Read Kuranko Yobu 30 Bible Online

Yobu 30 - Kuranko bible

Yobu 30

¹Kɔnɔ kaka gbɛ, n kina minnu ko, wonu bi n tasɛla, ado fɔlɔ nun, hali wonu fanu ti ke nna wulinu dɛnbɛna nna sagɛnu kandanna.

²Mɔgɛ le wonu na minnu sɛnbɛ sa tun. Anu tafaganɛ, ado anu ti ke wɔlila nde ye.

³Anu kan fole la ara yigi kɔnkɛ bolo. Anu bi kɔn-sulinu dɔnna suyi rɔ wula-da-rakolɔn rɔ.

⁴Wula-da-rakolɔn wo rɔ, anu si ki-fan donubɛ kɔn-sulinu dɔn hali minnu diyɛ sa a la.

⁵Mɔgɛnu si anu gben anu tɛma ka sɔnkɔ anu ma iko kankannu.

⁶Anu siginɛ farannu tɔ. Anu si yi-woron-gbalanɛnu ma anu barɛnu na.

⁷Anu si to gbele-gbelenna wulɛ rɔ. Anu si anu nadɛn wɔnɔ-firɛ kɔrɔ.

⁸Mɔgɛnu bara anu denu minnu gben nun, anu magboyanɛ si to, ado mɔgɛnuna ko ti taran anuna ko rɔ.

⁹Kaka gbɛ, wonu denu bi n mayɛlɛn-sigi sala. Anuna dannu bara n ma yɛlɛnma-fan la.

¹⁰Anu bi n magboyala ka anu masɛgi n na fass! Anu bi anu nɔgɔ-yi kɛla n yakɔrɛ ma.

¹¹Alla ara n tafaga min kɛ, anu bi n bira boloko-yogomɛ-kɛla anu sɛnbɛ bɛɛ la.

¹²Mɔgɛ kɛnu bi anu nadɛnna n kan ma n kɛlɛ-koe la. Anu ya a ma ha, n ya n buri anu kɔrɔ. Anu tabɛnnɛ ka bui n ma.

¹³Anu bi kilɛ tɛgɛla n ma alako anu si n nɔ. Mɔgɔ-wo-mɔgɔ sa nyɔ min si anu nakala.

¹⁴N hɛnkili latɛgɛnɛ n kisi tinɛ min ma, anu bi tenbila gbangbanna wonu tɔ ka kɛ n ma. Anu bi tugula n kan ma.

¹⁵N kun ma ara kɔ kilan bolo. Nna gbiliyɛ bɛɛ ara ta iko fɔnyɔ. Lafɛrɛ min bi n ma, wo ara tenbi iko banda-finyɛ.

¹⁶N fagamatoe le kɛ la gbɛ! Fenfen ti bɔ nna dumɛ la tun.

¹⁷Suyi rɔ, n kole kɛ bɛɛ si n dumɛ. N bi dumɛ min kɔrɔ, wo ma ti kimɛ mumɛ!

¹⁸Alla ye nna duruki kan birala fɔrɔsɛ la. A ya n kan ramɔnsɔn ha n kan lagbalata.

¹⁹Alla ya n nabui bore rɔ, ado bɔnkɛ fisa n ko.

²⁰E, Alla, n bi i kelela kɔnɔ i sa a labirala. N ba i madiya, i ti i wɔlɔ matɔlɔ n na.

²¹I ye n bira boloko-yogomɛ-kɛla. I ye buila n ma i sɛnbɛ bɛɛ la.

²²I wara a ma, fɔnyɔ ara n fɛ ka ta n na. I ya n natinki-tanka ila banda-fin-fɔnyɔ la.

²³I wara saya gbɛrɛn n ma, mɔgɛ bɛɛ ta tinɛ, kɔni.

²⁴Mɔgɛ min bara ban kasarala, nfenna i ye wulila wo kan ma? N ti ko-wo-ko nɔ fɔ i ni kinikini n ma.

²⁵N ma di mɔgɔ-tɔrɔyanɛnuna ko la nun, ba? N yakɔrɛ ma ara mɔ nun bolo-kolɔnnuna ko la.

²⁶Nde ye sewɛ anubɛ wan-takanɛ le nyinina nun. Kɔnɔ yanni wo ni ma, fɔ n ya tɔrɔyɛ anubɛ pinpi min sɔrɔn.

²⁷Yakɔrɔ-mamɔɛ min bi n ma, wo ti ban. Tuma-wo-tuma, tɔrɔyɛ tun!

²⁸Wati-wo-wati, n yakɔrɛ sanɛ le a rɔ. N bi n sɔla nyama tɛma ka madiyali kɛ n dɛnbɛn-koe la.

²⁹N kuman-kan makinikininɛ. N kuman-kan manɛ iko wulu-feremɛ anubɛ gbingbinnyagan-kan.

³⁰N fɛrɛ la ara fin ka wolɔn. Kimɛ ara keri n kun na.

³¹Fɔlɔfɔlɔ nun, n bi sewa-sigi-sa-kannu namɔɛnna kɔnɔ kaka, n sa fenfen namɔɛnna fɔ saya-di-kɛ-kan anubɛ di-kɛ-kannu.