Read Kuranko Yobu 29 Bible Online

Yobu 29 - Kuranko bible

Yobu 29

¹Alako nun, n bi le kaka iko Alla ye n fɛ-birala wati min nun.

³Wo wati rɔ Alla ye n fɛ nun, ado n tenbi tenbila pinpi rɔ, Alla ye waan rakala n ma.

⁴Wo wati rɔ, fen bi n bolo nun, ado diyanayɛ min bi mabɛ Alla tɛma, wo ya nna bɔn lakanan.

⁵Alla Sɛnbɛ-Bɛɛ-Tigi ye n fɛ nun, ado wo wati rɔ, nna dannu kinkinɛ n na.

⁶Wo wati rɔ, n bi nonɛ bɔla nna ninkinu anubɛ nna baanu tɔ. Hali kurinu siya kan min, nna ki-fannu si nanfa nyɔ kubukubu!

⁷N tenbi tala n sigila mɔgɔ-banu tɛma nun,

⁸keminɛ-mɛsɛnu kɛnɛna kilɛ kala n ye, ado kɛmɔgɛnu si anu nasɔ ka n gbiliya.

⁹Mɔgɔ-banu si a sigi-a-la don, ka anu bole sa anu dɛ la.

¹⁰Hali mɔgɔ-ba-kolomɛnu, wonu si a sigi-a-la. A manɛ iko anu nagan wo gbarannɛ anu naganagan la.

¹¹Minnu bara n tɔgɛ lamɔɛn anubɛ minnu bara n yen, wonu damasi ye n tantola nna wɔli-nyimɛla ko la

¹²bawo bolo-kolɔnnu bi tɔrɔyɛ rɔ tumɛ min, n bi anu dɛnbɛna. N bi kelennɛnu dɛnbɛna minnu dɛnbɛna-gbɛrɛkɛ sa.

¹³Hali sayɛ ara gbɛrɛn mɔgɛ minnu ma, wonu kɛnɛna n tantola. Kɛɛ-musinu bi n sigi sala ka a tɛgɛ nna wɔli-nyimɛla ko la.

¹⁴Tuma-wo-tuma, n bi ko-latelennɛ kɛla, ado n ti ko-radunɛ kɛ mɔgɛnu tɛma muk!

¹⁵Fiyɔnnu yɛ le nde la. Namarɛnu kian le nde la.

¹⁶Bolo-kolɔnnu fa le nde la. Sundannu ba bila nanparan rɔ, n bi anu dɛnbɛna.

¹⁷N ya karagbɛlɛnu sɛnbɛ tinya ka mɔgɛnu bɔ anu bolo anu bi minnu tɔrɔla nun.

¹⁸N miri ko n si si-yan sɔrɔn ka faga nna bɔn la yisi-kimɛ rɔ.

¹⁹N mani de iko kɔlɔma min suli ti foo yi la. Kunbi siginɛ kɔlɔma wo yanba-kunyɛ la tuma-wo-tuma.

²⁰Tuma-wo-tuma, mɔgɛ bɛɛ ye n tantola. N tagbɛlɛyani de nun tuma-wo-tuma.

²¹N tenbi mɔgɛnu makawandila nun, anu bi anu tole masɔla nna kumɛ la a kin na!

²²N ba ban kumala tumɛ min, mɔgɔ-gbɛrɛkɛ ti do sa nna kumɛ kuma tun. Nna kumɛ diyanɛ anu tole la.

²³Nna kumɛ si anu nasewa iko bandɛ si sɛni-salɛ lasewa nya min.

²⁴Hali anu yisi magboyanɛ, anu ba n yakɔrɛ yen tumɛ min, anu si sewa.

²⁵N bi anuna koenu natɛgɛla anu ye nun iko mansɛ. N bi anu kun na iko kɛlɛ-den-kunyɛ. Minnu bi dila, n bi wonu yisi sala.