Read Kuranko Yaburi 108 Bible Online

Yaburi 108 - Kuranko bible

Yaburi 108

¹E, Alla, nde ara lanaya-ba sa i rɔ. N si tantoli-bɛti bɔ i ye n sɔndɔmɛ bɛɛ la.

²N si kunden ka nna sɔrɔn anubɛ nna bɔlɔn fɔ. N si kunden subagɛ ma tantoli-bɛti-bɔɛ la n bolo.

³E, Mari, n si baraka bira i ye sibole bɛɛ yala. N si tantoli-bɛtinu bɔ mɔgɛ bɛɛ yala.

⁴Ila keninteya-dannatɛgɛbɛlɛ anubɛ lanayɛ kolo iko san-kole anubɛ dugu-kole tɛmɛ ye nya min.

⁵E, Alla, a ma, ma ni ila kabana-koenu yen san-kole rɔ ka ita gbiliyɛ yen dugu-kole bɛɛ kuma.

⁶I ni nna madiyali-kan lamɔɛn ka ma kisi ila sɛnbɛ-wɛ la alako i diyana-mɔgɛnu si kanan nya min.

⁷Alla ara a fɔ ata kan-tina-sɛnimɛ rɔ ko a si Sɛkɛm soe anubɛ Sukɔti lɛɛ tala ata mɔgɛnu na nɔlɛ rɔ.

⁸A ko Kaliyadi nyamanɛ, atɛ le wo la. Manasa nyamanɛ fanan ye wo nya le. A ko Ifɛrɛm nyamanɛ le manɛ a nɛgɛ-fulɛ la. A ko Yuda nyamanɛ le manɛ ata sɛnɛ-kɔlɔma la.

⁹A ko a kɔɛn laku tinɛ le Mohabu nyamanɛ la. A ko a si ala sanbarɛ lafili Idɔm nyamanɛ rɔ ka a yira anu na ko atɛ le nyamanɛ wo fanan na. A ko a si sɔnkɔ-sɔnkɔ bawo a ara Filisiti nyamanɛ nɔ.

¹⁰E, Alla, yon si a ma, n ni don Idɔm nyamanɛ so-karantan rɔ? Yon si a ma, ma ni Idɔm mɔgɛnu nɔ?

¹¹Tonyɛ, i wara i ban ma la, wa? Kɛlɛ-dannu ba ta kɛlɛ-kɛ-tinɛ, i ti kofu ma ma kɛlɛ rɔ?

¹²Fɔ i wa ma dɛnbɛ ka ma yogenu kɛlɛ bawo hadama-danta sɛnbɛ, fenfen ma wo la.

¹³Ni ile Alla ye ma fɛ, fɔ ma wa nɔ-ko sɔrɔn. Ma si ma yogenu nɔ le worɔ feu!