Read Kuranko Yobu 38 Bible Online

Yobu 38 - Kuranko bible

Yobu 38

¹Kɛ bɛɛ tenbinɛ, Mari nyɛrɛ kumara Yobu ye fɔn-digidigi-wɛ rɔ.

²Nfenna ile ye sikɛ donna nna hɛnkilimayɛ rɔ ita kuma-rakolɔn fɛ?

³Nba, i sɔ gben, ka i butɛ kiri iko kei! I ni nna kumɛnu yabi.

⁴I bɛnta duninya kurukɛ tinɛ rɔ n bolo nun? Nba, hɛnkili-bɔrɔ-tigi le ile la min kɛ, a rakaran, ba?

⁵Duninya-dan si bɛn min nyɔgɛ ma, yon ya wo latɛgɛ nun? Yon ya a suman nun? I si ke wonu yabila n ye, wa?

⁶Sɛnbɛrɛn-kɔn minnu bi duninya kɔrɔ, ile ya a lɔn wonu sɔnɛ min kuma? Ile ya a lɔn min fɔlɔfɔlɔn ya duninya kɛ kurukɛ,

⁷wo tumɛ lolenu ya sigi sa anu nyɔgɔn fɛ? Melikanu fanan ya a lawɔyɔ sewɛ bolo.

⁸ Dugi tenbi wolonna kɔgɔ-yi la ka a punsɔgɔ tumɛ min, yon ya a buyi lafaga a kɔma nun ka yi wo dan sa?

⁹Nde le ya kɔgɔ-yi yamatogon banda-finyɛ la ka pinpi mamini a ma iko den pulan. I taranta nyɔ nun?

¹⁰N ya kɔgɔ-yi dan tɛgɛ ka a balan.

¹¹N ya a fɔ kɔgɔ-yi ye ko, “I dan le kɛ la, ado i kana tenbi yan kun na de! I ye tugi min kɛla i rɔ, wo dan le kɛ la.”

¹²Yobu, ha bi, lun kelen lun-tala, i wara a fɔ ko banda ni ka, tele ni bɔ?

¹³Wo kɔma, ile si ke a mala, tele wo ni duninya bira a tɔnkɔn filɛ ma ka a ragbɔngbɔn alako karagbɛlɛnu ni bɔ a rɔ?

¹⁴Wo rɔ, waan si a ma, kɔnkɛnu anubɛ lɛɛnu ni bɔ gbɛ rɔ iko kura mamɔrɔ-mɔrɔnɛ. Wo si bɔ gbɛ rɔ iko fan wa a gbɛ to bore ma.

¹⁵Teleta waan kolo nya min, karagbɛlɛnu ti ke anuna karagbɛlɛyɛ mala wo kɔrɔ.

¹⁶Tenkenu bi kɔgɔ-yi kɔrɔ kan min, i wara ke nyɔ rɔ nun? I wara kɔgɔ-yi kole ratagama nun?

¹⁷Ha bi, mɔgɔ do ma lakira-don-dɛ yira i la nun. I wara pinpi-makilanni-bɛ don-dɛ yen bɛ i yɛ la?

¹⁸I ya duninyala koloyɛ dan lɔn? Bawo i ya wo lɔn, nba, a fɔ n ye gbɛ!

¹⁹Ile ya a lɔn waan ye bɔla kan min? I si a lɔn fanan pinpi ye bɔla kan min?

²⁰Anu bi marala kan min, i si ke nyɔ yirala n na? Waan anubɛ pinpi ye bɔla kan min, i si ke anu nasɛgila nyɔ rɔ, wa?

²¹N lanɛ a la ko i si ke le bawo i kina n ko, ado ile bɛnta duninya-dan rɔ le bawo i wara kɔrɔya kɔbɔkɔbɔ!

²²Banda-kolenu namaranɛ n bolo kan min, i wara ke nyɔ nun? Yi-kole la si dɛn kan min, i ya nyɔ lɔn?

²³Wonu namaranɛ n bolo tɔrɔya-watila ko la. Anu tabɛnnɛ kɛlɛ-kɛ-watila ko la.

²⁴Tele ye wulila kan min, i wara ke nyɔ nun? Fɔn-dagɛ siginɛ tele-bɔɛ wara la kan min, i wara ke nyɔ nun?

²⁵Banda-belebele-wɛ ye nala kilɛ min fɛ, yon ya wo laka nun? Fɔnyɔ min bi nala san-gbalamɛ la a bolo, yon ya kilɛ laka wo ye nun?

²⁶Hali mɔgɔ sa kan min, yon si bandɛ lana nyɔ, hali wula-da-rakolɔn ma fanan, mɔgɔ sa kan min?

²⁷Yon bi banda-yi kɛla dugu-gbalanɛ ma alako binyɛnu ni fɛrɛn?

²⁸Bandɛ anubɛ duri, wonu fanu bi nyɔ iko mɔgɔni-finyɛ?

²⁹Banda-kole bɔra yon buyi rɔ,

³⁰min bi a makɔgɔla iko kuri?

³¹ I si ke lolenu kurunna kan-tina-kelen? I si ke anu tanyɛnsɛnna?

³²I si ke lolenu makandanna samɛ anubɛ telemɛ rɔ? I si ke kumala lolenu ye, anu ni i kuman-kan to a gbɛ rɔ?

³³I ya san-kolo-tɔnnu lɔn? Ile si ke tɔn wonu nawɔlila duninya rɔ?

³⁴Ile si ke sɛrɛnna banda-finyɛ ma alako bandɛ ni keri i kun na?

³⁵I si ke san-sɛran latala, wo kɔma, a ni na i wara ka a fɔ ko, “N tigi, n bara na?”

³⁶Yon si a fɔ kulangbɛ ye ko Nayɛli bɛ si lɛɛ yamatogon wati kɛ le ma? Yon si a fɔ dondɔn ye ko bandɛ natoe le kaka?

³⁷Yon si ke banda-finyɛnu yatɛ danna ata lɔnnɛ fɛ? Yon si ke wonu dɛ bɔla banda-yi kɔrɔ

³⁸alako dugu-gbalanɛ ni ma bore la.

³⁹Ile le ye sogenu manɛgɛnna yarɛ ye? Yarɛnu dogonnɛ tenbi farannu na, ile le ye kɔnkɛ bɔla anu na nyɔ rɔ?

⁴¹Dogɛnu kɔnkɔtoe tenbi yigi-ni-yɛlɛ kɛla wulɛ rɔ, anuna dannu bi dila nde, Mari dala anu de-nyini-koe rɔ. Yon si kɔnkɛ bɔ anu fanan na?