Read Kuranko Yaburi 141 Bible Online

Yaburi 141 - Kuranko bible

Yaburi 141

¹Mari, n bi i rakelela. I yandi, n dɛnbɛ tiriya! N ba i rakele, i ni i wɔlɔ matɔlɔ n na.

² Sɔn nta madiyalɛ la iko i ye sɔnna isɛnti-mintan-sumɛ la nya min. N ba n bole rasigi i ye, i ni sɔn wo la iko i ye sɔnna wurala-sarakɛ la nya min.

³Mari, n dɛnbɛ n nagan marala. N ni a ma n fɛrɛma kuma tinɛ.

⁴N miriya bɔ ko-yogomɛ ma. Doinu tenbi ko-yogomɛ mala, n kana kofu anu ma. N kana na anuna bɛsi-kɔ-fannu dɔn.

⁵Ni telenbagɛ ya n gbesi, a ye n dɛnbɛn-koe le tɔ. Ni a ya n makuma, wo mani de iko a ara tuli le don n yakɔrɛ ma, ado n ti n ban a bolo. N bi madiyali kɛla ko-yogoma-kɛlɛnu denu kan ma.

⁶Anuna kun-tiginu na wa fili denke-denke kɔrɔ tumɛ min, karagbɛlɛnu bi a lɔnna wo le ma ko nna kumɛ, tonyɛ le.

⁷Anu kolenu takerikerinɛ si to kanba-dɛ la iko bɔnku-daga-ratiinɛ.

⁸E, ma tigi Mari, n yɛ bɛnnɛ i ma n dɛnbɛn-koe rɔ. N lara i la. I kana sɔn, anu ni n faga.

⁹Gbɛrɛ minnu nasiginɛ n ye, i kana sɔn, n ni bira wonu na. Karagbɛlɛnu bara yalɛnu tafulen n yarɔ, i kana sɔn, n ni bira wonu na.

¹⁰I ni a ma, karagbɛlɛnu ni bui anu halala-denka-sinnɛ rɔ, ado yanba kana yalan nde ma.