Read Kuranko Yobu 41 Bible Online

Yobu 41 - Kuranko bible

Yobu 41

¹ Ile si ke ninkinankɛ[8] birala lunyɛ la, wa? I si ke yili sɔla a nagan la, wa?

²I si ke dɛɛn dunna a sunyɛ la, ni wo ma, ka lunyɛ bila a gban rɔ, wa?

³A si i madiya a boloka-koe la alako i ni kinikini a ma?

⁴A si a ma, wo ni sarama-kan kiri wo nyɔgɔn tɛma alako a ni ma ila yɔɔn la tɛban, wa?

⁵I si ke a kirila ka a ma i ya latɛgɛ fan la iko kona alako ila den-sunkurɔnnu ni to tolonna wo la, wa?

⁶Wobɛ yilanu si ke a dɛ fɔla, wa? Anu si ke a soge farala anu nyɔgɔn tɛma?

⁷I si ke a birala kirilunyɛ la ka a masagan, wa? I si ke a gbole rasɔgɔla tanbɛ la, wa?

⁸I wa i bole tugu a la, i si tɔrɔyɛ min sɔrɔn wo kɔma, ha i si faga, i la ti nyina wo la muk!

⁹Ni min ya nima-fan kɛ yen, mɔgɛ wo kun ma si kɔ kilan bolo.

¹⁰Yon bi nyɔ min ti kilan ninkinankɛ wo lakundenna? Ni mɔgɔ ti ke wo mala, yon si sisi a sɔla nde, a dannɛ yakɔrɔ worɔ?

¹¹Yon si ke a kɛlɛla, a kunyɛ ni bɔ a rɔ? Mɔgɔ-wo-mɔgɔ sa min si a nɔ.

¹²N ni kuma ninkinankɛ wo kiannu anubɛ a fanka wara-koe rɔ.

¹³Yon si ke a gbole bɔla a ma? Yon si ke a gbolo-gbɛlɛmɛ wo punsɔgɔla?

¹⁴Bawo a nyin makilanta, yon si ke a tuila ka a dɛ pandin?

¹⁵A wonke tugunnɛ ye tala anu nyɔgɔn na a kɔ-gbengbe ma. Anu gbɛrɛnnɛ anu nyɔgɔn ma iko mɔlɔnɛ.

¹⁶Wonu kankannɛ ye tala anu nyɔgɔn ma, hali fɔnyɔ-don-tina sa nyɔ.

¹⁷Anu nɔrɔnɛ ye tala anu nyɔgɔn ma tɛnɛnɛ! Fenfen ti ke anu farala.

¹⁸A sun-tafɛ-kan si waan raka waran! A yɛ manɛ iko banda-ka-da-wulan.

¹⁹Ta-mɛlannu bi bɔla a dɛ rɔ Ta-lolenu kɛnɛna tiila a dɛ ma.

²⁰Ta-sisi kɛnɛna bɔla a sunyɛ rɔ iko mɔgɔ wa bin-kuran kɛ tɛ rɔ, wo sisi ye bɔla nya min.

²¹A tenbi a niyi lafɛla, fɔnyɔ min bi bɔla a dɛ rɔ, wo si tɛ sɔgɔ le.

²²A kan siginɛ sɛnbɛ-wɛ rɔ. Mɔgɔ-wo-mɔgɔ ya a kun nabɔ a ma, wo kun ma si kɔ kilan bolo.

²³A gbole gbɛlɛ a ma gbon! A gbole kankannɛ a ma kagbi! A gbɛlɛ iko nɛgɛ.

²⁴A yisi gbɛlɛ iko kuri, ado a gbɛlɛ fanan iko fankuri.

²⁵A wa a lasɔ tumɛ min, hali fankalamɛ minnu ba a yen, wonu si kilan. A tenbi yi ragbesi-gbesila, fankalamɛ wonu bi tala anu makeri-kerila kumakɔɛ bolo.

²⁶Faan fenfen sa nyɔ min si don a ma. Hali tanbɛ anubɛ kalabɛn ti ko ma a la.

²⁷Nɛgɛ mani de a ma iko puka-gbalɛ. Silɛɛ fanan mani de a ma iko kɔn-tulunɛ.

²⁸Kalabɛn fenfen sa nyɔ a si a buri min kɔrɔ. Lenfiran-kuri mani de a ma iko anu ba kɔrɔ-fɔrɔn lafili a ma.

²⁹Gbeleka-kundi mani de a fɛrɛ ma iko anu ba bin-gbalɛ le tugu a la. Mɔgɛ tenbi tanbɛ lakɛla a ma, a ye yɛlɛnna.

³⁰A bu-gbolo-wonke min bi a ma, wo mani de iko daga-gbɛnkian. A wa tenbi bore ye kan tinɛ min tɔ, a bu-gbole si nyɔ yɛlɛma.

³¹A wa a tunu dumɛ ye kan tinɛ min tɔ, nyɔ si to a labɔla iko tuli tenbi tɛ kun na.

³²A tamatoe ye tala yi purula a kɔma. Nyɔ ragbɛnɛ ye tala a kɔma punken!

³³Nima-fen wo nima-fen sa duninya rɔ mɔgɔ si min sanka a ma. A ti kilan fenfen na.

³⁴Fan minnu wasinɛ, ale ye yoola wonu ma. Ale le soge bɛɛla kun-tigi la.