Read Kuranko Yaburi 105 Bible Online

Yaburi 105 - Kuranko bible

Yaburi 105

¹Wo ni baraka bira Mari ye. A ye ko-makawanɛ minnu kɛla, wo ni wonu fɔ sibolo-gbɛrɛnu ye.

²Wo ni baraka-bira-bɛtinu bɔ Mari ye. A ara kabana-koe min bɛɛsi ma wo ye, wo ni wonu takaran.

³Wo ni sewa bawo Mari halalɛ le male la. Min damasi ye ale batola, wonu ni sewa.

⁴Wo ta wo makoenu na Mari wara, ale le si wo dɛnbɛ. Wo ni to ale le kelen pe batola burubukai!

⁵Wole Iburayima kegeyɛnu, Marita wɔli-kɛlɛ, kɔni, wole Yakoba kegeyɛnu, Alla ara wole minnu yabɔ, kɔni, Alla ara kabana-koe minnu ma, wo ni wo miri wonu ma. A ara gbalo minnu sigi wo yogenu ma, wo ni wo miri wonu ma fanan.

⁷Mata Mari le ale Alla la. Sɛnbɛ ye ale le bolo duninya kɛ rɔ.

⁸ Alla ara sarama-kan min kiri mabɛ ma benba Iburayima anubɛ Isiyaka ye, a si a yili to wo ko wo bɔnsɔn-natoenu ye.

¹⁰ A ya sarama-kan wo le kiri ma benba Yakoba ye fanan, ado wo ti tinya mumɛ!

¹¹A ko a si Kenan nyamanɛ kɛ di ma ma. A ko nyɔ si ma matɛ la habadan!

¹²Fɔlɔ nun, male, Allata mɔgɛnu ma siya. Anu bi sundanyɛ le la Kenan nyamanɛ rɔ.

¹³Anu bi yilan-yilanna sibolo-gbɛrɛnu tɛma. Anu bi bɔla nyamanɛ do rɔ ka ta nyamani-gbɛrɛkɛ rɔ.

¹⁴ Kɔnɔ Alla ma sɔn anu tɔrɔ-koe ma mɔgɔ-wo-mɔgɔ bolo. A ya sibolo-gbɛrɛnuna mansɛnu makawandi ko

¹⁵anu kana na ko ma ata mɔgɔ-yabɔnɛnu na. A ko anu kana na ko-yogoma ma ala nɛbinu na fanan.

¹⁶ Alla ya kɔnkɔ-fitinɛ ladon anuta nyamanɛ rɔ ka anu beli-fan bɛɛ bi anu bolo.

¹⁷ Yusufu min yɔɔnya-mayirɛ kɛra, a ya wo lata anu yarɔ Iyipiti.

¹⁸ Yɔlɔkɛnu kɛnɛ a kian la. Nɛgɛ-gbilikɔn mininɛ a kan ma.

¹⁹Wonu kɛnɛ tora a ma ha ala wɔlɔyiya-kumɛ bɔra-a-la. Marita kumɛ ya a yira mansɛ la ko Yusufu ye tonyɛ le tɔ.

²⁰ Wo kɔma, Iyipiti mansɛ ya a boloka. Sibolo-gbɛrɛ-mansɛ wo ya a kunyɛ bɔ gbaran rɔ.

²¹ A ya a sigi ata nyamanɛ kun na ka a ma nyamanɛ wo maralɛ la.

²²A taranta mansɛla mɔgɔ-banu kun na. Mansɛ ya sɛnbɛ di a ma ka a kawandilɛnu makawandi.

²³ Wo kɔma, a fa Yakoba fanan tara Iyipiti. Wo tara sigi nyamanɛ wo rɔ sundanyɛ la.

²⁴Mari ya den-siyaman di ala dannu ma nyɔ rɔ. A ya anu tagbɛlɛya ka tenbi anu yogenu na.

²⁵ A ya a ma, Iyipiti kɛnu ya ala mɔgɛnu kɔn ka yanfɛ sigi anu na.

²⁶ Wo kɔma, a ya ala wɔli-kɛlɛ Musa lata anubɛ Aruna, a ya min yabɔ, kɔni.

²⁷Anu ya Marita kabana-koenu nadan ka ko-makilannɛnu nadan Iyipiti nyamanɛ rɔ.

²⁸ Alla ya pinpi burun nyamanɛ wo kun na bawo Iyipiti kɛnu ya ala kumɛ masɔsɔ.

²⁹ A ya anuna bɛnu yɛlɛma yele la alako anuna yɛgɛnu ni faga.

³⁰ A ya anuna nyamanɛ basan turukɔɔkɔnu denu gbansan na. Hali mansɛta bolɔn, anu bi nyɔ duk!

³¹ Alla kumara nya min wo, yɔlɛ anubɛ muruntu-mɛrɛntɛnu tugura nyamanɛ wo mumɛ kun na.

³²A ma bandɛ lana anuna nyamanɛ rɔ fɔ san-sɛran anubɛ banda-kole.

³³ Wonu ya anuna ki-fannu tinya tɛrr, ka kɔlɔma bɛɛ sa a ma tala.

³⁴Alla kumara nya min wo, kondɔnnu tugura anu kan ma. Anu siya ha ka a dan-natenbi.

³⁵ Kondɔn wonu nara ka anuna sɛnita-fan anubɛ anuna ki-fan bɛɛ dɔn sa!

³⁶ A ya Iyipiti kɛnuna den-kei-sarɛ damasi faga.

³⁷Wo kɔma, a tara Isirɛla mɔgɛnu na. Anu tara sɛnɛ anubɛ wodi-gbɛ la anu bolo. Anu dama kɛndɛ, ado anu tagbɛlɛ.

³⁸ Iyipiti kɛnu kilannɛ anu na nun, ado anuna tɛ wo diyara anu ye.

³⁹ Alla ya banda-fin-gbɛ sɔ ala mɔgɛnu kuma ka tɛ sɔ anu yarɔ suyi rɔ alako anu ni kilɛ yen.

⁴⁰ Anu ya mataralɛ kɛ tumɛ min, Alla ya wonderenu di anu ma. A ya dɔn-fan layigi ka bɔ san-kole rɔ min si anu tabɔ.

⁴¹ A ya farɛ dɛ laka, yi bɔra anu ye. Yi wo tugura a rɔ ka yigi wula-da-rakolɔn rɔ iko bɛ.

⁴²Alla ya sarama-kan-sɛnimɛ min kiri ala wɔli-kɛla Iburayima ye, a ma nyina wonu ko.

⁴³Woletɔ a ya ala mɔgɔ-yabɔnɛnu nabɔ. Anu bi sɔnkɔla ka baraka-bira-bɛtinu bɔ sewɛ la.

⁴⁴ A ya sibolo-gbɛrɛnuna dugi di ala mɔgɛnu ma. A ya a ma, anu ya anuna sɛni sa tinɛnu bi anu bolo.

⁴⁵A ya wo ma le alako ala mɔgɛnu ni ala tɔnnu bira ka ala sereya bɛɛ to a gbɛ rɔ. Mari ni tanto!