Read Kuranko Yobu 24 Bible Online

Yobu 24 - Kuranko bible

Yobu 24

¹A bɛnta Alla Sɛnbɛ-Bɛɛ-Tigi ni wati-yɔnyɔn sa hadama-dan kiti-tɛgɛ-koe rɔ, ado ata mɔgɛnu sa a yenna karagbɛlɛnu kiti tɛgɛla.

²Mɔgɛnu bi dan-kurinu bɔla anu gbɛ rɔ, alako do ni sa anuta dugi kuma. Anu bi mɔgɛnuna sagɛnu kankanna ka wo kofu anuta kolo-fannu ma.

³Anu bi kelennɛnuna sofɛlɛnu bila anu bolo. Anu bi kɛɛ-musinuna sara-ninki bila anu bolo fɔrɔsɛ la ko fɔ anu ba ban anuna yili-kɔrɛ sarala.

⁴Anu bi bolo-kolɔnnuna yoe mala anu yiliki la. Anu bi a mala, fugarɛnu bi anu dogonna.

⁵Bolo-kolɔnnu bi anu de-nyini-fannu nyinina kan-tina-rakolɔnnu tɔ iko sofɛli-feremɛnu. Kan-tina-gbɛrɛkɛ sa anu bolo ka dɔntɛ nyini anuna dannu ye.

⁶Fɔ anu ba ta wɔliwɔlɛ kɛ mɔgɛnu ye anuna sɛnɛnu tɔ. Anu bi tala ki-fen-gbɔɛnu matɔnbɔnna mɔgɔ-yogomɛnuna nakɔɛnu tɔ.

⁷Anu gbu-makolɔn si ki. Burun-kura sa anu bolo kima-wati rɔ.

⁸Bandɛ si anu kima anu tenbi kɔnkɛnu tɔ. Fɔ anu ba anu burun farɛ kɔrɔ alako anu kana kimɛ.

⁹Karagbɛlɛnu si kelennɛnu don yɔɔnyɛ rɔ. Anu si bolo-kolɔnnuna dannu ma yili-sarɛnu na.

¹⁰Kɔnɔ bolo-kolɔn gbu-makolɔn si to. Hali anu tenbi dɔn-fen tɛgɛla, anu kɔnkɔtoe si to.

¹¹Anu si to tuli bɔla tulu-tiginu ye. Anu si to nɔnbɔ-gbɔ-yi burunna nɔnbɔ-tiginu ye kɔnɔ hali wo, anu kan lagbalanɛ.

¹²Mɔgɔ-tanbannɛnu bi anu kan nabɔla Alla ma soe burɔ kɔnɔ hali wo, Alla ti anu denkun. Fen-tiginu bi min sigila bolo-kolɔnnu ma, Allala ko sa wo rɔ.

¹³Mɔgɛ donu bi nyɔ, waan ma di wonu ye. Anu ti Allata kilɛ yen tele rɔ. Ata kilɛ si to-a-rɔ anu ma.

¹⁴A la wa fin, mɔgɔ-fagalɛ si ta bolo-kolɔnnu faga. A si ta kankanya-kɛ-tinɛ suyi rɔ fanani.

¹⁵Keni-kɛlɛnu bi suyi makɔnɔna. Anu si anu yakɔrɛ yamatogon alako mɔgɔ kana anu tagbɛ.

¹⁶Kankannu si bɔnnu keri suyi rɔ. Kɔnɔ tele rɔ, anu si anu dogon alako wan-takanɛ kana ke anu ma.

¹⁷Anu bi kilanna tele rɔ. Kɔnɔ pinpi bɔrɔ sa anu ye.

¹⁸Wole ko, “Yi ye tugula karagbɛlɛnu kun na ka ta anu na pon!” Wo ye a fɔla tun ko, “Karagbɛlɛla dugi ye Allata dankɛ kɔrɔ woletɔ mɔgɔ sa tala nyɔ tun dɔn-fen tɛgɛ tinɛ.”

¹⁹Wole ko, “Sayɛ si hakɛ-tiginu ban iko tele anubɛ dugu-wuyan si banda-kole ban nya min.”

²⁰Wo ko, “Hali a na ti a miri a ma tun, ado tunbinu bara ban a suyi dɔnna. Mɔgɔ si nyina a ko iko mɔgɔ ye nyinala kɔn-tulunɛ ko nya min.”

²¹Mɔgɛnu bi nyinala a ko bawo a ya kɛɛ-musinu bira boloko-yogomɛ-kɛ. Hina ma taran a rɔ gbandɛnu bara la.

²²Alla si sɛnbɛ-tiginu kasara a nyɛrɛta sɛnbɛ-makilannɛ la. Hali anu mirinɛ ko anu natankanɛ a kilɛ fɛ. Yili-latɛgɛ sa anu bolo ko anu si kisi.

²³Tumado Alla si sɔn ko anu ni sigi lafɛrɛ rɔ kɔnɔ a kolan bɛnnɛ anu ma tuma-wo-tuma.

²⁴Karagbɛlɛ wara-koe si to tala yarɔ wati-kundu-ni kɔrɔ kɔnɔ tɔ-a-la, a wara-koe si ma miyɔɔ, iko bin-wurunɛ, ado a si gbala fanan iko nyɔ-kerinɛ.

²⁵Mɔgɔ do si ke a fɔla ko foninyɛ le kɛ la, wa? Mɔgɔ do si ke a fɔla ko nna kumɛ kɛ kolo sa a rɔ, wa?