Read Kuranko Yobu 33 Bible Online

Yobu 33 - Kuranko bible

Yobu 33

¹Woletɔ Yobu, n bi nala kumɛ minnu fɔla i ye, i wɔlɔ matɔlɔ wonu na a kin na!

²Min bi n sɔndɔmɛ rɔ, n bara wuli wo le fɔla.

³N bi nala min bɛɛ fɔla, n bi wo fɔla n yisi bɛɛ la, ado wo bɛɛ tonya.

⁴Alla Sɛnbɛ-Bɛɛ-Tigi, wo le ya n dan ka n niyi bila n tɔ.

⁵Nba, Yobu, i rabɛn n yabi-koe la ni i si ke.

⁶Fen kelen de malebɛ ile la Alla yala. Ma filɛ danta ka bɔ bɔnkɛ le tɔ.

⁷Woletɔ n ma i kilan-kunya yen n na. N ti a lagbɛlɛya i kuma.

⁸Nde ya min namɔɛn ile Yobu nyɛrɛ la,

⁹i ko i yilikini ma, ado i ma ko-yogoma wo ko-yogoma ma. I ko fɛɛ sa i la, ado i ma hakɛ kɛ.

¹⁰Ile ko Alla ya i tɔrɔ-kunya nyini ka i tɔrɔ. Ile ko Alla ye i bira boloko-yogomɛ-kɛla iko a yoge.

¹¹ Ile ko a ara yɔlɔkɛ kɛ i kian la ka a kolan sa i fɛ wati bɛɛ rɔ.

¹²Kɔnɔ Yobu, i ya kumɛ minnu fɔ kɛ la, i yo sa kɛ rɔ mumɛ! Alla makawara hadama-dan ko.

¹³Nfenna ile ye a fɔla ko Alla ti hadama-danta yasere-masɛ lamɔɛn?

¹⁴Hali Alla ye kumala tun tun, mɔgɔ sa nyɔ min si a tole masɔ a la ka kɛwɔli kɛ ata kumɛnu na.

¹⁵ Mɔgɛnu tenbi kinɔgɔla suyi rɔ, Alla ye kumala anu ye ko-rayirɛ anubɛ kiyo rɔ.

¹⁶Wonu si a ma, anu ni anu tole masɔ Allata kumɛnu na. Makawandilɛ wonu si a ma, anu ni kilan,

¹⁷alako anu ni fara hakɛ kɛla. Anu kana na wasi.

¹⁸A ti sɔn anu ni faga, ado a si anu niyi latanka sayɛ ma.

¹⁹Alla si mɔgɛ tɔrɔ kiraya-yogomɛ la alako a la ni telen wo fɛ. A si dumɛ gbere mɔgɔ fɛrɛ rɔ.

²⁰A ti ke fen dɔnna, ado hali dɔn-fen-hakikɛ, a ti diya a da rɔ.

²¹A fɛrɛ si bɔ a la ka bara. A ni to a kolo-gbansan ma.

²²Lakira-ta-sumɛ si sigi a ma.

²³Tumado Allata melika do si bɔ melika waga yirika-siyamɛ wonu tɔ ka mɔgɛ wo labila ko-latelennɛnu kɛla.

²⁴Melika wo si kinikini a ma, A si a fɔ Alla ye ko, “A boloka. A kana ta lakira. I ma a kunka-fan yen n bolo?”

²⁵A fɛrɛ si nɔrɔn a ma. A ra ni gbɛlɛya gbon!

²⁶A wa madiyali kɛ, Alla si a yabi. A si Alla bato sewɛ rɔ. Koe bɛɛ si ta a kilɛ fɛ anubɛ Alla tɛma.

²⁷A si sɔ nyama tɛma, a ni a fɔ ko, “N bara hakɛ kɛ.” A ni a fɔ ko, “N ma ko-nyima ma kɔnɔ Alla ara n nakanan.

²⁸A ara n nasɛgi saya-ta-kilɛ ma. Ha bi, n bi n niyi la.”

²⁹Alla si kɛ sufa ma hadama-dan ye tuma-wo-tuma.

³⁰A si mɔgɔ niyi lakanan ka nirɔ-diyɛ di a ma.

³¹Nba Yobu, i wɔlɔ matɔlɔ nna kumɛ la. I sabari! N ni kuma.

³²Kɔnɔ ni kumɛ do ye ile bolo i ye min fɔla, nba, nde si n tole masɔ i la bawo a sɔgɛ ye n na, n ni a lɔn ni yoe ye ile bolo.

³³Kɔnɔ ni kuma sa i bolo, i sabari. I ni i wɔlɔ matɔlɔ n na. N si i karan hɛnkilimayɛ la.