Read Kuranko Yobu 9 Bible Online

Yobu 9 - Kuranko bible

Yobu 9

¹ Ɔn, n bara kɛ damasi lamɔɛn kɔrɔma la kɔnɔ mɔgɛ ti Alla nɔ kiti rɔ.

³Ka tenbi wo la, ni min ya a tui ka Alla sɔsɔ, Alla si nyinikali waga kelen di wo tigi ma, ado a ti ke wo do-wo-do yabila.

⁴Fanka-tigi anubɛ hɛnkilimɛ le Alla la. Mɔgɔ-wo-mɔgɔ ti ke a sɔla Alla yala.

⁵Alla si kɔnkɛ bɔ a gbɛ rɔ hali a ma mɔgɛ lasui a ma. Ni a fonde bɔra, a si kɔnkɔ-belebele-wɛnu nabui fugbu!

⁶Alla si dugu-yɛrɛyɛran lana min si dugu-kole bɛɛ layɛrɛyɛrɛn. A si duninya-sɛnbɛrɛn-kɔn bɛɛ layɛrɛyɛran sikisiki!

⁷A si a fɔ tele ye ko a kana bɔ. A si a ma fanan, lolenu ti malan.

⁸Mɔgɔ-wo-mɔgɔ ma Alla dɛnbɛ san-kole rafulen tinɛ. A kelen pe le si ke tagamana kɔgɔ-yi kuma.

⁹ Lole minnu kɛnɛ anu nyɔgɔn tɔ san ma, Alla le ya wonu sigi nyɔ. Lole minnu bi bolo-nyimɛ anubɛ bolo-maran wara la, Alla le ya a ma, wonu tora anu gbɛ rɔ nyɔ rɔ.

¹⁰Alla ye kabana-koe min bɛɛsi ladanna, ma ti ke wonu dan lɔnna, ado ala ko-makawanɛnu-dan sa.

¹¹Alla wa tenbi n dafɛ, n ti a yen, ado a wa belen n na, n ti taran a kalama.

¹²Alla wa fen bɔ mɔgɛ do bolo, mɔgɔ-wo-mɔgɔ ti ke tɔn sigila a ma. Mɔgɔ-wo-mɔgɔ ti ke a manyinikala ko, “Ile ye nfen kun na kɛ la?”

¹³Allata diminyɛ dan sa. Hali kɔgɔ-yi-nyinɛ minnu bi ninkinankɛ dɛnbɛna, wonu si anu madu a kɔrɔ.

¹⁴Nde si nfen sɔsɔli-sufa lawuli ale Alla ma? Kuma sa n bolo n si Alla sɔsɔ min na.

¹⁵Hali tonyɛ ye n bolo, n ti a manyinika fɔ n ba a madiya le alako a ni kiti bɔ n kuma.

¹⁶Hali a ya a ma, n ni kuma, n ma la a la, ni a si a wɔlɔ matɔlɔ nna kumɛ wo la.

¹⁷A ara fɔn-belebele lana min ya n tabunden, hali a kɔrɔ sa a la.

¹⁸Hali ka n niyi lafɛ doni-bɛrɛni, a ti sɔn. A ara ndeta kun-nagboyɛ latenbi a dan kun na.

¹⁹N si n taya ka Alla fɔrɔsɛ le, wa? Ni n ya Alla kiti, yon si a kele?

²⁰Hali fɛɛ sa n na, ado n telennɛ, kuma-wo-kuma bɔra n dɛ rɔ, ale si n yiliki. N ya kuma-wo-kuma fɔ, n darɔ-kan si n kunyɛ don gbaran rɔ.

²¹Fɛɛ-wo-fɛɛ sa n na kɔnɔ hali wo, nna ko sa a rɔ tun. N niyi-sɔgɔ la ara bɔ n na. A bɔrɔ sa n ye tun.

²²Yoe taranta n bolo wo, yo ma taran n bolo wo, fɔ Alla wa n bara-koe ka-a-la.

²³Nde lanɛ a la ko fɛɛ sa mɔgɛ min na, wo wa saya sɔrɔn yona, fɔ Alla wa a mayɛlɛn.

²⁴Alla ya duninya dantɛgɛ karagbɛlɛnu ma. A ya a ma, kiti-tɛgɛlɛ bɛɛ fiyonyara tɛrr! Wo rɔ, ni Alla ma wo ma, yon ya wo ma nun worɔ?

²⁵Nta wati ye tenbila tiriya iko buri-kɛlɛ, ado hali a nyima kelan, a sa wonu tɔ.

²⁶N niyi mani de iko yi ye tala yanba-kun-gbalɛ min na. A lakala iko tanbakɔrɔmanɛ tenbi yigila sisi-dan kan ma.

²⁷Ni n yɛlɛnta alako n na ni nyina nna dumɛ ko,

²⁸nna tɔrɔyɛ si sɛgi n ma tun ka n yakɔrɔ-mamɔ. N bara a lɔn serr, ko Alla le wara n yiliki.

²⁹N bara ban yilikila nkɛkuna, nde ye n karanna nfen yo nyinina tun?

³⁰Hali n ya n fɛrɛ-bɔnkɛ ku sefinɛ la, hali n ya n bole laku sefina-finyɛ la,

³¹Alla si n boloka bo-denkɛ rɔ. Hali n fɛrɛya-bɔɛ si nyima n tɔ.

³²Ni Alla mara hadama-dan le la nun, nde ya a lɔn n bi a yabila nya min. Ma si ta kiti-tɛgɛlɛnu bara nun ka kiti fɔ ma tɛma.

³³Kɔnɔ yaga, mɔgɔ-wo-mɔgɔ sa nyɔ min si kiti fɔ mabɛ Alla tɛma.

³⁴E, Alla, i fara n tɔrɔla. I ka ita fen-makilannɛnu nana n kan ma.

³⁵Ni i ya wo ma, n si ke kumala le. N ti kilan bawo sɛ sa n ye ka n nyɛrɛ fɛka.