Read Kuranko Yaburi 111 Bible Online

Yaburi 111 - Kuranko bible

Yaburi 111

¹N si Mari tanto! N tenbi Allala mɔgɛnu tɛma, n si baraka bira Mari ye n yisi bɛɛ la.

²Mari ara kabana-koe minnu nadan, wonu makawara! Ni kabana-koe wonu diyara minnu ye, anu si to anu mirila wonu ma.

³Marita wɔlɛ mumɛ bɛɛ ya ata gbiliyɛ anubɛ ata mansaya-fanka yira mɔgɛnu na. Ata telenbagayɛ ti ban mumɛ!

⁴Mari ara kabana-koe minnu kɛ, a ti sɔn ma ni nyina wonu ko. A nyimayanɛ, ado a kinikinite.

⁵Minnu bi a gbiliyala, a si wonu beli-fan di anu ma, ado a ti nyina a sarama-kan ko mumɛ!

⁶A ya sibolo-gbɛrɛnuna nyamanɛnu di ata mɔgɛnu ma nya min, wo ara ata fanka yira anu na.

⁷A ara koe min bɛɛ kɛ tɛrr, fenfen sa wonu tɔ fɔ telenbagayɛ anubɛ lanayɛ. A ya tɔn-wo-tɔn di ma ma, wo telenni de ma ye.

⁸Ata tɔnnu ti ban mumɛ! A ya wonu di ma ma telenbagayɛ anubɛ tonyɛ le la.

⁹A ya ala mɔgɛnu hɔrɔya ka sarama-kan kiri anu nyɔgɔn tɛma min ti ban mumɛ! Ata sɛninyɛ anubɛ ata sɛnbɛ-dan ti lɔn.

¹⁰ Hɛnkilimayɛ dabirɛ le Mari gbiliyɛ la. Min bɛɛsi ye Marita sereyanu birala, a si ko-kɔrɔ-lɔn di wonu ma. Ma ni to a matɔgɔla burubukai!