gbɛ, wo ye n yisi-kima-koe rɔ kuma-fufafuyinu na. Wola yabilɛ bɛɛ manɛ foninya-kumɛ le la!