Read Kuranko Yaburi 132 Bible Online

Yaburi 132 - Kuranko bible

Yaburi 132

¹Mari, i kana nyina Mansa Dawuda anubɛ ata tɔrɔyɛ, a muinta minnu kɔrɔ.

²A ya a dakan-don ile Yakobata Alla-makawanɛ ye. I ni i fonde to lanyiri wo ko.

³A ko a ye anubɛ Alla tɛma ko a ti a kunyɛ ladon bɔn la ko a ti ki nyɔ.

⁴Mansa Dawuda ko a si a sa a ya la. Hali ka a yunkun, a ti wo ma,

⁵fɔ a wa bɔn sɔ ile Mari ye, ile Yakobata Alla-makawanɛ si i mayigi kan min.

⁶Ma ye Bɛtalehɛm soe tumɛ min, ma ya tɔn-kenkirɛ wara-koe lamɔɛn, ado ma ya a taran Yirɔm soe kɔma firɛ rɔ.

⁷Wo kɔma, ma ya a fɔ ko, “Ma ta wona Mari Bato-Bɔn la. Ma ni a bato a mayigi tinɛ dafɛ.”

⁸Mari, tɔn-kenkirɛ min bi ila sɛnbɛ-tamasereyɛ la, na wo la i Bato-Bɔn la. Nba, i ni na i mayigi nyɔ.

⁹Alamɛ ila saraka-masɔlɛnu ya telenbagayɛ bila anu kan na iko duruku-ba-wɛ. Alamɛ ita mɔgɛnu tora a lawɔyɔla sewɛ bolo.

¹⁰ I wara lanyiri kiri ila wɔli-kɛlɛ, Mansa Dawuda ye. Mari, i kana i ban ita mansa-yabɔnɛ wo la.

¹¹ Ile Mari ya lanyiri-gbɛlɛmɛ min kiri mansɛ ye nun, i ti wo dafabɛlɛ to tun. I ko i si ala dan do ma mansɛ la, min si to a gbɛ rɔ.

¹²Ni ala dannu ya ila sarama-kan latɔnbagaya ka ila karan to a gbɛ rɔ, i ko mansayɛ ti bɔ anuna bɔn la mumɛ!

¹³Mari ara Yerusalɛm soe yabɔ ko nyɔ ni ma a halalɛ la.

¹⁴A ko a ye a fɛ, a ni to sigini nyɔ habadan! A si maralɛ kɛ nyɔ le.

¹⁵A ko a si nyɔ-mɔgɛnu makoe nyinya fasai! Hali nyɔ-bolo-kolɔnnu si dɔn-fan sɔrɔn bui!

¹⁶A si kisi-ko-duruki don saraka-masɔlɛnu kan na. A ko ata mɔgɛnu si to sigi sala sewɛ bolo nyɔ rɔ.

¹⁷ A ko Mansa Dawuda kegeyɛ do si ma mansa-makawanɛ la, ado ata mansa-yabɔnɛ si to bɔla ala bɔn la tolon!

¹⁸A ko a si a yogenu namiliya kɔnɔ ata mansayɛ si ta yarɔ ka wara.