Read Kuranko Yobu 7 Bible Online

Yobu 7 - Kuranko bible

Yobu 7

¹Hadama-dan-niyi mani de iko anu bi mɔgɛ min fɔrɔsɛla ka ma kɛlɛ-dan la. A mani de iko wɔliwɔli-kɛlɛ.

²A manɛ fanan iko yɔɔn min bi nini nyinɛ la a si a sulen kan min. A mani de iko wɔli-kɛlɛ min hɔnnɛ a sara-koe la.

³Nba, ka a bi karɛ kɛ ma ka a sigi karɛ doi la, n ma n beli-kunya fenfen yen. Su-wo-su, n sa fenfen tayenna fɔ mɔnɛ.

⁴N ba n sa suyi rɔ, suyi fɛ si yanya n yala. N si to n mayɛlɛma-yɛlɛmana. N bi gbaranna bandɛla ke le la.

⁵Fenfen sa n fɛrɛ ma fɔ tunbi anubɛ yele-kɔnkɔlɔn. N fɛrɛ bɛɛ ra ara belenna farafarala. Nɛɛ[2] ye bɔla a kan tinɛ bɛɛ rɔ.

⁶Nta wati ye banna tenbila, ado yigi sa n bolo. Nta wati ye tenbila tiriya, iko yese-dan-wɔrɔlan si tenbi nya min tiriya!

⁷E, Alla, i miri. N siyi si ban tiriya, iko niyi-lafɛ-kelan. N yɛ ti sa nyagalan ma tun.

⁸N yen-dan le i bolo kɛ la kɔɛ! Wo rɔ, ni i ya n nyini kɛ kɔma, i ti n yen.

⁹N mani de iko banda-fin, fɔnyɔ wa banda firan fegba! Wo rɔ, n ba faga, n ti kunden tun.

¹⁰N ti sɛgi n barɛ bɔn la tun, ado min bɛɛ ya n lɔn kɔrɔma la, wonu na si nyina n bara-koe la yen!

¹¹N ti ke n tadela, hali doni bɛrɛni! Yisi-lafinyɛ ara a ma, ha n bara diminya, ado a fɛrɛ-wo-fɛrɛ sa, fɔ n ba kuma.

¹²I ya n lɔn ninkinankɛ la mɔgɛ si kilan min na. Nfenna i ye n tagbɛrɛnna?

¹³N si n sa alako n ni kinɔgɔ, fɔsɔkɔrɛ nna dumɛ si a masɛgi n na doni

¹⁴kɔnɔ ile ye nala n mabanna kiyo wonu tɔ. I ye n takilanna ila ko-rayirɛ wonu na.

¹⁵A sɔgɛ ye n na, mɔgɛ do ni n kan radigin alako n niyi ni bɔ n fɛrɛ-makisimirinɛ kɛ rɔ.

¹⁶N niyi-sɔgɛ la ara bɔ n na. I fara n na. Nde ma n beli-kunya yen.

¹⁷ E, Alla, nfenna hadama-dan wara-koe gbili ile ma? Nfenna i ye i fonde lamirila ma ma

¹⁸ka to ma wara-koe fɛsɛfɛsɛla sɔgɔma-wo-sɔgɔma? Nfenna i si to ma kɔrɔbɔla wati-kundu-ni wo wati-kundu-ni?

¹⁹E, Alla, i ti i kolan bɔ n na? I ti n to n dan na alako n ni n nɔgɔ-yi lakunu, wa?

²⁰E, hadama-den-mafɛlɛnnɛ, n hakɛ ara nfen ko-yogoma ma i la? Nfenna i wara n ma ila kalabɛn mafɛlɛn tinɛ la? Nna dunɛ le wara i kan rakun, wa?

²¹Ha bi, i ti n hakɛ makoto? I ti i muin nna fɛɛnu ma? A ti mɛ tun, n si taran nna kanbɛ rɔ. Ni i ya n nyini, i ti n yen.