Read Kuranko Yobu 6 Bible Online

Yobu 6 - Kuranko bible

Yobu 6

¹N bara kuma-mamintannɛ minnu fɔ i ye nun, i kana tɛrɛna wonu na bawo ni mɔgɛ ya nna tɔrɔyɛla gbiliyɛ suma nun, a si gbiliya le kɔgɔ-yi-kɛnkɛn-damasi ko.

⁴Alla Sɛnbɛ-Bɛɛ-Tigi ara n bon kalabɛnnu na, ado kalabɛn wonu marɛ ara n bira. Alla ara ko-gbɛlɛmɛnu nana n kan ma ha n kun ma ara kɔ.

⁵Sofɛlɛ radenɛ le ye bin dɔn tinɛ. Sara-ninki ti kuma a de-nyini tinɛ.

⁶Yon si ke dɔn-fan dɔnna min diya sa a la, kɔgɔ sa a rɔ. Sisi-kɛwɔlɛ, a gbɛmɛ min bi a burɔ, wo diyɛ nyamintan bi a la?

⁷Dɔn-fen-sufa wonu dɔn ma di nde ye, ado n ya wo fenfen dɔn, n si kiraya.

⁸E, Alla, nfenna i sa nna madiyali-kan lamɔɛnna? Nfenna n bi nyinina min ma, i sa wo dila n ma?

⁹Alako nun, i ya n wara-koe ka-a-la nun. I ni n nato dogbe!

¹⁰Ni n suira a ma ko i ye n fagala le, n si yagasa dɔn hali mabɛ dumɛ kɛ ye a nyɔgɔn na. N ya a lɔn ko ha bi, n ma ile Alla-sɛnimala tɔn tinya tele-kelen-bɛrɛni!

¹¹Kɔnɔ sɛnbɛ nyamintan bi n bolo gbɛ min si a ma, n ni to n niyi la? Nfen si a ma, n ni to n niyi la, yigi sa n bolo?

¹²N sɛnbɛ sa iko kuri, ado n fɛrɛ, nɛgɛ ma.

¹³N sɛnbɛ-wo-sɛnbɛ sa nyɔ min si a ma, n ni n nyɛrɛ lakisi. Kan-tina wo kan-tina sa nyɔ n si n tintan min na n dɛnbɛn-koe rɔ.

¹⁴Hali ni a mara, n ma kilan Alla Sɛnbɛ-Bɛɛ-Tigi la tun, n bi nyinina n diyana-mɔgɔ-bɛrɛbɛrɛnu ma nna tɔrɔya sufa kɛ rɔ.

¹⁵Kɔnɔ wole n na-kelen-nyɔgɛnu, wo ara a gbɛ n ye feu, ko n ti la wo la bawo wo mani de iko banda wa tɛgɛ, yi min bi gbalala.

¹⁶Samɛ rɔ, bɛnu si fa pen!

¹⁷Yaga, telemɛ rɔ, anu si gbala a worɔn la kerr!

¹⁸Tagamanɛnu ba ka kilɛ ma ka ta yi wo bi tinɛ, anu si to wula-da-rakolɔn rɔ ka faga nyɔ kan-nagbalɛ bolo.

¹⁹Tagamanɛ minnu bɔra Tema anubɛ Siba soenu tɔ, wonu tara yi wo nyini

²⁰kɔnɔ anu kenɛ yi-woron-gbalanɛ wo ma, anu yigi tɛgɛra.

²¹Wole mani de n yala iko yi wo ye nya min bawo wo ya n tɔrɔya-nya kɛ yen min kɛ, wo ma sisi wo gbɛrɛnna n ma tun.

²²Ha bi, n bara wo matara fan do ma? N bara wo manyinika dogonta-fan di-koe ma mɔgɛ do ma ndela ko la?

²³N bara wo manyinika n nakanan-koe ma n yogenu bolo, wa?

²⁴Awa, wo ni nna fɛɛ bɛɛ yira n na. N si n tade ka n tole masɔ wo la.

²⁵Ni wo ya tonya-kunɛ fɔ n ye, n si la wo la kɔnɔ wo ye kun-takolonya-kumɛnu denu fɔ tinɛ kɛ la.

²⁶Nde, mɔgɔ-yigi-tɛgɛnɛ, n ya kumɛ minnu fɔ wo yala, wo mani de iko fɔnyɔ ye tala fan minnu na. Nfenna wo ye nna kumɛ natelenna n ye?

²⁷Wole si kelenni-kun-kundi dɛ fɔ le ka a mayira. Wo si wo diyana-mɔgɛ mayira alako wo ni tɔnɔ-belebele sɔrɔn wo rɔ.

²⁸Wo ni n ya-kole mafɛlɛn sin, wo si a lɔn ko foninya-fɔla ma nde la.

²⁹Wo ara wotɛ latenbi. Wo kana n yiliki. N bi n yoe le tɔ.

³⁰Kɔnɔ wole miri ko n bi foninyɛ le la, nyɛ? Wo mirinɛ ko n ma tɔrɔyɛ wo kɔrɛ lɔn, ba?