Read Kuranko Yaburi 116 Bible Online

Yaburi 116 - Kuranko bible

Yaburi 116

¹Mari keninɛ n bolo bawo a ye a wɔlɔ matɔlɔla nta madiyali-kan la.

²A ya a wɔlɔ matɔlɔ n na min kɛ, n si to a rakelela n siyi-tele-bɛɛ rɔ.

³N nafoonɛ saya-masibɛ la. Kilan minnu bi sayɛ fɛ, wonu mininɛ n ma. Kilan anubɛ kumakɔɛ ara tenbi n tɔ.

⁴Wo le ya a ma, n ya Mari rakele n ko, “I yandi, n Mari, n nakanan!”

⁵Mari hinante, ado a telenta. Mata Alla, a kinikinite.

⁶Min dɛnbɛna sa, Mari si wo lakanan. N bi masibɛ rɔ tumɛ min, a ya n nakisi.

⁷N ya a fɔ n nyɛrɛ ma ko, “N bi hɔnna nfenna gbɛ?” Mari nyimayanɛ n ye.

⁸Mari ya n nakanan sayɛ ma. A ya tɔn sigi n ya-yi la. A ma sɔn fenfen ni n nɔ.

⁹N bi Mari yakɔrɔ min kɛ, n bi kɛndɛwaganu tɛma duninya rɔ.

¹⁰ Hali n bara a fɔ ko, “N bundennɛ,” kɔnɔ n ma lanayɛ boloka.

¹¹Hali n kumakɔnɛ tumɛ min, n ko, “N ti la mɔgɔ-wo-mɔgɔ la fɔ Alla kelen pe.”

¹²Ka a tɛgɛ Alla ya ko-nyimɛ min kɛ n ye, n si nfen di ale Mari ma?

¹³N si nɔnbɔ-gbɔ-yi ma sarakɛ la Mari ye ka baraka bira a ye n nakanan-koela ko la.

¹⁴N bara Mari yili-madiya fan minna ko la, n si n kan wo latɔnbagaya a ye mɔgɛ bɛɛ yala.

¹⁵Ni Marita mɔgɛ do sara, ko-ba le wo la Mari yala.

¹⁶E, Mari, ita wɔli-kɛlɛ le nde la. N wɔlita i ye iko n na wɔlita i ye nya min. I wara n nakanan sayɛ ma.

¹⁷N si na baraka-bira-sarakɛnu na i ye ka i madiya.

¹⁸N bara i yili-madiya min na, n si na wo la ila Bato-Bɔn la Yerusalɛm soe burɔ ka a di i ma mɔgɛ bɛɛ yala nyɔ. N si Mari tanto!