Read Kuranko Yaburi 104 Bible Online

Yaburi 104 - Kuranko bible

Yaburi 104

¹N ni Mari tanto n sɔndɔmɛ bɛɛ la! E, nta Mari Alla, i makawara dɔgɔma-ma-de! I makirinɛ mansayɛ anubɛ gbiliyɛ la.

²I wara waan ma i nyɛrɛta duruku-ba la. I wara san-kole rafulen iko fani-bɔn.

³I wara a balan-kɔnnu gbangban kɔgɔ-yi rɔ. Ila kirindi le banda-finyɛnu na. I kanban le fɔnyɔ la min bi tala i la.

⁴ Ila kilayɛ le fɔnyɔ la fanan. Ila wɔli-kɛlɛ le banda-nyin-masɔgɛ anubɛ san-sɛran la.

⁵I wara dugu-kole balan gbɛn, a kurukɛ tinɛ kuma. A ra ti maga nyɔ mumɛ!

⁶I wara kɔgɔ-yi don duninya kan na iko duruku-ba. Yi ya kɔnkɛnu yamatogon.

⁷I ya yinu makuma tumɛ min, anu ya anu buri i kɔrɔ. Anu ya i seren-seren-kan lamɔɛn min kɛ, wonu dama ya anu buri.

⁸Anu bɔra kɔnkɛnu kuma ka yigi lɛɛnu tɔ, i ya kan tinɛ minnu nadan anu ye, kɔni.

⁹I ya dan sa anu ye, anu ti tenbi min kun na mumɛ alako yi wonu kana na dugi mumɛ yamatogon tun!

¹⁰I ye a mala, tenkenu bi yigila lɛɛ rɔ. Ba-yinu bi yigila kɔnkɛnu tɛma.

¹¹Wonu bi nyɔ alako sogenu ni anu min. Bintɔ-sofɛlɛnu si anu kan lakimɛ.

¹²Kɔlɔmanu bi yi wonu dafɛ nyɔ, konanu si anu nyagannu kiri wonu na ka to sigi sala nyɔ.

¹³I ye yi labɔla san-kole rɔ ka kɔnkɛnu yi sa. Duninya lafanɛ ita duwɛ la.

¹⁴I ye binyɛnu nananfala kolo-fannu ye kubukubu! I wara ki-fannu nabɔ alako hadama-dan si wɔli nya min ka a beli-fan sɔrɔn.

¹⁵Ado nfan, anu si ke gbɛɛ sɔrɔnna min si a ma, anu ni sewa. I si ɔlifi-tuli fanan di anu ma alako anu ni anu yakɔrɛ mamun. I ye dɔn-fan dila anu ma alako anu ni to sɛnbɛ sɔrɔnna.

¹⁶Ile ye yi-siyaman dila Lɛbanan-kɔlɔma-hakikɛnu ma. Ile Marita kɔlɔma-kinɛ le wonu na.

¹⁷Konanu si anu nyagannu kiri wonu denu na. Donu fanan bi sigila fɔɔ kɔlɔma donu sore la.

¹⁸Firala-baanu bi kɔnkɔ-kolo-wɛnu ma. Kɔnkɔbarɛnu bi anu dogonna denke-denkenu na.

¹⁹I ya karɛ dan alako ka san dan-natɛgɛ lɔn. Tele ya a bu-wati lɔn.

²⁰I ya su-pinpi-wɛ ladan alako sogenu ni anu matagama.

²¹Yara-bulan-kɔnkɔtoe tenbi tala sogo bira tinɛ, a ye tala bɔrɔndɔ-bɔrɔndɔla. A ye a yɛ lakalanna a dɔntɛ ma ile Alla ye min dala a ye.

²²Tele wa bɔ tumɛ min, anu si sɛgi ka ta anu sa faran la tun.

²³Wo kɔma, mɔgɛnu ni to tala anuna wɔli-kɛ-tinɛnu tɔ. Anu si telen wɔlila nyɔ ha wurɛ la.

²⁴Mari, i wara fen-siyaman dan. Ita hɛnkilimayɛ le ya wo bɛɛ dan. Duninya lafanɛ ila nima-fannu na.

²⁵Kɔgɔ-yi-kɔnɛ kolo, ado a rayan. Dan sa kɔgɔ-yirɔ-nima-fannu ma, a dɔgɔma wo, a kinama wo.

²⁶ Kulɔnnu bi anu burila kɔgɔ-yi wo kuma, ado ninkinankɛ min tɔgɛ Lifayatan, wo ye tolonna yi rɔ nyɔ. Ile le ya wo dan.

²⁷Ila nima-fan bɛɛ yɛ bɛnnɛ ile le ma ka a tɛgɛ anu beli-koe ma a wati rɔ.

²⁸I ye a dila anu ma, ado anu bi a dɔnna. I wa anu beli-fannu di anu ma, wo si anu wasa.

²⁹I wa i kan-kɔ sɔ anu na, wo si anu takilan. I wa ila fɔnyɔ bi anu bolo, anu si faga. Anu bi sɛgila bɔnkɛ le tɔ tun anu bɔra kan min nun.

³⁰I wa i niyi bila anuna dannu tɔ tumɛ min, wonu si ma nima-fannu na. Wo le ya a to, i ye ni-kurɛ dila duninya ma.

³¹Alamɛ Marita gbiliyɛ tora habadan! Alamɛ a sewara ala ko-ladannɛ kɛnu na.

³²A wa duninya mafɛlɛn, dugi ni yɛrɛyɛrɛn. A wa a kɔɛn tugu kɔnkɛnu na, ta-sisi ni bɔ.

³³N si bɛtinu bɔ Mari ye n siyi-tele bɛɛ rɔ. Fananta n bi n niyi la, n bi tantoli-bɛtinu bɔla nta Alla ye.

³⁴Alamɛ nna bɛti diyara a ye bawo nna sewɛ bɔnɛ ale le tɔ.

³⁵Alamɛ hakɛ-tiginu kasarata duninya kɛ rɔ pɔ! Alamɛ ko-yogoma-kɛlɛnu wara-koe kara-a-la feu! N ni Mari tanto n sɔndɔmɛ bɛɛ la! I ni Mari tanto!