Read Kuranko Yobu 27 Bible Online

Yobu 27 - Kuranko bible

Yobu 27

¹A ye mabɛ Alla-nimɛ tɛma, ni n si foninya fɔ. Alla Sɛnbɛ-Bɛɛ-Tigi min ya a ban nna ko-latelennɛ ma, ado a ye n niyi lafinna n ma,

³fananta n bi n niyi wo lafɛla ale Alla bolo,

⁴kuma-yogoma ti bɔ n dɛ kɛ rɔ muk!

⁵N ti a fɔ ko wo ara tonyɛ fɔ muk! Ha saya si n taran, n nɔrɔnɛ a fɔɛ ma ko n yilikini ma.

⁶Ka a fɔ telenbagɛ le nde la, n ti fara wo fɔɛ la mumɛ! N yili latɛgɛni de wo ma feu!

⁷Minnu sɔnɛ n na, anu bi n kɛlɛla, alamɛ wonu tɔrɔta iko karagbɛlɛnu.

⁸Alla tenbi niyi bɔla mɔgɔ fɛrɛ rɔ, yigi-nyamintan bi Alla-lɔnbɛlɛ bolo wo wati rɔ?

⁹Tɔrɔyɛ tenbi nala a ma, Alla ti a wɔlɔ matɔlɔ a di-kɛ-kan la worɔ.

¹⁰Alako nun, anu ya Alla Sɛnbɛ-Bɛɛ-Tigita sewɛ sɔrɔn. Alako nun, anu ya Alla madiya.

¹¹N ni wo karan Allata kabana-koe wara-koe ma. N ni Alla Sɛnbɛ-Bɛɛ-Tigi miriya rakaran wo ye.

¹²Wo ara ban kɛnu tayenna wo nyɛrɛ ma, nfenna wo si don kun-takolonya-kumɛ kɛnu fɔɛ rɔ?

¹³Alla Sɛnbɛ-Bɛɛ-Tigi ye karagbɛlɛnu tɔrɔla nya min, n ni wo rakaran wo ye.

¹⁴Ni karagbɛlɛnu si den-kei siyaman sɔrɔn, kɔnkɛ ti bɔ wonu na, ado wonu kunyɛ si to kɛlɛ rɔ.

¹⁵Ni karagbɛlɛ wonuna den-toe minnu tora, kirayɛ si wonu natuntun kanbɛ rɔ. Hali anuna kɛɛ-musinu, wonu ti anu di.

¹⁶Tumado wodi-gbɛ-siyaman si taran karagbɛlɛnu bolo anu ti min dan lɔn. Fɛrɛya-bɔɛ minnu bi anu bolo, kurukurun ti wonu ban, tarali ti wonu ban.

¹⁷Kɔnɔ tɔ-a-la, mɔgɔ-nyimɛ donu si anuna fɛrɛya-bɔɛ wonu don anu ma. Ka tenbi wo la, mɔgɔ-telennɛ donu si anuna wodi-gbɛ wonu tala anu nyɔgɔn na.

¹⁸Karagbɛlɛnu bi bɔn minnu sɔla, wonu manɛ iko yalanyalan-yili. Ni wo ma, a si ma iko saga-fɛ-biralɛnuna togo-kore.

¹⁹Lunyɛ do, anu fen-tigi le tala anu sala kinɔgɔ rɔ kɔnɔ anu si kunden bolo-kolonyɛ la anu bolo.

²⁰Kilan ye tugula anu kun na iko yi-fɛ. Surɔ-fɔnyɔ si ta anu dununa kudai!

²¹Tele-bɔ-fɔnyɔ si anu bara-koe firan anu sigi-soe rɔ.

²²Fɔnyɔ ti kinikini anu ma, a si to tugula anu kun na. Hali anu ya anu taya nya-wo-nya, anu kunyɛ ti bɔ a rɔ.

²³Anu burumatoe tenbi tala, fɔnyɔ ye a dɛ gbesila anu kɔma. Ala kasara-mankan ye anu kumakɔla.