Read Kuranko Yobu 34 Bible Online

Yobu 34 - Kuranko bible

Yobu 34

¹Wole Yobu diyana-mɔgɔ sawɛ, wole hɛnkilimɛnu,

²wo ti wo tole masɔ n na? Wo halli kati!

³ Iko dɔn-fan ma si fɛlɛn mɔgɔ nagan ma nya min, tole si kumɛ yabɔ wo nya na le.

⁴Kumɛ min bi anubɛ Alla tɛma, ma ni wo fɔ wona. Ni koe min telennɛ, ma ni wo latɛgɛ ma nyɛrɛ ma wona.

⁵Ale Yobu ya a fɔ ka a gbɛ feu, a ko fɛɛ sa ale la. Ale le ya a fɔ fanan ko Alla sa ko-telenni kɛla a ye.

⁶Ale Yobu ye a fɔla ko hali ale latelennɛ, mɔgɛnu bi a fɔla ko foninya-fɔlɛ le ale la. A ko hali hakɛ sa a ma, dumɛ waranɛ a ma Alla bolo.

⁷Ha bi, i wara mɔgɛ do yen min manɛ iko Yobu kɛ? Mɔgɔ-mayɛlan di a ye iko yi di mɔgɛ ye nya min.

⁸Yobu anubɛ karagbɛlɛ tenbi kirabɔla anu nyɔgɔn na, wo kɛnɛna a diya donna a rɔ. Anubɛ hakɛ-tiginu kɛnɛna tagamana anu nyɔgɔn fɛ.

⁹Yobu ye a fɔla ko ka Alla sako kɛ, wo ti tɔnɛ di mɔgɔ-wo-mɔgɔ ma.

¹⁰Wole min ya ko-kɔrɛ lɔn, wo ni wo tole masɔ. Alla Sɛnbɛ-Bɛɛ-Tigi si ko-radunɛ ma, wa?

¹¹ Mɔgɔ ya ko-wo-ko ma, a si i sara wola ko la. A ye anu birala iko anu kɛ-nya ye nya min.

¹²Tonyɛ le, Alla Sɛnbɛ-Bɛɛ-Tigi ti ko-yogomɛ ma. A ti ko-latelennɛ yɛlɛma ko-radunɛ la.

¹³Yon ya dugu-kole kɛ latenbi Alla ma? Yon ya mansayɛ di a ma duninya mumɛ bɛɛ kuma?

¹⁴Ni Alla ya ala fɔnyɔ bi hadama-dan bolo,

¹⁵mɔgɛ bɛɛ si faga wo rɔ ka yɛlɛma gbangban la tun.

¹⁶Ni hɛnkili ye ile Yobu bolo, i ni i wɔlɔ matɔlɔ n na.

¹⁷Alla min telennɛ tede, i ye sɛgila wo manyinina tun, wa? Ile mirinɛ ko telenbagayɛ ma di a ye, nyɛ?

¹⁸Ni mansɛ mara fufafuyi la, Alla si wo tigi kɔn. Ni mansɛ mara wunduyoge la, Alla si a kɔɛn bɔ a kɔrɔ.

¹⁹Ka a fɔ kun-tigi le mɔgɛ la, Alla ti kawa wo ma. A ti lafisayalɛ kɛ fen-tiginu anubɛ bolo-kolɔnnu tɛma bawo ale le ya anu dama dan.

²⁰Mɔgɛ si tɛrɛna sayɛ la kinɔgɔ rɔ suyi rɔ. Alla si mɔgɛnu gbesi a rɔ ka anu wara-koe ka-a-la. Kun-tigi-makawanɛ-faga ma gbo Alla bolo.

²¹Hadama-dan ye koe min bɛɛsi mala, Alla kolan ye wo bɛɛ la.

²²Pinpi-wo-pinpi sa nyɔ hakɛ-tigi si ke a dogonna min tɔ.

²³Alla mako sa mɔgɔ kiti-wati latɛgɛ-koe rɔ. A si anu tɔrɔ iko a di a ye wati min.

²⁴Alla si kun-tiginu bɔ anu sɔ tinɛ rɔ hali a ma mɔgɔ manyinika. A si dogbɛrɛnu sigi anu gbɛ rɔ.

²⁵Anu bi min mala, a ya wo bɛɛ lɔn. Hali su kelen pe kɔrɔ, a si anuna sɔ tinɛ bɔ anu bolo ka anu kasara pɔ!

²⁶A si karagbɛlɛ wonu tɔrɔ mɔgɛ bɛɛ yala

²⁷bawo anu bara anu kan-kɔ sɔ a la ka anu ban ata tɔn-bira-koe ma.

²⁸Kun-tigi wonu ya bolo-kolɔnnu bira boloko-yogomɛ-kɛ ha bolo-kolɔn wonu dira Alla dala. Wo le ya a ma, ale fanan ya anu di-kɛ-kan lamɔɛn.

²⁹Ni ko-wo-ko ma-sɔgɔ sa Alla la, yon si ke a manyinikala ko, “I ma kɛ ma kama?” Ni a ya a kolonkɛ dogon ma ma, yigi ti taran ma ma tun!

³⁰Ni a ya wo ma, mɔgɛ ti ke tɔn sigila kun-tigi-karagbɛlɛnuna karagbɛlɛyɛ ma.

³¹Nba, n fa Yobu, i wara i sɔn i hakɛ la Alla ye nun, ba? I wara a fɔ a ye nun ko i ti hakɛ kɛ tun?

³²I wara Alla manyinika nun a ni ita fɛɛ yira i la? I wara sɔn i farala ko-yogoma-kɛ la?

³³Allala ko-ladannɛ ma diya i ye kan min, i si nɔrɔ a ma kama wo rɔ i diyana-koe kɛ-koe la i ye? Fi-kɔmɛ anubɛ a burɛ le wo la, i wa tafiran yen min tɔ. Min bi ile Yobu burɔ gben, wo fɔ ma ye.

³⁴Hɛnkilima-bɛrɛbɛrɛ si a fɔ ko,

³⁵“Yobu kɛ sa hɛnkilimaya-kuma fɔla. A ye kumɛ min bɛɛsi fɔla, hɛnkilimaya sa wonu tɔ.”

³⁶Wo ni Yobula kumɛ lakɔrɔsi a kila-bɛrɛbɛrɛ fɛ. Wole nyɛrɛ-nyɛrɛ si a yen a ye kumala iko karagbɛlɛ.

³⁷A ara hakɛ min bɛɛsi kɛ tɛrr, a ara murutiyɛ kofu wonu ma. A ye Alla manyinina ma dama yala.