Read Kuranko Yaburi 118 Bible Online

Yaburi 118 - Kuranko bible

Yaburi 118

¹ Baraka bira Mari ye bawo a nyimayanɛ. Ata keninteyɛ ti ban mumɛ!

²Isirɛla mɔgɛnu ni a fɔ ko, “Ata keninteyɛ ti ban mumɛ!”

³Allata saraka-masɔlɛnu ni a fɔ ko, “Ata keninteyɛ ti ban mumɛ!”

⁴Min bɛɛsi ye a batola, wonu ni a fɔ ko, “Ata keninteyɛ ti ban mumɛ!”

⁵N bi tɔrɔyɛ rɔ tumɛ min, n ya Mari rakele n dɛnbɛn-koe rɔ. A ya nna madiyalɛ yabi ka n kun nadiya.

⁶ N ti kilan bawo Mari ye n fɛ. Mɔgɛnu si ke nfen mala nde la worɔ?

⁷N dɛnbɛnɛ le Mari la. N si nɔ-ko sɔrɔn n yogenu ma.

⁸Yanni mɔgɛ ni a yigi sa hadama-dan rɔ, a fisa, a ni a yigi bɛn Mari ma.

⁹Yanni mɔgɛ ni a yigi sa kun-tiginu tɔ, a fisa, a ni a yigi bɛn Mari ma.

¹⁰Hali n nafoonɛ n yoge sibolo-gbɛrɛnu na, n ya anu halaki Marita sɛnbɛ la!

¹¹N nafoonɛ anu bolo n tɔnkɔn bɛɛ rɔ kɔnɔ n ya anu halaki Marita sɛnbɛ la!

¹²Anu bi finya-finyala n ma iko li-kolenu, kɔnɔ anu wara-koe kara-a-la tiriya iko tɛ tenbi fira-gbalɛ la. N ya anu halaki Marita sɛnbɛ la.

¹³Anu tora n nasɛgila n kɔma-kilɛ la, a tora sɛ, n ni bui kɔnɔ Mari ya n dɛnbɛ.

¹⁴ Nna sɛnbɛ ye bɔla nta Mari le tɔ. Matɔgɔ-bɛti bɛnta a ma. A ara n nakanan.

¹⁵Wo ni wo tole masɔ Marita mɔgɛnuta sewa-kan la nɔlɛ bolo anuna fani-bɔnnu na. Anu bi a fɔla ko, “Mari ara ata sɛnbɛ-makawanɛ mayira!

¹⁶Ata sɛnbɛ ara a ma, ma ara nɔ-ko sɔrɔn. Nɔlɛ sɔrɔnta kɛlɛ rɔ Marita kabana-ko-sɛnbɛ le la!”

¹⁷N ti faga, ado n si to n niyi la. Mari ara min ma, n si to wo rakaranna dɛɛ!

¹⁸A ara n tɔrɔ kosɛbɛ kɔnɔ a ma sɔn, n ni faga.

¹⁹Bato-Bɔn don-dɛ laka n ye. N si don ka baraka bira Mari ye!

²⁰Mari warɛ-don-dɛ le kɛ la. Telenbagɛnu denu dɔrɔn si don nyɔ.

²¹Mari, n si i matɔgɔ bawo i ya i wɔlɔ matɔlɔ n na. Ile le ya a ma, n ya nɔ-ko sɔrɔn.

²² Bon-sɔlɛnu ya anu ban kuri min na ko fen ma, wo le ara ma sɛbɛna-kuru-tɔnɔnamɛ la.

²³ Mari nyɛrɛ-nyɛrɛ le ya kabana-ko-belebele kɛ ma, ado wo mara kabana-ko-wɛ la male yala.

²⁴Mari ya ma yogenu nɔ bi-tele kɛ min ma, ma ni nyagalen wona ka sewa bi-tele kɛla ko la.

²⁵ Mari, ma lakisi, ma lakisi! Mari, ma wara-koe lata yarɔ.

²⁶ Min bi nala Marita sɛnbɛ rɔ, alamɛ wo ya Allata duwɛ sɔrɔn. Ma si baraka bira a ye Mari Bato-Bɔn la.

²⁷Mari le Alla la. A nyimayanɛ ma ma. Tin-yanbɛnu ni taran wo bolo la ladiyɛ kuma. Wo ni saraka-mintan-tinɛ lafoo tin-yanbɛ ye wo bolo la.

²⁸Nta Alla le ile la n si baraka bira min ye. N si i makawa-koe rakaran kan tinɛ bɛɛ rɔ.

²⁹Baraka bira Mari ye bawo a nyimayanɛ. Ata keninteyɛ ti ban mumɛ!