Read Kuranko Yaburi 109 Bible Online

Yaburi 109 - Kuranko bible

Yaburi 109

¹E, Alla, n bi i tantola. I radeni kana to n na

²bawo karagbɛlɛnu anubɛ foninya-fɔlɛnu bara wuli n kan ma. Anu bi tɔgɛ sala n na

³ka kuma-yogomɛnu fɔ n bara-koe rɔ. Anu bi kɛla n ma fu! N ma kɔrɛ yen a la.

⁴Hali anu di n ye, ado n bara madiyali kɛ anuna ko la, anu bi n kan ma tolon!

⁵Ha bi, anu bi ko-nyimɛ sarala ko-yoge la ka keninteyɛ sara gboyanayɛ la.

⁶Kiti-tɛgɛla-radunɛ do yabɔ ka wo ma n yogela kiti-tɛgɛlɛ la. Ale fanan yoge do ni sɔ a la.

⁷Alamɛ kiti gboyara a la. Alamɛ ala madiyalɛ ya a laban a bolo tɔn-tinyɛ ma.

⁸ Alamɛ a siyi-fɛ wuruyara kudɛ! Alamɛ mɔgɔ-gbɛrɛ ya a gbɛ bi.

⁹Alamɛ ala dannu mara kelennɛnu na. Ala musi ni ma kɛɛ-musi la.

¹⁰Alamɛ ala dannu mara bɛnbɛn-tarali-kɛlɛnu na. Alamɛ anu gbenta anuna bon-tinyanɛnu na.

¹¹Minnuna yili ye a la, alamɛ wonu nara bui a ma ka a bolo-fannu toronde a la. A ye fan min bɛɛ nyinina a siyi-tele-bɛɛ kɔrɔ, alamɛ sundannu ya wonu toronde a la.

¹²Alamɛ mɔgɔ-wo-mɔgɔ kana ko-nyima kɛ a ye. Alamɛ mɔgɔla ko kana taran ala kelennɛnu bara-ko rɔ.

¹³Alamɛ a kegeyɛnu tora fagala. Alamɛ a tɔgɛ tununta a kɔma-mɔgɛnu tɛma yen!

¹⁴A benbanu ya ko-yogomɛ min bɛɛsi ma, alamɛ Mari fonde tora wonu ko. Alamɛ Mari kana a na hakɛ makoto.

¹⁵Alamɛ Mari tora a mirila anu hakɛ ma ka nyina anu bara-koe la salon!

¹⁶Kei wo ti a miri ko-nyima-kɛ-koe ma lefan! A bolo-kolon wo, a fugara wo, minnu dɛnbɛna sa wo, a ya wonu yakɔrɔ-mamɔ ka anu faga.

¹⁷Dankali-kɛ di a ye kati! Wo rɔ, alamɛ ale fanan ya dankɛ sɔrɔn. Duwa-kɛ ma di a ye mumɛ! Wo rɔ, alamɛ mɔgɔ kana duwa ale fanan ye.

¹⁸Dankalɛ namanɛ a da rɔ iko a nyɛrɛ kan-na-duruki si bɔ a kan na nya min. Alamɛ ata dankɛ wonu ya a nyɛrɛ kimɛ iko yi yɔgbɔ! Alamɛ anu donta a kole rɔ iko tuli.

¹⁹Alamɛ dankalɛ wonu mara fɛrɛya-bɔɛ la a ye. Alamɛ anu mara butɛ-kiri la a ye.

²⁰Mari, n yogenu tɔrɔ wo nya na le katarala minnu bi ko-yogoma-su kɛnu fɔla n ma.

²¹Kɔnɔ n tigi Alla, n dɛnbɛ iko i ya n yili-madiya nya min. N nakanan ka a tɛgɛ ila keninteya-dannatɛgɛbɛlɛ ma.

²²Makolamɛ bolo-kolɔn le nde la. Diminyɛ ye yigila n tɔ fɔɔ n sɔn-kole.

²³A ara to sɛ, n bara-koe ni ka-a-la iko wurala-ninɛ. Fɔnyɔ ye tala n na iko kɔinkian.

²⁴Kɔnkɛ ara n kunbelannu tafaga n kɔrɔ sun-donyɛla ko la. N tora n kole gbansan de ma.

²⁵ Mɔgɛnu ba n yen, anu si yɛlɛn n ma. Minnu ba a labɔ n ma, wonu si anu kunyɛ firifiri.

²⁶E, nta Mari Alla, n dɛnbɛ. N nakisi ka a tɛgɛ ila keninteya-dannatɛgɛbɛlɛ ma.

²⁷N yogenu ni a lɔn yati ko nna kisilɛ le ile le kelan la.

²⁸Anu si to n dankala kɔnɔ ita duwɛ si to yigila n kuma. Minnu bi n kan ma, alamɛ wonu yarabira pɔ! Alamɛ nde, ita wɔli-kɛlɛ sewara.

²⁹Alamɛ n yogenu miliyara kɔgɔrɔyɔlɔ! Alamɛ miliyɛ wo mara anu kan-ma-duruki la.

³⁰N kulu-mayɛlɛnɛ si baraka bira Mari ye. N si a matɔgɔ sɛrɛ-finfinsɛ tɛma

³¹bawo a ye bolo-kolɔn kumafunfanna. Minnu bara ban anu faga-koe latɛgɛla, a si anu kisi wonu masibɛ ma.