Read Kuranko Yaburi 10 Bible Online

Yaburi 10 - Kuranko bible

Yaburi 10

¹E, Mari, nfenna i fɛ-yan? Nfenna ni ma ye tɔrɔyɛ rɔ, i si i dogon ma ma?

²Karagbɛlɛnu wasira dɔgɔma-ma-de! Anu bi bolo-kolɔnnu napɛrɛnna. Alamɛ anu birara anu nyɛrɛta yili-lasiginɛnu na.

³Karagbɛlɛnu kɛnɛna anu wasila anuna karagbɛlɛyɛnu tɔ. Kensuntenu bi Alla mamɔɛnna ka a lafɛya.

⁴Alla bɔrɔ sa karagbɛlɛnu ye. Anuna miriya ma ke ale Alla ma anuna wasinteyɛla ko la.

⁵Karagbɛlɛ ya a bole don ko-wo-ko rɔ, wo ti sɛgi kɔma. A ti Allata kiti-tɛgɛ-bole nya-yen. A si nyima a yogenu tɔ.

⁶Ale miri ko a ye tola fen-tigiyɛ rɔ wo nya na le ko a ti nanparan sɔrɔn tele-kelen-bɛrɛni!

⁷ A da-burɛ lafanɛ dankɛ-kɛ anubɛ foninyɛ anubɛ niyi-ragbɛrɛn-kumɛnu na. A dɛ latiri kuma-yogomɛnu fɔla.

⁸A kɛnɛna a dogonna so-nɛnu dafɛ alako a ni mɔgɔ-magbalanɛnu faga. A si fankabɔnɛnu napɛrɛn nyɔ.

⁹A ye bolo-kolɔnnu makɔnɔna a dogon tinɛ nyɔ iko yarɛ. A si wonu bira ala yili-lasiginɛ la ka anu sagan tala.

¹⁰A ara dumɛ sa min na, wo sanɛ si to nyɔ. Ata fanka le dɔrɔn ya a ma, a ya a nɔ.

¹¹Karagbɛlɛ wo kɛnɛna a fɔla a nyɛrɛ ma ko, “Allala ko sa kɛ rɔ. A ara a yɛ lakiri. A ti n yen tun!”

¹²E, Mari Alla, karagbɛlɛ kɛnu tɔrɔ. Minnu bi tɔrɔyɛ rɔ, i ni i fonde lamiri wonu ma.

¹³Nfenna karagbɛlɛ si a ban Alla la? Nfenna a ye a fɔla a nyɛrɛ ma ko, “Alla ti nde tɔrɔ?”

¹⁴Kɔnɔ Alla, i ye yakɔrɔ-mamɔɛ anubɛ tɔrɔyɛ rayenna i kolan le la. I ye mɔgɛnu dɛnbɛna wati bɛɛ. Min ti ke a nyɛrɛ kumafunfanna, wo si a nyɛrɛ latenbi ile Mari ma. I ye bolo-kolɔnnu dɛnbɛna wati bɛɛ rɔ.

¹⁵Karagbɛlɛnuna sɛnbɛ-dɛ makeri ka anu tɔrɔ anuna ko-yogomɛla ko la alako anu kana na a ma tun.

¹⁶Mansɛ le Mari la burubukai! Bɛsi-kɔlɛnu si ban ata nyamanɛ rɔ feu!

¹⁷E, Mari, i si i wɔlɔ matɔlɔ mɔgɔ-famayiginɛnuna madiyalɛ la. I si anu yigi sigi.

¹⁸Mɔgɔ-tɔrɔnɛ anubɛ kelennɛnu tenbi dila, i si anu di-kɛ-kan lamɔɛn, ado i si sɔ anu fɛ woletɔ hadama-dan ti a ma, mɔgɛnu ni kilan tun.