Read Kuranko Yobu 31 Bible Online

Yobu 31 - Kuranko bible

Yobu 31

¹N bara lanyiri kiri nun ko n yɛ kana bɔ sunkurɔn la.

²Ni min ya wo ma, Alla si nfen ma wo tigi la? Alla Sɛnbɛ-Bɛɛ-Tigi ti barayi-wo-barayi di a ma.

³Kɔnɔ karagbɛlɛnu si kasarɛ sɔrɔn. Ko-yogoma-kɛlɛnu si tɔrɔ.

⁴N ya ko-wo-ko ma, Alla ya wo lɔn. N tara kan-bo-kan, a kolan ye n gbere la.

⁵N bara n keli ni n bara karagbɛlɛyɛ sigi mɔgɛ la, ni wo ma, ka mɔgɛ bole labira.

⁶Alla wa n tasuma a kila-bɛrɛ fɛ, a si a lɔn n telennɛ nya min.

⁷Ni n bara kilɛ boloka tele-kelen-bɛrɛni, n ni a ma, karagbɛlɛyɛ ni n sagan a wara la, ni n bara kɔsɔ hakɛ-kɛ bolo,

⁸ado ni wo ara ma nun, alamɛ Alla ya a ma, nna ki-fannu ni tinya pɔsɔkɔ! Ni wo ma, alamɛ mɔgɔ-gbɛrɛkɛ ya nna ki-fannu dɔn n kɔma.

⁹Ni n miri ara ke n sigi-nyɔgɔla musi ma tele-kelen-bɛrɛni ka a makɔni bonda-dɛ la,

¹⁰alamɛ nna musi ya kei-gbɛrɛkɛ de-nyini ka ki a wara.

¹¹Karagbɛlɛyɛ sufa wo, a bɛnta ka miriya-yogoma-tigi wo faga.

¹²Ni a taranta, n bara ko sufa wo ma, n bolo-fan bɛɛ ni mintan nyahanama-tɛ rɔ.

¹³Nna wɔli-kɛlɛ do wa a yasere-masa n ye nun, n si n tole masɔ a la ka ko-latelennɛ kɛ a ye.

¹⁴Ni n ma wo ma nun, n si ke Alla yabila kama? Alla wa n kiti, n si nfen fɔ a ye?

¹⁵Alla min ya n dan, wo le ya nna wɔli-kɛlɛnu fanan dan.

¹⁶Ha bi, nde ma n ban bolo-kolɔnnu dɛnbɛn-koe ma. Ha bi, n ma kɛɛ-musinu to anuna yakɔrɔ-mamɔɛ rɔ.

¹⁷N tenbi n de-nyinina, ha bi, n ma kelennɛnu bɛn dɔn-fan rɔ.

¹⁸N ya mɔgɛ kɛnu fɛ-bira iko anu fa wo wati mumɛ bɛɛ kɔrɔ.

¹⁹Ni n ya mɔgɔ-wo-mɔgɔ taran min ti ke fɛrɛya-bɔɛ sɔrɔnna a nyɛrɛ ma,

²⁰n si a fɛrɛya-bɔ a kin na saga-siyi-kurɛ[6] la ka bɔ nna sagɛnu tɔ. Wo si a ma, mɔgɛ wo si n tanto bɛrɛkɛ!

²¹Ni n bara kelennɛ kensunya tele-kelen-bɛrɛni, hali n si min nɔ kiti rɔ,

²²alamɛ n bole bɛɛ rakerikerita n ma. Ni wo ma, n bole filɛ ni gbegbe.

²³N ti ko-yogo-sifa kɛ ma bawo n kilannɛ Allata tɔrɔyɛ la.

²⁴Ha bi, n ma n yigi sa nna fen-kolomɛnu kuma,

²⁵hali ka n wasi n bolo-fannu tɔ.

²⁶Hali a mɛnsan ye tiila a ma, ha bi, n ma tele bato. Hali a mafɛlan di, ha bi, n ma karɛ bato.

²⁷Ha bi, n ma kilɛ boloka ka anu gbiliya dogɔn rɔ. N ma ko-wo-ko ma n nyɛrɛ la anu bato tinɛ.

²⁸Ni n ya wo ma nun, a bɛnta, n ni faga bawo n bara bila Alla la.

²⁹N yogenu bi tɔrɔyɛ rɔ wati min, n ma sewa wola ko la. Anu kasaranɛ, n ma nyagalen.

³⁰N ma n yogenu danka alako anu ni faga bawo hakɛ le wo sufa la.

³¹Nna wɔli-kɛlɛ damasi ya a lɔn ko n si sundannu sɛnibɔ ka anu yiya.

³²Mɔgɛ minnu bi tagama-kilɛ ma, n si wonu yiya. N ti sɔn anu ni ki dandan kɔrɔ.

³³Mɔgɛ donu si anu hakɛ dogon kɔnɔ ha bi, nde ma ntɛ dogon bɛ.

³⁴Mɔgɛnu bi min fɔla n bara-koe rɔ, wo ti n kilan ka n tade hali ka a ma, n siginɛ ni to nna bɔn la.

³⁵Mɔgɔ ti sɔn a tole masɔla nna kumɛ la n bi minnu fɔla, wa? N bara min bɛɛsi fɔ kɛ la, a ye mabɛ Alla tɛma ni tonya ma. Alamɛ Alla Sɛnbɛ-Bɛɛ-Tigi ya nna madiyali-kan lamɔɛn. N kuma-nyɔgɛnu bi kumɛ minnu fɔla n kun tɔ, ni wo bɛɛ sɛbɛnɛ le nun, n ni wo yen n yɛ la,

³⁶n si a sa n kawɛ ma alako bɛɛ ni a yen, ni wo ma, n ni a don n kunyɛ la iko mansaya-fulɛ.

³⁷Ni kɛ dama mara le, n si n bara-koe bɛɛsi fɛsɛfɛsɛ Alla ye. N ti miliya tala Alla magbenna wo rɔ.

³⁸Ni n ya nna wɔli-kɛ-tinɛ kensunya mɔgɛ le ma

³⁹ka sɛnita-fan wo do dɔn, kɔnkɛ ni a tigi-kɔrɛ faga,

⁴⁰yanni fui-fan ni fɛrɛn wɔli-kɛ-tinɛ wo rɔ, alamɛ wɔnɛ anubɛ binyɛ le fɛrɛnta nyɔ rɔ. Yobu ya ata kumɛ laban nya min, wo le kɛ la.